Autobiograpia ni LORENZO G. TABIN

Maika-16 a Paset

LABUT 2, 1966-

NO MANEN, BASAEK ti kablaaw ni Samar. Ammoyon, a, no agdadamoka a makablaawan, arigmo ti agraraman a kasla di mapnek ket dika mauma a mangdilpadilpat kadagita bibigmo.

       Im-imasek ti agar-arapaap idi aglulua daydi Anti Tacing nga immasideg. Adda iggemna a  telegrama manipud idiay Abbarit.

       Agawidka. Tatangmo. Natayen!

       Simgarak iti naammuak.

       Ni Lelong Iroy, natayen? Kaano la daydi naudi a panagtungtungtongmi idiay Evangelista? Nakakilkilnet ti ayek-ekna idi a manarsarita. Naisupsupadi ti ragsakna, maigidiat unay iti kasla panagpagpaguyodna iti bulo idi idiay Bantay Baybayabas bayat ti panagtirtiritirna iti lapnit ti saluyot a talienna. Daydi kasla kanayon nga agsussusuon iti impierno bayat ti panagas-asug daydi Lelang Andiang idiay sagumbi. Nakarimrimat dagiti mata daydi Lelong Iroy a nangiwarwaras iti panagkitana iti aglawlaw iti siudad ti Manila bayat ti kaaddami iti tuktok ti pasdek daydi Mister Ruperto Villongco, sa daydi pannakaisagud ti panagkitana iti tuktok ti simbaan ti Quiapo. Malagipko latta daydi panangitudtudok iti balitok a relo, daydi Ceba a kayatko a gatangen idiay P. Paterno; kasla nakaparpartak ti panagtulid ti panawen, mangmangngegko ti nakapsut a tanektek daydi a relo idi addan iti pungupunguak.

       Wen gayam, nagatangko daydi a relo, a balitok ken agbennat ti kerelna, iti lima a pisos—naliplipatak gayam nga inag-agapad a dakkel ti naitulongna kadagidi panawen a panagkamkamatko iti oras no mapanak agbasa, ken no adda pagdardarasak a papanan; inadipennak daydi a relo, diak la nasasao.

       Ket wen, ti ipupusay daydi Lelong Iroy, nakaipaay iti adu a nagbalbaliwan, wenno pannagna ti biagmi iti daydi Anti Tacing.

       Saan a pinawilan dagidi de la Costa nga agawid daydi ikit; dinagdagda pay ketdi, ken pangwadwaden ti indonarda para iti pannakaitabon daydi Lelong Iroy.

       Nupay pinagawidda daydi Insan Itok idi makaruar iti pagbaludan gapu iti nagbasolanna, binigbigda ketdi ti napudno a panagpaay daydi Anti Tacing kadakuada. Siak, awan nasaoda, ta didak met sinusuelduan. Siak ketdi ti agyaman kadakuada ta pinagyandak iti sidongda bayat ti panagadalko idiay FEU. Isu a didak pinawilan idi imbagak nga agawidak met.

       Isu a dudua ti katulonganda a nabati, daydi babai a kabagianmi a taga-Lapog—talaga a diak malagipen ti naganna, ngem malagipko man ketdi ita nga iti naminsan a panagsarsaritada iti daydi Anti Tacing, naagapadda ti maipanggep iti binulan a panagsangailida a babbai: pulos kano a di napadasan daydi a kabagianmi ti nagsangaili... Daydi napudno met a drayberda ti maikadua.

       Awan imbatik a gamigamko, a kasla nagparikna a saanakon nga agsubli iti 521 Shaw Boulevard, Mandaluyong, Rizal. Ti kadakkelan a kamtudko, isu ti diak panagpakada idiay FEU; pimmanawak lattan a di nangibati iti oy wenno ay.

       Ti diak nalipatan nga intugot, isu daydi Standard a Remington a makinilia ta kadagidi a panawen isu ti maysa a kapatgan a paset ti biagko kas apagsulbod a mannurat.

