Pormal a paayaban ti House Committee on Human Rights ni dati a presidente Rodrigo Duterte ken ni Senador Ronald "Bato" dela Rosa iti sumaruno a pannakabista dagiti extrajudicial killing (EJK) a napasamak kano idi inwayat ti naglabas nga administrasion ti war on drugs.
Daytoy ti kinuna ni Committee Chairman ken Diputado ti Manila 6th District Bienvenido "Benny" Abante Jr. iti naaramid a hearing ita, Hunio 25, 2024.
Dinengngeg dagiti kameng ti komite ti salaysay dagiti kabagian dagiti 26 a tao a napapatay iti "one-time, big-time" nga operasion kontra iti droga, nangruna iti Caloocan City ken Cebu, idi panawen ni Duterte.
Gapu itoy, inmosion ni Gabriela Party-list Dip. Arlene Brosas nga ayabanda da Duterte ken Dela Rosa inton sumaruno a hearing.
Mangnamnama ni Marcos iti pannakaisubli ti panangipateg ni Pinoy iti arte a Filipino
Segun ken ni Abante, dagiti nangngegna a testimonia ti pamilia dagiti biktima ti drug war ni Duterte, nangruna ti nakas-ang a pannakapapatayda, ti nangtukay iti riknana a paayaban da Duterte ken Dela Rosa. (Ellson Quismorio/Manila Bulletin//Lito Hilidon/Bannawag)
