Salaysay ni ROSARIO R. LAMUG
SIPUD kinaubingko, agessemakon nga agbasa iti Bannawag. Magusgustuak ti mapan iti balay da ulitegko a Petronilo ta adu ti Bannawag-da. Isu ti pagin-inanaanna no aggapu iti taltalon. Idin ta napan ballasiw taaw, intultuloyko latta ti nagbasbasa iti Bannawag ta isu ti bilinna, ta adu kano ti maadal iti Bannawag ken makasursuruak a nalaing iti Ilokano.
Malaksid ken ni Uliteg Petronio, ni pay Atty. Guillermo Andaya a kasinsinko ti nanggutgutigot kaniak nga agbasa iti Bannawag. Tunggal sarungkaranna ni nanangko nga ikitna, adda balonna a Bannawag nga itedna a basaenmi nga agina. Ni Atty. Guillermo Andaya ti Literary Editor ti Bannawag idi 1960s.
Iti awan ressatna a panagbasbasak iti Bannawag, inarapaapko met ti agsurat ket inkagumaak a sinursuro dagiti wagas ti umno ken naurnos a panagsurat. Bannawag met laeng ti nagsursuruak, inad-adal ken inam-amirisko dagiti daniw, sarita, salaysay a linaonna agramanen ti grammar ken ortograpia ti Ilokano nga ar-aramaten ti magasin.
Agingga a pinadaskon ti agipatulod kadagiti sinuratko ket adda met dagiti naipablaaken a daniw ken salaysayko. Tapno agtultuloy ti pannakaawatko kadagiti pagalagadan iti panagsuratan, agpatpatulongak met kadagiti gagayyemko a mannurat kadagiti banag a pagkapsutak.
Manipud Kadagiti Agdama a Kameng ti Bannawag: Dios ti Agngina!
Adu met ti nasursurok kadagiti seminar nga ituytuyang ti GUMIL Filipinas nga idadauluan iti agdama ni Apo Ariel S. Tabag. Nagmiembroak ket narubroban pay ti reggetko nga agsurat.
Pagyamyamanak pay ti Bannawag ta kunaek a daytoy ti nangpatibker kaniak nga agsarita iti sanguanan ti adu a tao. Ilokano ti us-usarek nga aglektiur ken mang-seminar kadagiti mannursuro ken estudiante maipanggep iti “Content and Pedadogy For The Mother Tongue.”
Iti daytoy napalabas a Semana Santa, nadutokanak a nangibinglay met iti kapanunotak maipanggep iti maikalima a maudi a balikas ni Apo Hesus a “Mawawak.” Nakasangitak iti ragsakko idi ibagada a nakalawlawag kano ti panangyablatko iti saritak, nga Ilokano ti inusarko imbes nga Ingles wenno Tagalog. Kiniddaw ngamin ni Apo Padi nga Ilokano ti usarenmi tapno nalawlawag. Pudno a mamatiak a ti pagsasao nga Ilokano ti kasasamayan a panangipeksa—no maysaka nga Ilokano—ta no usarem ti bukodmo a pagsasao, ditoymo a marikna ken mapatalgedan ti kinasiasinom.
Iti kaaddak iti Schools Division Office ti Ilocos Norte ti Department of Education (DepEd) a kas Monitoring Supervisor, kiniddawko kadagiti ubbing nga adda iti Maikatlo a Tukad ti panangitugotda iti Bannawag iti pagadalan tapno basaenda ti Siled ti Kararag ken dagiti Sarita ken Daniw a Para Ubbing tapno masursuroda ti natarus a panagbasa ken maipasagepsep kadakuada ti kinapateg ti pagsasao nga Ilokano.
Ita, ap-apitekon dagiti adal a nasursurok iti Bannawag. Agsursuratakon iti libro ngem saanko met a liwliwayan ti agipatulod kadagiti salaysay ken daniwko iti Bannawag ta maipagpannakkelko a kunaen a ti Bannawag ti namagbalin kaniak a mannurat.
Ti umuna a librok ket pinauluak iti “Arapaap: Antolohia Dagiti Salaysay, Daniw, ken Ababa a Sarita.” Nayalnag daytoy iti La Preciosa Restaurant iti Siudad ti Laoag idi Oktubre 14, 2023.
Ti maikadua a librok, ti “Karatay: Antolohia Dagiti Salaysay, Daniw, Pammagbaga ken Pabula” ket nayalnag met iti Shakey’s iti Siudad ti Laoag idi Abril 5, 2024.
Naep-epen ti wawko iti panagsurat ngem saanna kayat a sawen nga isardengkon no di ketdi itultuloyko latta ta nailasagkon ti regget ken essemko nga agbasa iti Bannawag ken agsurat agingga iti kabaelak.
‘Tay kunakon, no ania man ti naragpatko iti lubong ti Literatura, utangko daytoy iti Bannawag.
Wen, makunak a narimaten ti lubongko. Maysa ti Bannawag a nakaited iti rimat kadagiti mata ken kapampanunotak kadagiti nabati pay nga aldawko iti rabaw ti daga.
Ket sapay la koma ta agtultuloy ti naraniag a masakbayan ti Bannawag tapno adda ken agtultuloy met ti pananginspirar ken panangtignayna kadagiti agngayangay nga agbalin a mannurat a nangruna nga agsurat babaen ti kabukbukodanna a nakayanakan a pagsasao.
(Ti Autor: Tubo iti Brgy. 39 Bacarra, Ilocos Norte. Nagturpos iti Divine Word College, Siudad ti Laoag a kas magna cum laude. Nagretiro nga Education Program Supervisor iti Filipino iti Dibision ti Ilocos Norte.)
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