DIAKON NADANON idiay Labut daydi nanang, ken ti buridekmi. Kasta met daydi Anti Immiang ken dagiti annakna malaksid ni Myrna nga agbasbasadan sa ketdi idin idiay Cabugao Institute kada Herman ken daydin sa Tessie, ken Violy no diak mariro. Napanda amin idiay Abbarit—Abbarit latta ti malaglagipko nupay nalatak itan ti Guimud Sur nga akin-sitio, segun ken ni Danilo A. Bautista.

       Diak pay nakain-inana no ar-arigen, nagpakadaakon iti daydi tatang ta innak met makiminatay, kas kangrunaan a gagemko iti panagawidko. Impambar daydi tatang a di nakapan ta awan ti agbantay iti balay.

       Adda salamagi iti sungaban ti dasdas nga aggapu iti kalsada iti amianan. Adda pay la iti mawidawidan iti kanigid daydi urno wenno pugon iti amianan ti bubon a linakub ti bua.

       Addaak pay la iti sidiran ti urno, mangngegkon dagiti agdudung-aw. Makapaseggar ti agpangato-agpababa nga ayug ti dung-aw, a nakaad-adu ti idawdawatda, a diak maaw-awatan idi damo.

       Naitukeng ti amin idi mapasungadandak. Kaaduanna ti nakamangisit, wenno nakapanes. Nakapanes amin dagiti kameng ti pamilia ti pimmusay.

       Idi nakitadak a di nakamangisit wenno nagpanes, sinabatdak a dagus ket imbagada a masapul a nakamangisitak. Adda nagsisapul iti nangisit a para kaniak.

       Nadlawko idi agangay nga am-ammimian dagiti annak wenno kakabsat ti pimmusay ti pingir ti nangisit a dalungdongda. Daydi Lelang Andiang, nakalidliday a kasla lumlumnek iti kabassitna iti asideg ti uluanan daydi Lelong Iroy. Diak maitugotan ti uray sangkabassit a panagduadua iti rupana; kas man la nalipatannan a namimpinsan daydi di nasayaat a panangtrato kenkuana ti pimmusay a kapisina. Napakawannan, kasdi ti panagriknak. Wenno asawa la a talaga ti asawa.

       Nagaabay dagidi nanang, Anti Tacing, Angkel Aling, ken Anti Immiang iti maysa a bangko nga immurnos iti nakaimassayagan daydi Lelong Iroy. Agpapadada a nalabaga dagiti matada ken sagpaminsanda nga agsaninglot.

       Adda met daydi Insan Erwin nga Awweng ti naganna iti ngarab ti tayab, saan nga iti sirok ti latok, kas nasaokon. Nalawag ti rupa daydi Insan Awweng ngem ammok a tiptipdenna ti irurukuas ti ragsakna a nakakita kaniak. Daydi Insan Warlito nga Itok ti naganna iti ngarab ti tayab ti awan ta di kano makaruk-at iti nakaibaudanna idiay Camalaniugan.

       Idi kumitaak iti ruar, nadlawko ti ummong dagiti agsusugal iti sirok ti dakkel a sua iti daya.

       Inabayko daydi Angkel Aling idi maikkanak iti gundaway. Nadlawko ti kinatalna ti tigtignayna.

       “Awanen ni lelongmo, Ayong,” napalting ti lapayagko iti nakaaw-aweng nga Ayong. “Pinanawannatayon!”

       Nasdaawak, nalimpion sa ketdin?

       “Wen ngarud, angkel,” kinitak ti balitok a Ceba iti pungupunguak. “Di la mamin-ano ti panawen.”

       Ket sinaritak ti panagpatpatangmi iti daydi Lelong Iroy idiay Kalye Evangelista.

       Komustaek koma ti kasasaadna ngem naalak ti nagduadua; amangan la ketdi no adda masagidko a pakakuldingan ti riknana. Gagangay laengen ti nagsarsaritaanmi, a sangkasirigko ti balitok a Ceba iti pungupunguak; no anian ti oras.

       “Napintas dayta relom...”

