Ni Senador Juan Edgardo “Sonny” Angara ti baro a Secretary ti Department of Education (DepEd) a dinutokan ni Presidente Ferdinand R. Marcos Jr itay Hulio 2, 2024.

Ni Sen. Angara ti suno ni Bise-Presidente Sara Duterte a naglusulos iti akemna idi Hunio 19.

Segun iti Malakanyang, naipakaammo ti pannakadutok ni Angara iti panagtataripnong dagiti kameng ti gabinete, ket inawat ni Angara ti akem.

Naturpos ni Angara ti Master of Laws iti Harvard University, Bachelor of Laws iti University of the Philippines, ken Bachelor of Science in Economics iti London School of Economics, ket kinuna ti Malakanyang a daytoy ti nangitunda ken ni Angara a mangidaulo iti DepEd.

Malaksid iti daytoy, nasaknapen ti padas ni Angara iti panagpanday iti linteg bayat ti panagpaayna a Senador sipud idi 2013.

Ni Angara ti nangbukel iti Universal Access to Quality Tertiary Education Act ken iti Enhanced Basic Education Act of 2013 (K-12).

Dagiti grupo a Coordinating Council of Private Educational Associations (COCOPEA) ken ti Philippine Association of Colleges and Universities (PACU) ti nangilungalong iti pannakadutok ni Angara.

Inyebkas ni DepEd Undersecretary Michael Poa ti pananginanamana a mapasayaat ti kalidad ti edukasion babaen ti panangidaulo ni Angara.

Mangrugi ni Angara iti baro nga akemna inton Hulio 19. (Betheena Unite/Manila Bulletin//Lito Hilidon/Bannawag)