MOST OUTSTANDING PROJECT MONITOR ITI REHION UNO. Iti maikadua nga agsaruno a tawen, inyalat ti gobierno probinsial ti Ilocos Sur ti pammadayaw a Dayaw ti Agimanman-Saririt Award kas panangbigbig ti Regional Development Council (RDC) 1 ken Regional Project Monitoring Committee (RPMC) iti napintas a panang-monitor ken panangsiput ti gobierno probinsial ti Ilocos Sur kadagiti mayim-implementar a proyekto iti nadumaduma a paset ti probinsia. Iti akinngato a ladawan, inawat da Gobernador Jeremias “Jerry” Singson (tengnga), kaduana da Project Evaluation Officer III Rolando Quibilan (kanigid) ken OIC Provincial Engineer Leonard Pascua, ti Plake ti Pammigbig bayat ti RDC-1 Awards idi Hunio 28, 2024 iti Hotel Ariana idiay Bauang, La Union. Iti maikadua a ladawan, mismo a da RDC-1 Chairman ken Ilocos Norte Governor Matthew Marcos Manotoc (maikadua manipud kanawan), NEDA Regional Director Stephanie Christiansen (kakanigidan) ken dagiti kameng ti RPMC ti nangyawat iti pammadayaw. Inyalat ti Ilocos Sur ti isu met laeng a pammadayaw itay napan a tawen. (Mancielito S. Tacadena)