       “Wen, angkel, pakalaglagipak iti bayad daydi immuna a daniwko.” Kitaem man a talaga. Ita la a maagapadko a nagtaud iti bayad daydi daniwko ti inggatangko. Isu a ‘tay kunakon... Aglibtalibtaw no kua ti lagip, pagammuan lattan ta malagipmo ti paset ti biagmo a nalipatam! “Komusta ti birhinia itan, angkel?” imbaliwko ti saritaan.

       “Adu ti bimmaknangen... ngem saanak unay a makatultulong.”

       “Makipagladingitak iti panagpasinayo,” kinuna ti maysa a kabagianmi nga immasideg. “Mayat sa man ti saritaanyo nga aguliteg?” 

       “Kasarsaritak ngarud ni angkel, tata,” kinunak. Nadlawko nga immatap dagiti mata daydi Angkel Aling.

        “Napatangam ti kinalimpiona,” inkissiim ti kabagianmi idi mailikud daydi Angkel Aling.

       Iti sardam, immadu dagiti agaayam iti innipis iti ruar. Kunada, pangurnonganda iti yabuloyda iti nagminatay.

       Nadlawko daydi Angkel Aling a sumrek-rummuar iti kadaklan. Idi kuan, nagtugaw iti suli nga agtantanamitim. Diak maawatan dagiti sasawenna.

       “Kastana no sumro,” kinuna daydi Lelang Andiang idi makasaritak. “Kaasi ‘ta ulitegmo, apok. Kasta lattan manipud idi napaay ken ni Caring. Nasayaat no makasayaat ngem no agpakaro... kasta, tanamitim a tanamitim. Pagpiaanna ketdi, saannakon a bugbugkawan a kasla aso ken dina ina, a kas idi addatayo pay idiay Surong.”

       Nagpalabasda iti tallo nga aldaw sakbay nga impumponda daydi Lelong Iroy—Cirilo Urmeneta Garcia. Iti unos dayta a panawen, saan a nagsardeng dagidi nagsusugal tapno kano makaurnongda iti abuloy.

       Inkalikagumko ti bagik a makipagbagkat iti daydi lelong ngem awan kadagiti asideg a kabagian ti pimmusay ti napalubosan nga uray mangsagid laeng iti assiw wenno iti lungon daydi lelong. Mabiit kano no kua a sumurot iti pimmusay!

       Idiay sementerio ti San Isidro ti nakaitaneman daydi lelong.

       Inuray pay daydi nanang ti maikasiam daydi lelong sakbay a nagawid idiay Labut. Diak inuray ta nasken a sanguek a suraten ti maikatlo iti trilohia a biag ni Pupoy, ti "Agus." Daydi Anti Immiang ken dagiti kinakuyogna nga annak ti saanen a nagsubli idiay Labut.

       Ngem daytoy ti kunak itay a dakkel a biddutko. Dua a lawas a limmanganak iti klasek idiay FEU ket nagbainakon a nagsubli.

       Isu a dropped amin idi ti gradok!

SINURATAK A DAGUS ni Samar idi nakaawidak idiay Labut. Daclapan Sur, Cabugao, Ilocos Sur ti inlanadko nga adres. Napetsaan iti Septiembre 27, 1966.

       ...kas makitam iti adresko iti ngato, addaakon ditoy probinsia. Ti inlanadko a petsa isu pay laeng ti pannakaawatko iti suratmo nga imbusonda idiay Shaw Boulevard.

       Imbagak nga addaak iti probinsia a pangsangsanguak iti "Agus." Kasta unay latta ti panangannadko iti ibbatak a balikas. Kasta unay a sabsabongna! No intuloyna ti nangdaydayaw kaniak, kasta met kaniak kenkuana. Ngem no palpalabasak ita dagidi sursuratmi, maalep-ep man ketdi dagiti sikor a kasla di mamingga a mangsinsintir iti espiritu.

       Sinungbatan ken inlawlawagko amin a ngatangatana iti suratna. A no naawatko koma ti kunana a suratna, nalabit nga idi pay laeng ket nagam-ammokami koman. Kasta met  nga inannugotko a ti Gen S iti suratko isu daydi Genaro R. Sumaoang.

