Ni HONOR BLANCO CABIE

1

magustuannat' agilad-ilad 'diay
sofa nagtugawan dakkelko 'di
adda pay la 'ti abayko, idi
saan pay a napan labes bantay.
kas man isu daytay malinglingay,
kas man mariknana 'tay naisipi,
panagpanunot ti amak a naipakni
barbareng no isu 'tay maitag-ay.
salaysayko maipanggep 'ti amak
kinurkuribot, naibigao pay,
sandag ti ima't nagtugtugawan
sagidsagidenna – tumrem 'toy luak.
adda kaniak daytay panagliday:
nagkitada koma 'ti pagnaan.

2

panagpampamarangna nga isu
daytay dakkelko nga ama, daydiay
aramidna adda 'ti lubongko
'tay kinabaknangko ken linglingay.

riknak ken mugingko maitagtag-ay
gapu't pasnek apok mangtulad 'ti
inar-aramid ti amak, kasdiay
panangtedna 'ti anges dagidi.

iti aramidna adda kari
isut' mangpapaisem 'toy riknak,
isut' kaubingan iti puli:
bombaanna 'ti angin 'toy puersak.

diak man makita ngem ammok latta
nga umisem-isem met dakkelko 'ta.

3

masansan nga umisem karkarmak
no mataldiapak ni milek* sadiay
sofa nagtugawan idit' amak:
riknak ken mugingko mamurmuray.

iti aramidna maisalapay
naragsak a lagipko't immuna
a panawen, kaniak nangitag-ay
ken nangiturturong kaniak dana.

kenkuana ta mangmangngegko ita
adu nga imbalakadna idi
kapulpulapulko pay lat' daga,
balakad a nangibartay kari.

masansan nga umisem karkarmak,
ay! ngem agar-aruyot met 'toy luak.

*milek andrey, 8, kaubingan kadagiti
uppat a saluyot boys, appo da mrc ken
hbc.

4

Siakon ti mangisagana iti kapeta, manong.
Nangisit, puraw, ken maris-kape. Agdaniwka
lattan...
--naadaw iti email ni rcb iti in-inauna a kailianna.

naunaannak met ni 'tanudko,
impagarupna nga isu daytay
inawisda nga agkape sadiay
pagkapean 'ti nangisit nga adu.
ti ganasna saan metten pulos
nadlaw daydiay nangawis a saan
a siak daydiay immasideg – anian
anian, ay! ngem agyamanak 'ti dios.

ta ni atanudko ken siak a ta
maymaysa ti rikna ken mugingmi,
'diay pusegna isu met pusegko,
indakkelmi dayta't rabaw daga.
dayta ti dumami iti puli,
ta siak ni siak, siak pay ni 'tanudko.

5

Narigat ti agsurat soneto iti Iluko. Saludsodenyo
ken Honor. Saan a kas iti Ingles a sagdudua ti
silaba. Iti Iluko, adu dagiti silaba ti maysa a balikas.
Saan a gapu ta adda 14 lines-mon, addan sonetom.
Tunggal linia iambic.
--reynaldo duque (1945-2013), naallingag a sungbatna
iti saludsod ni ariel tabag bayat panagturong 'diay
luganda a mangun-unor iti coastal road a mapan
balayna 'diay alfonso, cavite a pakarambakan petsa
ti panagkasangayna.

adda bukel a kinaagpayso
daydiay sungbat ni rey 'ti nangngegak
idi addakam' dalan ngem kunak
rumbeng 'tay disiplinat' mugingmo.
masapul nga adut' urnongmo, 'tay
adda lawagna a ladawan 'ti
nalablabsam aldaw ken rabii,
ladawan a kenka nakabaklay.

maysa man a ladawan 'diay inka
perperrengen masapul nga adu
daytay adda 'ti tapaw 'ta riknam,
'tay balikas aganges tunggal dua.
umanges sagdudua ingga't ungto
bilangem agmalem ingga't sardam.

Daniw

5 a Daniw

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!