Inaprobaran ni Presidente Ferdinand R. Marcos Jr. (PBBM) itay Hulio 2, 2024 ti singasing a badiet ti pagilian wenno National Expenditure Program (NEP) para iti 2025, nga aggatad iti PhP6.352 a trilion.

Impresentar ni Department of Budget and Management (DBM) Secretary Amenah Pangandaman ti gakat a nailian a badiet iti maika-17 a Cabinet Meeting a naangay iti Malakanyang.

Kinuna ni Presidente Marcos a naiparang iti 2025 NEP dagiti ipangpangruna ti administrasion.

Dagiti sektor a naipayaan iti kadakkelan a badiet ket ti edukasion, para iti publiko a patakder, salun-at, interior and local government, ken depensa.

Nairaman iti prioridad ti gobierno ti social welfare, agrikultura, transportasion, hudikatura, ken sektor ti hustisia.

Ti NEP ti pagibasaran ti Kongreso iti aramidenda a General Appropriations Bill (GAB), a no maaprobaran ket agbalin a General Appropriations Act, linteg a mangilanad iti pinal a badiet para kadagiti amin nga ahensia ti gobierno. (Betheena Unite/Manila Bulletin//Lito Hilidon/Bannawag)