       Naiparipiripko ti dakkel a karit a sangsanguek kadagidi a panawen. Diak inagapad ti pettat a panagsardengko nga agadal. Diak nasagid ti pampanunotek a nalabit a pannakaputed ti taliwanay a mamagsilpo iti agdama ken ti masakbayan. Kasano a matungpal amin nga arapaapko?

       Nangruna la ngaruden idi nagsubli daydi Anti Tacing idiay Shaw Boulevard—panggepko koma idi ti agsubli met ta bareng no mabaliwak a planuen ti baro a pagrubuatan. Ngem saanen a nagbayag daydi Anti Tacing ta pettat ti ipupusay dagidi agassawa a de la Costa. Kapilitan a nagawid daydi Anti Tacing idiay Abbarit, nga awanen ti sinnublian.

       Panagriknak idi, naspaken a namimpinsan ti rayaraya! Kasano pay a makasubliak idiay Manila?

       Awanen ti pakidagusak!

GAPU ITI PANNAKAKUMIKOMKO kadagiti sursuratek, nga isamsamirak iti sagpaminsan a panangsarsarungkarko iti kadilian ken tangrib, a sinubliak manipud idi naggapuak idiay Manila, diak naimanmano ti panaglabas ti panawen. Kadagiti suransuratmi ken ni Samar, agpadpadakami a mangipekpeksa kadagiti dagensenmi. Dandani idin agsabat ti lubongmi!

       Immuna nga intinnag ti langit ti ipupusay daydi Angkel Aling. Segun iti damag, natalna kano kadagiti naudi nga aldawna. Saanen a nagtantanamitim. Kas man la nalipatannan a namimpinsan daydi dayag a nangrebba iti lubongna. Kasta unay kano ti panangigingginana iti daydi Lelang Andiang kadagidi naudi nga aldawna. No mabalin dina kano payen kayat nga aggunay ti inana. Nagbalbaliw a namimpinsan.

       Saanak a nakapan nakiminatay. Maysa pay, apagbiit la ti panangimassayagda iti bangkayna. Dida pinagpuyatan. Awan sugsugal.

       Intabonda lattan. Iti met ketdi abay ti tanem daydi Lelong Iroy, a.

       Gapu ta diak ida nakadendenna iti kaaddada idiay Abbarit, dagiti laeng ladawanda idiay Baybayabas wenno Surong ti agparparang iti mugingko tunggal malagipko ida. Daydi lelong nga agtirtiritir iti lapnit ti saluyot. Daydi Angkel Aling a mangmangngegko ti nasam-it a sagawisiwna a "Mona Lisa" no sumungad iti sumipnget iti agdaldalluyon a kapan-awan iti laud a pingir ti homsted daydi lelong. No awanen dagiti tao nga impateg ken/wenno kinasimronmo bayat ti pannakipulapolmo kadakuada, isu pay laeng ti pannakaamirismo iti pudno a kinasiasino ken ti kaimudinganda iti daytoy a lubong. Taoda met a kas kadatayo, ket kas kadatayo adda met pagkuranganda; ngem annak met ida ti Mannakabalin.

       Mainaig iti daytoy a pasamak, kitaenyo daytoy sumaruno a paset ti laglagipko. Nalabit a ngumato ti kidayyo: Apay daytoy? Iti pannakalagipko i'toy, kunak man a pakpakauna daytoy ti isusurotmi ken ni Samar iti maysa a pammati.

       Ney, saanak a mangaskasaba! Ngem makitak man ita dagiti nagkaadu nga agsisimparat a mangitangtangad iti langitda. Daytoy ti nalinteg a dalan, umaykayo, sumurotkayo, no kalikagumanyo ti maisalakan, no arapaapyo ti makasaklang iti Trono a Kangatuan!                

