Pormal nga imparang ti National Commission for Culture and the Arts (NCCA) iti publiko ti Birth Centennial Logo ni Manlilikha ng Bayan Magdalena Gamayo, a nangirubuat met iti rugi ti 100-day countdown iti panangrambak daytoy iti maika-100 a panagkasangayna.
Damo a naiparang ti Birth Centennial Logo idi Mayo 6 iti GAMABA Cultural Center iti Pinili, Ilocos Norte nga ili ni MB Magdalena Gamayo.
Iti nasao a pasken, narugian ti aktibidad babaen ti kararag nga indauluan ni Manlilikha ng Bayan Adelita Romualdo-Bagcal (tubo ti Banna, Ilocos Norte) a sinaruno ti keynote message manipud ken ni Senador Loren Legarda.
Inlawlawag met ni NCCA Chair Victorino Mapa Manalo ti kinapateg ti Birth Centennial Celebration.
TURISMO: Intayon Idiay Ayuyang Garden iti Pila, Siudad ti Laoag!
Nangipaay met iti mensahe ti suporta da Gobernador ti Ilocos Norte Matthew Marcos Manotoc; Pinili Mayor Rommel Labasan; ken Presidential Assistant for Northern Luzon, ASec. Ana Carmela V. Remigio.
Inlawlawag met ni Commissioner Reden S. Ulo, pangulo ti Gawad sa Manlilikha ng Bayan Executive Council, ti ti kaipapanan ti Birth Centennial Logo.
Nangipaay met iti mensahe kalpasanna ni MB Magdalena Gamayo.
Nangnayon iti kinarambak ti pasken ti cultural performances ti Ilocos Norte National High School Tamboreros, ti Tagnawa Dance Troupe, ken ti Northwestern University Saguday Chorale.
Babaen ti pannarabay ti GAMABA Executive Council, idauluan ti NCCA dagiti serye dagiti aktibidad a kas pammadayaw iti idadanon ni MB Magdalena Gamayo iti maika-100 a panagkasangayna.
Panggep dagitoy nga aktibidad nga allukoyen dagiti ubbing ken agtutubo a mangitultuloy koma kadagiti napipintas a kannawidan ti komunidad dagiti Ilokano ken dagiti tawid kultural ti pagilian.
Mairaman dagitoy kadagiti maaramid nga aktibidad: online publicity campaign maipanggep kadagiti mangngabel ti GAMABA Cultural Center ken dagiti estudiante manipud iti Inabel Weaving Training Program babaen ti NCCA Facebook Page iti May 30; pannakaipaima dagiti inabel iti National Museum of the Philippines-Ilocos iti Hunio 24; online lecture, “The Inabel Textile Tradition of Ilocos Region and the Legacy of MB Magdalena Gamayo” iti Hulio 19; ti pannakarambak ti maika-100 a panagkasangayna iti Agosto 13; pannakaileppas ti panagsanay ti 100 nga adalan iti Inabel Weaving Learning Program nga idauluan da MB Magdalena Gamayo ken Dr. Edwin Antonio, ti “SAGUT: 100 Learners for Gamayo’s 100 Culminating Activity” iti Agosto 2024; salip iti panagabel iti sibubukel nga Ilocos Region manipud iti Oktubre 2024 agingga iti Nobiembre 2024; ken Birth Centennial Lecture Series iti sibubukel a pagilian iti panangidaulo ti NCCA maniud iti Oktubre 2024 agingga iti Disiembre 2024.
Maitultuloy ti parambak agingga iti 2025 babaen ti maysa a traveling exhibition, ti “Birth Centennial Exhibit: Life, Works, and the Enduring Legacy of Nana Dalen,” manipud iti Pebrero 2025 agingga iti Mayo 2025, ken ti pannakaigibus ti Birth Centennial Year ken pannakayalnag ti Birth Centennial Coffee Book iti Agosto 13, 2025. (NCCA Public Affairs & Information Office/ Cles B. Rambaud)
