Nagballaag ti Philippine Institute of Volcanology and Seismology (Phivolcs) ti pangta ti panagayus ti lahar manipud iti Bulkan Kanlaon iti Negros Island itay Hunio 5, 2024.
Maibatay iti pakaammmo ti Philippine Atmospheric, Geophysical, and Astronomical Services Administration (PAGASA) para iti Hunio 6 ken 7, a manamnama ti napigsa a tudo (agarup 100 ken 200 milimetro) iti Negros Island iti las-ud ti dua nga aldaw.
Gapu itoy, kinuna ti Phivolcs a mabalin malayus, magaburan, wenno mayanud dagiti madalapus ti agayus a lahar iti karayan ken nababa a lugar iti lauden ti Kanlaon.
Kinuna ti Phivolcs nga itay Mierkoles (Hunio 5), nagayus ti lahar iti uppat a pagayusan ti danum: manipud iti Tamburong Creek, nagturong iti Biak-na-Bato ken Calapnagan iti La Castellana; Karayan Intiguiwan iti Guinpanaan ken iti Baji-Baji Falls iti Cabacungan, La Castellana; Padudusan Falls iti Masulog, Siudad ti Canlaon; ken Binalbagan River iti lauden ti Bulkan Kanlaon.
Renee Co, 1st Nominee ti Kabataan Party-list
Awan pay ti naireport a nadangran iti panagayus ti lahar, ngem impakdaar ti Phivolcs iti publiko nga agridamda no kasta nga agtudo iti napigsa.
Awan pay ti naipaulog nga evacuation order manipud iti gobierno lokal ti Canlaon, idinto a wanwanawananda ti kasasaad ti bulkan. (Ellalyn De Vera-Ruiz/Manila Bulletin//Lito Hilidon/Bannawag)