       Malagipko laeng, diak matandaanan no naipaspasagidko idin daytoy, ngem no bilang ta nangngegyo idin kaniak, bay-anyo ta ulitek.... nga iti panagul-ulimek daydi tatang, iti baet ti panangtingigna kadagidi immuna a nangitangad kenkuana iti awitda kano a langit, daydi pay maysa nga agnagan iti Apo Osi—diak sigurado no dayta ti pudno a naganna—a di masinunuo no naggapgapuan wenno nagtataudanna a suli ti lubong, ti nakaisagudan dagiti natinggaw ken napili a mata daydi nadungngo a tatang.

       Diak ammo no kasano, ngem in-inut met la a nalukaisan ti lugar a nagbukaran daydi Apo Osi. Maysa kano a suli ti Tarlac. Ket iti panagallaallana, natiliwko ti bugas ti balikasna idi agangay, nga ab-abogen kano ti timek ti Mannakabalin: ‘Magnaka, ala, magnaka, ket irakurakmo ti balikasko!’

       Ket pagammuan lattan ta bimtak ti lawagna idiay Caronuan, a maysa a sitio wenno barangay ti Lapog iti deppaarna ti daya, a nagkunaanna:

       ‘Umaykayo, annakko, timudenyo ti timek ti Amayo a nagtaud sadi langit...’

       Ngem kuidaw, manmano ti nagasat a makasango kenkuana, a makapagmano wenno makalang-ab man la koma iti nabirtud nga asepna! Ta adda latta iti kuarto wenno sagumbi, a pakisarsaritaanna kano iti Apo! Nga umaw-awatanna iti nabirbirtud pay a bilin nga agtaud iti Langit!

       Ket nasaksiak ti maysa a karkarna a pasamak.

       Adda idi napuskol a pinuon ti kawayan. Nangngeg, ken nasaksiak, nga adda mapaspasamak a karkarna kadagiti kawayan.

       “No mamatikayo, makitayo kadagiti puon ti kawayan dagiti ladawan... a pagilasinan. Ngem no awan ti pammatiyo, agdawatkayo iti Mannakabalin,” kuna kano daydi Apo Osi. “Dagidiay dagiti marka a mangipaneknek iti kinamannakabalin ti Apo!”

       Napanak met, a, nakipagsapsapul kadagiti nasantuan a ladawan! Narigaten, amangan no maikapisak kadagiti nasantuan a parabur.

       Ti nakitak?

       Gaddil dagiti pinuon gapu ngata iti panagririnnidiridda no agangin iti napigsa. Dagidiay ngata ti kunkunana a ladawan? Wenno saanak a maikari a makakita? Dakayon ti mangeddeng.

       Ket denggenyo pay, kasla ang-angaw ngem pudno. Natulnog dagiti pastorana, a kunam no naamo a karnero, a naannad a sumrek-rummuar iti lugar nga umaw-awatanna iti bilin! Idinto nga iti ruar, iti paraangan, pumuspuskol dagiti nakanganga a tattao, nga agur-uray iti milagro.

       Agsubliak iti daydi tatang. Diak naimanmano, ngem pagammuan lattan ta nadamagko a nakadanonen daydi Apo Osi iti balay daydi Angkel Laur iti sitio a nagbaetan ti Labut ken Sabang.

       Sadiay, inawisnak daydi tatang a mapan dumngeg kadagiti nabirtud a balikas daydi nakaskasdaaw a tao ti Dios. Adda sumagmamano a kaduana a naggapu idiay Caronuan, a pakairamanan dagiti natudio a pastorana. Adda met ngata sumurok-kumurang, wenno sumagsangapulo a tattao a napan nakius-usiuso. A pakaibilanganmi iti daydi tatang. 

       Ti immuna a nadlawko, sakbay a rugianna ti mangasaba, adda nasantuan kano a kanta a panglukatda, sada pasarunuan iti kararag... Denggenyo, Ilokano a nasantuan a kanta.

