Sinerrek ti hacker a ph1ns ti online system ti Philippines National Police (PNP) a nangikompromiso iti 393,894 a linia ti personal nga impormasion iti PNP Logistics Data Information and Management System (PLDIMS).
Kalpasan iti sumagmamano nga aldaw, insaruno ti hacker a sinerrek ti Firearms and Explosive Office (FEO) ket naalana dagiti datos kas kadagiti nagnagan, aldaw ti panagkasangay, unit assignment, email address, ken dagiti detalye dagiti kameng ti Special Action Forces (SAF) ken nangangato nga opisial ti PNP, agraman ti PNP Chief, ken ni Department of Information and Communications Technology (DICT) Secretary Ivan Uy.
Nastrek ti hacker ti sistema ti PNP babaen ti pananggundawayna iti nakapuy a server ken panang-bypass iti email verification ti FEO Online License/Permit Application form.
Nastrek met ti hacker ti Local File Inclusion (LFI) tapno maaddaan daytoy iti akses ken mai-downlad-na dagiti sensitibo a file, agraman dagiti .env file isu a naalana ti agarup 1.6 terabyte a datos.
Manipud Kadagiti Agdama a Kameng ti Bannawag: Dios ti Agngina!
Naaala ni ph1ns dagiti address, birthday, civil status, email, TIN number, mobile number, telephone number, detalye ti kaasitgan a kabagian, petsa ken panagpaso ti resulta ti neuro test, kasta met ti petsa ken panagpaso ti resulta ti drug test dagiti 500,000 a nagan iti listaan ti PNP.
Segun ken ni DICT Undersecretary for Infostructure Management, Cybersecurity and Upskilling Jeffrey Ian C. Dy makium-umandan iti NBI, PNP, ken NSC itay Mayo 20 tapno tuntunenda ti hacker a PH1NS. (Art Samaniego/Manila Bulletin//Lito Hilidon/Bannawag)
