Ni HONOR BLANCO CABIE

Ni HBC no agparaspas iti kataltalonan idi kaub-ubinganna.


Si quieres ser feliz en la vida, cásate con un agricultor

Mannalon Ti Pakiasawaam

1

Mannalon ti pakiasawaam/
Naragsakka 'ti uneg ti balay/
Awan, awan ti utang utang/
Kanen, sida ken dadduma pay...//
--paset ti kankansionen dagiti nararagsak
a mannalon idi dekada 50.

idi narugian ti panagpiesta
nasudi a lugar yan dagiti
mannalon* tawidkot' ragragsakda.

kadayta a piesta 'di salada
nangibuksil dagdagus 'tay kari
nangiladawan 'tay ugalida.

adda sansanna a tumrem 'toy lua
dadduma ta napanen rabii
itan ulilan dagitoy mata.

mannalonak met ngem ubing pay la
nagar-arado ken nagsuyod 'ti
kakellengan tinubuan birhinia.

adda't lagipko 'ti gapuananda
'tay nangitantandudo 'ti puli:
nadekketda 'toy muging ken rikna.

ay! ngem 'ti agdama dadduma ta
agar-aruatak met kurbata – 'ti
riknak ken karkarmak adda latta
lugar nakaikalian 'tay kadkadua.

*iti panagpiesta dagiti kameng ti
upon young farmers organization
'diay pinili, ilocos norte idi kalgaw
ti 1955, adu dagiti impabuya dagiti
agkakalugaran ken agkakabagian,
iti panangidaulo ni dati a serafina
zafaralla. nairaman ditoy a nagsala
ni dati a francisca benavidez,
kasinsin ni serafina. kaduada da
natividad cabie, petronila umadac,
aurelia umadac, bonifacio benavidez,
luis zafaralla, jose umadac, ken
elpidio benavidez.

Dagiti nagsala iti Putritos iti panagpiesta ti Upon 'diay Pinili, Ilocos Norte: (agpanakanawan, nakatakder) Bonifacio Benavidez, Luis Zafaralla, Serafina Zafaralla (ti nangisuro kadakuada iti sala), Jose Umadac, Elpidio Benavidez; (agpakanawan, nakatugaw): Natividad Cabie, Petronila Umadac, Francisca Benavidez, Aurelia Umadac.

2

dekada limapulo, ay! mayat
panangiladladawanda iti
panagar-arem ni lalaki 'ti
mangted matana 'tay panagrimat.
daytoy a sala* ta tuladenna
ni ading a balasang no daytay
ay-aywen 'tay baro, mangmurmuray—

ay! ngem, atanud, ta awan latta.

daytay kunada nga 'agimmamadi
kas man no di' – pagsasao dayta
no ni balasang ta kayatna 'diay
agarem ngem kas man agpakpakni.
idi a panawen ugalida
dayta—kas man agmadmadi, ngem ay!

*sala a putritos, maysa a yas-askaw
dagiti agiinnarem (courtship dance)
idi dekada 50: kunada 'hele, hele pero
quiere' wenno 'agimmamadi kas man
no di (a mayat met).' nagtaud daytoy
a sala manipud tayabas, quezon, insuro
ni serafina zafaralla, maysa a maestra,
idi agpiesta ti upon 'diay pinili, ilocos
norte, idi 1955 kadagiti kalugaran ken
kakasinsinna.

3

agpatpatuboak pay la idit'
muldot 'toy gurongko, ay! ngem addan
'tay gagar ken rugsok kakellengan,
likud ti nuang innak agpalpaltik.
no 'tay italmegkot' tangbaw, ala
ta pudpudo agasug no daytay
manglinteg pasaratsatko sadiay
yan kabkabrong pati pay bakbaka.

panagparaspas ken panagrakem
napadpadasak pay—siasinno ti
mangdua ammok am-amin dagidiay
no 'tay kayasakon 'tay mailaem?
adda numok, diak nga agdirdir-i,
ngem, 'tanudko, ammok manglinglingay.

Daniw
5 a Daniw

5 a Daniw

4

agkakasinsinda mangun-unor
'diay pagnaan, am-amin musiko—
lima—kaubinganda ni honor,
adda simbengda amin, 'tanudko.

duat' de-padila* a makunkuna,
tallo** met de-bokilia, nagmayat
ur-urnosda't dana adda rimat
rikna ken muging guyugoyenda.

panagkukuyogda no rabii
ti piesta ken semana santa, ay!
pati panagitultulod napan
labes bantay isudat' maikari.

panagtokarda ta manglinglingay—
ngem 'diay kaubingan imbatidan.

*justiniano bz (tenor saxophone:
(9.6.1933-6.14.2012) lucas bz
(clarinet: 10.18.1936-8.11.1990).
**william valentin bc (sousaphone:
11.3.1925-dec 30, 1997);
florencio bc (trumpet: 10.9.
1939-jan 12,2018);
hbc

5

awan paset bagi di agkuti
manipud tuktok ulo agpababa,
iti kutida adda daytay kari.

iti aglawlawna agbusbusi
redoblante piangpiang kumamatda,
im-imana pulos di maipakni.

agkakamakamda nga agdir-i
iti pardas panangpatpatitna
kadagiti piangpiang napnuan kari.

adda kumpas pamay-anna madi
pulos agannawir im-imana,
atanudko, awan 'tay kamali.

mayat panagdadanggayda iti
napardas a tokar, 'tay musika
adda 'ti isem ken panaglibbi.

teltel ken timid, 'diay kilikili
danggayandat' garaw 'diay patongna,
'diay bugit' gurong ken saksakana
kasla mangar-arawan piskeria.

Ni Nicx, maysa a drummer, tubo 'diay Bandung, Indonesia.

6

mawagwag amin 'diay barukongna
iti pardas panangpatpatit 'diay
redoblante ken piangpiang sangona.

manipud ulo nga agpababa
garawda ta pudno manglinglingay,
umanges pay 'diay padingpadingna.

pus-ong ken 'diay ka'rrubana a ta
panagdanggayda ta mangmurmuray,
sagutanda't rugso 'diay karkarma.

'diay patongna maital-otal-o ta
kumamat nota nga agtartaray,
ay! ngem panagkabsut awan dayta.

panangiggem pagpatitpatitna
kinairut rikna ta maitag-ay,
kasla agginggineden 'toy daga.

ket no adda maitulongko koma
ay! siakon 'diay pagtugawanna 'diay:
kaduaek a mangkamat notada
nga addaan kompas ken rimana.

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!