       Sadiay ti nakaam-ammuan daydi tatang iti daydi Tata Ayong, a kanagnaganko iti ngarab ti tayab. Kadua daydi Tata Ayong ti asawana, ken ti balasangna nga agtawen sa la idi iti sangapulo-ket-pito. Sepa ti naganna; in-inaunaak ngem isu. Isu kano ti puon ti nakapasurotan dagidi Tata Ayong. Nagkammaulaw kano idi ni Sepa ket naagasan ni Apo Osi.

       Wen gayam, nalipatak, dayta ti batombalani daydi nasayaat a tao.

       Panagsapsapo nga adda kakuyogna a minimini... ti pangawisna kadagiti tao nga agtulnog iti balikas ti Apo.

       Diak ammo no kasano idin, ngem nasirpat daydi Angkel Poling ni Sepa. Ket napasamak ti naindaklan a milagro! Nagtugmok ti dalanda. Ngem sakbay dayta, malagipko, naistoriak sa idin, ket ipalagipko laeng, nga immuna a nakaludon daydi Angkel Poling daydi Francing a kabsat daydi Anti Taling nga asawa daydi Angkel Romeo—natikawkayon? Naputotanna daydi Francing ngem diak ammo ti pannakapasamak ti sabali pay a milagro. Nagsina ni Poling ken Francing, a nabati iti daydi ulitegko ti putotna a lalaki, ket sinublat daydi Lelong Roque daydi immuna a babai iti biag ti maysa nga ulitegko.

       Isu a maikadua ni Sepa...

       Ah, malagipko, sinarsarigsigan kano met daydi Angkel Poling daydi Anti Immiang idi balasitang pay ti ikitko ngem saan a nagsabat ti gasatda. 

       Nagangayanna, idi lumpaag ti uramda, napan met nagbalay dagidi Tata Ayong iti laud ti balay daydi Angkel Romeo iti asideg ti bubon a saksi ti adu a pasamak—makadanontayonto iti dayta.

       Saan a dita ti naggibusan ti pakasaritaan daydi Apo Osi. Idi nagsubli ti grupona idiay Caronuan, nadamagko laengen a nagbalinen a miembro ti grupona daydi Anti Tacing.

       Kasano? Diak ammo. Nagbalin a natulnog daydi ikit, ket din sa kanon simminsina iti grupo daydi Apo Osi.

ADU DAGITI PAGTENG a di namnamaen a dumteng. Dumtengda iti panawen a dimo mapakpakadaan. Apay nga ita, ken apay a napasamak? Ania a pakasapulan? Ania ti kaimudinganna iti biag a paggargarawan? Dimtengda kadi gapu ta kasapulan? Iti ania? Lasag? Kaamaan? Wenno dimteng nga inkapilitan; a di nagay-ayatan?

       Daydi Anti Immiang ti dakkel a pagarigan.

       Pagammuan laengen ta simgiab ti siddaawko idi nadamagko a naikkaten ti Cacananta a silpo ti nagan daydi ikit. Nasukatanen iti Saliganan.

       Apay? Masapulna ngata ti katulonganna a mangpatan-ay kadagiti annakna? Adda kadi idin makatawenda idiay Abbarit?

       Kasano?

       Diak malagip nga adda kinasadarak idi a Tony idiay Abbarit. Adda maysa a Tony, ngem Antonio Oandasan, a kabagianmi, ken nakatrabahuak iti pagablan idiay Manggahan, Pasig. Ngem daytoy Saliganan? Awan malagipko.

       Ngem napasamak a kasta. Diak nakasarsaritan daydi Anti Immiang ta mabalin a saludsodek koma. Saanakon a nakasarungkar idiay Abbarit iti nabayag a panawen—daydi laengen isasarungkarko iti lugar a yan ti pakak, a nakaipasngayak kalpasan ti adu a panawen.

       Ngem ituloytayo daytoy a paset ti panagdaliasat ‘toy numo.

AGMAKMAKINILIAAK ITI DAYDI nasapa a malem; diak malagip no yan idi da Herman, ken dadduma a kakabsatko. Naisardengko ti ar-aramidek idi adda natan-awak a bassit a baket a manguddakudday a magmagna. Nagbitbit iti binakol a bay-on.

