Naibayogen iti Tropical Cyclone Wind Signal (TCWS) No. 2 ti sumagmamano nga ili iti Luzon gapu iti Bagyo Aghon nga addaanen iti pigsa a 140 kilometers per hour (kph) ken pugso ti angin a 170kph, segun iti Philippine Atmospheric, Geophysical and Astronomical Services Administration (PAGASA).
Nasaripatpatan ti PAGASA ti Bagyo Aghon iti taaw ti Casiguran, Aurora nga agturong iti amianan-amianan a daya iti kapardas a 10 kph.
Itay 8:00 ti agsapa ti Mayo 27, 2024 impakaammo ti PAGASA makarikna iti napipigsa nga angin dagiti ili nga addan iti TCWS No. 2 kas iti abagatan a daya ti Aurora (Dinapigue, Palanan), amianan a paset ti Aurora (Baler, Dipaculao, Dinalungan, Dilasag, Casiguran), ken ti Isla ti Polillo.
Kinuna ti PAGASA a mabalin nga adda storm surge kadagiti nababa a paset dagitoy nga ili.
TURISMO: Intayon Idiay Ayuyang Garden iti Pila, Siudad ti Laoag!
Iti sabali a bangir, imbatad ni Presidente Ferdinand Marcos, Jr. itay Mayo 27 a nasuroken a PhP1.2 a milion ti naipaay a tulong kadagiti naapektaran ti bagyo, idinto nga adda pay nakasagana a PhP3 bilion gatad ti mabalin a maited a tulong.
Segun ken ni Department of Social Welfare and Development (DSWD) Spokesperson Irene Dumlao itay Mayo 26, mapanen a PhP1 a milion a balor ti tulong ti naipaay kadagiti pamilia a naapektaran ti bagyo.
Maibatay iti report ti DSWD Disaster Response and Management Group (DRMG) mapanen a 6,542 dagiti pamilia, wenno 8,200 a tao, ti naapektaran manipud iti 22 a barangay iti rehion ti Bicol, Central Visayas, ken Eastern Visayas.
Kinuna ni Dumlao, nasuroken a PhP972,000 ti balor ti tulong manipud iti DSWD, ken nasurok a PhP316,000 ti tulong a naipaay kadagiti naapektaran nga LGU ti Albay, Camarines Sur, Catanduanes, ken Sorsogon. (Ma. Cristina Arayata/PNA//Lito Hilidon/Bannawag)
