Mabalinen a mangala ti 5,000 a non-teaching personnel ti Department of Education (DepEd), a maaddaan iti sueldo a PhP27,000, kas impakaammo ti Department of Budget and Management (DBM) ita, Mayo 28, 2024.
Inaprobaranen ni DBM Secretary Amenah F. Pangandaman ti pondo a kiddaw ti DepEd maipaay iti pannakaparnuay dagitoy a posision para iti fiscal year 2024.
Segun ken ni Pangandaman, maluktan ti sumagmamano a posision kas iti Administrative Officer (AO) II nga addaan iti Salary Grade (SG) 11 a katukad ti sueldo manipud iti PhP27,000 agingga iti PhP29,075.
Mabalin a maipan dagiti non-teaching personnel kadagiti School Division Office ken pagadalan iti Cordillera Administrative Region, National Capital Region (NCR), Region I agingga iti Region XII, agraman iti CARAGA.
Manipud Kadagiti Agdama a Kameng ti Bannawag: Dios ti Agngina!
Kinuna ni Pangandaman a babaen dagitoy, mapalag-an dagiti mannursuro iti trabahoda ta maikkaten ti administratibo a trabahoda.
Maponduan daytoy babaen ti Miscellaneous Personnel Benefits Fund ti 2024 General Appropriations Act (GAA), idinto nga aggapu iti Automatic Appropriations dagiti Retirement ken Life Insurance Premium. (Chino S. Leyco/Manila Bulletin//Lito Hilidon/Bannawag)