       Nalasinko daydi Lelang Andiang!

       Dimmalagudogak iti agdan  a simmabat kenkuana. Luminlinab ti kinelleng a pingpingna.

       “Apay, lelang?” Nagmanoak. Sinublatko ti bitbitna.

       Saan a simmungbat. Kimpet iti takiagko. Inatibayko a kimmamang iti agdan. Nagtugaw iti umuna a tukad ti agdan. Pinukkawak daydi nanang nga adda iti kosina.

       “Nagnagnakayo, lelang?”

       Saan a simmungbat. Impunasna ti dalungdongna iti rupana.

       “Ania’t naknakanyo nga immay iti kastoy a nagpudot?” kinuna daydi nanang a nagdardaras nga immasideg. “Apay nga immaykayo?”

       Timmakder daydi lelang ket naginnarakupda iti daydi nanang.

       “Mailiwak unayen kadakayo, nakkong!” tiptipdenna ti saibbekna.

       Inatibay daydi nanang daydi lelang nga inturong iti kosina.

       “Aniat’ kinagurayo idiay?”

       Lua laeng ti insungbat daydi lelang.

       “Kasano a nakadanonkayo ditoy?”

       “Nagta-layak, anakko...” nakapsut ti timekna, nakadumog a mangpirpirit iti gayadan ti kimonana.

       “Pinagpagnam, lelang?” narigatko a patien.

       Nagtung-ed.

       Mariakosina! Pinagpagnana ti nagbaetan ti Abbarit ken Labut? Agasem! Manipud Abbarit... sa Bacsil, Cabugao, Ruaran, Labut... mano a kilometro daytan?

       “Ania metten,” ket naluyaan daydi nanang.

       Kinablaawan laeng daydi tatang daydi lelang idi makitana. Nagdardaras a pimmanaw ta adda kano pakaringgoranna.

       No malagipko dagidi a panawen, nasanay dagidi tattao nga agta-lay. Pagarigan no agud-udong daydi lelang manipud idiay Bantay Baybayabas wenno Surong agingga idiay poblasion ti Magsingal... agalabuelta apaman a maimarona ti inyudongna, ken magatangna dagiti kasapulanda idiay Surong... Idiligmo ita a panawen ti... no ania man a panawen... maysa nga addang la no lalausen ti manao, nakakotseka pay, a kasla ketdin dinaka pinaraburan ti Mannakabalin iti saka nga ipagnam. Agalem ti sangkabassit a dilpat ti darang ti init iti rupam. Duoy dagiti tattao itan!

       Maysa a banag ti kangrunaan a pakalaglagipak iti yaay daydi Lelang Andiang. Inasitgannak iti pagmakmakiniliaak. Binuybuyanak, nga adda immammingaw nga isem kadagiti kirriit a bibigna. Makitkitak pay laeng ti bituen kadagiti naasi a matana. Inarikapna ti nagbaetan ti kimona ken pandilingna. Adda inruarna a nasiglot a nangisit a panio.

       Malagipko la unay. Inukradna ti nakupinkupin a nakusnaw a derosas a salapi a dua nga apagkatlo ti gagangay a papel de banko ti kadakkel wenno kabassitna. Kinupinna met laeng, sana inyawat kaniak.

       “Pakalaglagipam kaniak, apok,” kinunana, a nakalawlawag ti rupana.

       “Saan, lelang...” 

       “Pakalaglagipam,” inulitna.

       Kasano ngatan ti kabayag nga inim-imluyanna daydi a salapi?

       Naggudengak nga immawat.

       Kinunak: “Idulinko daytoy salapim, lelang... sika daytoy..!”

       Inarakupnak iti likudak. Nalang-abko ti asep ti nadungngo nga ina.

       Agasem ti kaadu dagidi a pasamak? Nagdadarisonda iti adu a gundaway, iti adu a panawen, iti adu a lugar.

       Makapatunglab a panunoten.

       Ngem adu pay ti nasken a maammuanyo; ituloyyo...

(Maituloyto)

Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!