Pinirmaan ni Presidente Ferdinand Marcos, Jr. itay Mayo 24, 2024 ti Republic Act (RA) 11996, wenno ti "Eddie Garcia Law," a mangsalaknib ken mangilala kadagiti agtrabtrabaho iti industria ti pelikula ken telebision.
Naam-ammo daytoy a kas "Eddie Garcia Law" gapu iti aksidente a napasamak ken Eddie Garcia a gapuanan ti ipapatayna bayat ti panag-shooting.
Segun iti linteg, maipaay kadagiti agtrabtrabaho iti industria ti pelikula ken telebision ti umno a bilang ti oras ti panagtrabaho, sueldo, ken dadduma pay a benepisio a kanaig ti sueldo, social security, dagiti kangrunaan a kasapulan, salun-at ken kinatalged, nasayaat a kasasaad ti pagtrabahuan, ken insurance.
Imandar ti linteg a nasken a maaddaan iti tulag wenno kontrata ti panagtrabaho (employment contract) iti lengguahe a maawatan ti dua a partido, sakbay a mangrugi ti panangipaay iti serbisio.
Manipud Kadagiti Agdama a Kameng ti Bannawag: Dios ti Agngina!
Mayannurot daytoy iti Labor Code of the Philippines wenno Presidential Decree No. 442 kas naamendaran, ken iti Republic Act No. 11058 wenno ti “Act Strengthening Compliance with Occupational Safety and Health Standards and Providing Penalties for Violations” ken dadduma pay a mayaplikar a paglintegan.
Mamulta iti PhP100,000 iti umuna a panaglabsing; PhP200,000 iti maikadua a panaglabsing; ken agingga iti PhP500,000 iti maikatlo ken sumarsaruno pay a panaglabsing.
Segun iti linteg, no maysa a korporasion, kompania, asosasion, wenno partnership ti naglabsing, mamulta dagiti maseknan nga opisial dagitoy, agraman ti executive producer, producer, production manager, ken business unit manager. (Betheena Unite/Manila Bulletin//Lito Hilidon/Bannawag)
