Salaysay ni DEOLINDIS NORA B. MATIAS
DAKKEL ti akem ti Bannawag iti pannakasursurok nga agbasa. Lima pay la ti tawenko, ammokon a basaen dagiti linaon ti Bannawag. Linawas ngamin nga umay agipan daydi Tata Polen (nalipatakon ti apeliedona) iti rasion a Bannawag kadaydi Dios-ti-aluadna nga amak (Regino "Rikin" Baysa). Kasla kurang ti lawas no saan a makabasa daydi daddy iti Bannawag. No malpasannan, sublatekto metten a lukiblukiben. Kunkunak idi iti bagik: "Mapadasakto koma met ti makaipablaak iti uray maysa la a daniw iti Bannawag." Ket nagtultuloy ngarud ti reggetko nga agbasa, agingga ita.
Magustuak unay daydi komiks a “Karen da Sexy Carabao.” Kasta met ti “GUDMIRTID (Gunglo Dagiti Mangmangkik iti Rabaw ti Daga),” ken dadduma pay. Diak malagipen ti paulo dagidi naglabas a nobela, ngem ti permi a nagbati ditoy panunotko ket ti “Isla Furikawa.” Magustuak a basbasaen dagiti sarita ni Ma'am Claire Sumahit. Ngem idi agangay, diak metten mabasbasa dagiti agkakapintas a saritana (idi kuan, naammuak laengen a pimmusay gayamen).
Idi kolehioak, diak maliwayan ti gumatang iti kopiak sakbay nga agawidak ditoy Claveria. Adda latta ngamin umay aglako iti Bannawag idiay terminal ti St. Joseph Bus (Claveria Tours itan). Permi ti panagpasungad daydi manongko nga Adonis idi kaniak ngem saan met a siak ti sarabuenna no di ket ‘tay iggemko a Bannawag. Arigna diak pay nakababa iti bus a nagluganak, dawdawatennan 'tay inyawidko a kopia.
Nagadu ti naurnongko idi a kopia daytoy a magasin ngem daksanggasat ta idi nagasawaakon, diak metten naidalimanek dagitoy. Inanay ti dadduma. Dagiti dadduma, nalidayanak la unay, ta pinagaronda metten.
TI BANNAWAG KEN SIAK (40): Ti Bannawag, ni Sherma, ken Siak
Iti pannakaikappengko iti grupo a Bangkag dagiti Mannalon iti Balikas, nasursurok ti umno nga ortograpia iti pagsasao nga Ilokano. Nakaabelak kadagiti dandaniw ket pinadasko nga impatulod ti dadduma a putarko iti Bannawag. Ket yaman unay ken ni Apo ta ti inkaubingak nga arapaap, natungpal met laeng. Nagsayaat unay ni Apo ta pinatganna ti dawatko, ket saan laeng a maysa no di ket nasursurok pay ti naipablaak a sinuratko. Agyamanak kadagiti amin a nagbalin nga instrumento ni Apo (karaman ti Bannawag) tapno magun-odko dayta nga arapaap.
Ket kas wagas ti panagyamanko ken panangipariknak iti ayatko iti Literatura nga Ilokano, yag-agawak latta iti agbirok iti gumatang iti Bannawag, yaw-awisko ti panagbasa latta iti Bannawag, tapno agtultuloy latta ti panagsantak daytoy a magasin dagiti Ilokano. Parubrobak latta met ti essemko nga agputar babaen ti di agsarday a panagbasa kadagiti linaon ti Bannawag, pannakiinnadal, ken panagsurat.
Agbiag, Bannawag Magasin!
TI AUTOR: Tubo ti Claveria, Cagayan. Inaudi iti sangapulo nga agkakabsat. Agpada a tubo ti Badoc, Ilocos Norte dagiti nagannak kenkuana a da Regino ken Atanacia. Nayasawa ken ni Jojo Matias ket naparaburanda iti tallo nga annak. Agdama a mangisursuro iti Taggat Sur Elementary School iti Claveria. Kameng ti Bangkag dagiti Mannalon iti Balikas, maysa a grupo a mangitantandudo iti Literatura nga Ilokano.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
