Maimatanganen dagiti nadumaduma nga LGU booth ti 15 nga ili ti Nueva Vizcaya, a mangitampok iti festival ti tunggal ili, kas iti Citrus Festival ti ili ti Kasibu. (Ladawan: Pammadayaw ti PIA Nueva Vizcaya)

Naluktan ti maika-15 Grand Ammungan Festival (GAF) ti Nueva Vizcaya itay Mayo 21, 2024 iti Provincial Capitol, Bayombong babaen ti Nueva Vizcaya Travel and Tourism Expo (NVTTE).

Maiparang iti maikatlo nga NVTTE dagiti nadumaduma a maris ti nabaknang a kultura, agraman dagiti napipintas a lugar iti Nueva Vizcaya.

Indauluan da Gobernador Jose Gambito, dati a Gobernador Ruth Padilla (GAF Director-General), Bise-Gobernador Eufemia Dacayo ken dagiti kameng ti Sangguniang Panlalawigan (SP), agraman dagiti sangaili manipud iti Department of Tourism (DOT) nga indauluan ni Usec. Ferdinand Jumapao, ken dagiti opisial ti nadumaduma nga ili, ti pannakabisita dagiti 15 nga LGU booth.

Indauluan ni Nueva Vizcaya Governor Jose Gambito (maikatlo, agpakanawan) ti pannakayusuat ti 3rd Nueva Vizcaya Travel and Tourism Expo kas panglukat iti maika-15 Grand Ammungan Festival itay Mayo 21, 2024 iti Provincial Capitol Grounds, Bayombong. Kaduana da (agpakanawan) dati a Gobernador Ruth Padilla, DOT Undersecretary Ferdinand C. Jumapao, Board Member Eunice Galima-Gambol, Vice Governor Eufemia Dacayo, ken Board Member Elma Pinao-an Lejao. (Ladawan: Pammadayaw ti Vizcaya Reporter)

Maiparang kadagiti LGU booth dagiti nadumaduma a festival iti bukodda nga ili.

Eksklusibo iti Website
Manipud Kadagiti Agdama a Kameng ti Bannawag: Dios ti Agngina!

Manipud Kadagiti Agdama a Kameng ti Bannawag: Dios ti Agngina!

Maysa kadagiti padpadaanan ti koronasion ti Saniata ti Nueva Vizcaya a maangay iti Nueva Vizcaya Convention Center iti Bayombong inton Mayo 23, ken ti Ammungan Streetdance and Showdown Competition a maangay iti Nueva Vizcaya Sports Complex inton Mayo 24.

Agpaut ti Ammungan Festival agingga inton Mayo 24, 2024.

Tinawen a maangay ti Ammungan Festival kas panangrambak iti maika-185 Founding Anniversary ti Nueva Vizcaya.

Naawagan daytoy rambak iti "Ammungan," a kayatna a sawen, panaguummong dagiti nadumaduma a tribu ti Nueva Vizcaya a kas iti Isinai, Ibaloi, Kalanguya, Iwak, Gaddang, Bugkalot, Kankanaey, Ifugao, agraman dagiti Ilokano ken Pangasinense nga immalatiw iti probinsia. (PIA Nueva Vizcaya//Lito Hilidon/Bannawag)