Sarita ni GREGORIO T. AMANO
(Naipablaak iti Bannawag iti Pebrero 1, 1965 sa iti Enero 19, 2015 a bilang.)
SIMREK iti panunot ni Lino a magna iti sabali a desdes iti kabakiran i'toy a bigat ti Sabado ngem naawidna met laeng ti bagina a mangsurot iti sigud a dalanna. Dandani makatawenen a daytoy ti sinursurotna a dalan ket madlawna a pangirangen dagiti tumatayab ditoy. Ngem apay koma a sumabali? Saan met a dagiti tumatayab ti ad-adda a gagarana iti kabakiran.
Ad-adda a ti ulimek ti gamgamgamenna iti sinabado a panagturongna iti kabakiran. Ad-adda a dumagsen ti parikutna no agnaed iti balayda iti Sabado ken Domingo. Saan a di madakamat dagiti kakaarrubana no apay a saan met laengen a maital-o iti agdama a saadna iti maysa a pabrika iti ilida. Saanna met ketdi a karurod dagiti agsalsaludsod. Awan panggapuanna nga agsimron. Kasta idi damo, ngem idi adda manen maysa, dua, tallo a kakaarrubana a naud-udi pay ngem isuna a simrek iti sabali a pabrika a naital-o daras, nangrugin a masusungeg kadagiti saan a maputpot a saludsod.
Adu met ketdi dagiti sabali a kayatna a serkan. Kinapudnona, no lagipenna, maikapaten a pasdek daytoy yanna. Ket umapay manen iti panunotna ti gandatna a sumapul iti sabali a pagserkan.
Iti daytoy a Sabado, natakuatan ni Lino a saanna gayam a kabukbukodan ti ulimek ti kabakiran. Manipud iti saan unay nga adayo iti pagur-urayanna kadagiti pangen ti pagaw, nakangngeg iti uni ti matiktikapan a kayo. Simrek iti panunotna a maysa met a kas kenkuana nga addaan iti parikut ti agtiktikap. Sinapulna.
Saan pay a naasak ni Lino dayta a paset ti kabakiran. Kasagatan gayam ditoy. Anian a lamiis ti linongda! Saan a makalusot ti lawag ti init iti kapuskol dagiti naglalaga a sangada.
Saan a nailinged kadagiti matana dagiti sumagmamano a kapuon ti sagat a natikapan. Impapanna a pagilasinan iti panagtagikua dagita a tikap.
Awan iti panunot ni Lino ti makipatang iti lalaki a nasarakanna nga agpukpukan. Nagtakder iti malikudan daytoy ket binuybuyana ti napigsa a layat ken ti nakaal-alingget a panagdisso ti wasay iti puon ti kayo. No tengnged la ti tao ti pagdissuan ti tadem, maisina iti umuna a layat. Ngem saan a mamki ti kayo.
Agkalkalimduosanen ti lalaki ngem kasla nalipatannan ti aginana. Nagngilangil ni Lino. Ad-adda a timmadem ti panagatapna a kas met kenkuana daytoy a lalaki nga addaan iti parikut. Immasideg.
“Natangken ket ngata unay dayta natumpongam, pari,” kinunana, banag a nangtiped iti panagdisso ti tadem ti wasay iti kayo.
Naibaba ti wasay ket nagsammakedan ti lalaki nga agpukpukan. “Sagat daytoy, pari,” insungbat ti lalaki iti baet ti panaganangsabna.
Nagin-uusisa ni Lino iti natikapan a kayo. “Maparigatanka bassit iti daytoy,” kinunana sa minatmatanna ti kadakkel ti puon. Imbabana ti bag-na ket inruarna ti sangabungon a naiw-iwa a tinapay a napalipitan iti mantekilia. “Aginanaka pay ngarud,” kinunana ket inyawisna ti panagtugaw ti lalaki sa inyawatanna iti nagtakkab a tinapay.
Nadlaw ni Lino ti panagkedked ti lalaki a mangawat iti indiayana. Immisem. Inyam-ammona ti bagina ken ti gapu ti kaaddana iti kabakiran. Inawat met laeng ti nagtagiwasay ti tinapay.
“An-anuem koma dayta pukpukanem, pari?” sinaludsod ni Lino idi mangmanganen ti kasangsangona.
“Pagadigik koma ngarud, pari,” insungbat ti napagsaludsodan. “Ngem panagriknak ket parigatennak sa.”
“Apay a saanka a sumapul iti nalaklaka a pukanen?”
“Napanunotkon dayta, pari. Ngem manon a Sabado nga im-immayak ditoy. Awan met la ti maisalogkon.”
Nangngegda ti uni ti kullaaw iti puseg ti kabakiran. Nagudua gayamen ti aldaw, nakuna ni Lino iti unegna. “Agaw-awidka kadi?” sinaludsodna.
Nagwingiwing ti napagsaludsodan. “Adda balonko,” kinunana ket intudona ti yan ti bay-onna.
“Apay a dita pay la ngarud aglanglang?”
Nagam-ammoda. Pinaramanan ni Lino ni Andoy iti balonna.
“Nalaingka ngata a pumaltog,” kinuna ni Andoy kabayatan ti panagpalpalpada.
Nagngilangil ni Lino. “Saan,” insungbatna iti nababa a timek kabayatan ti panangidiayana ken ni Andoy iti sangakaha a sigarilio. Immuyos daytoy iti maysa. Insaruno a sinindian ni Lino. “Saanak a nalaing a pumaltog,” inulitna.
Limmag-an pay ti barukong ni Lino idi nayaonna ti nagbemben a parikutna.
“Saanka a maupay,” impatigmaan ni Andoy. “Dumtengto met ti gasatmo.”
“Ngem inton kaano pay?”
Saanen a sinungbatan ni Andoy. Pinidutna ti wasay ket sinublianna ti pukpukanenna a kayo.
“Nakapukanka koma itan iti dua no simmapulka iti sabali,” inyublag ni Lino idi naipamitlon ni Andoy a naitagbat ti wasay.
Ngem saanen a sinungbatan ti agpukpukan. Impasnekna ti nagilayat. Agsasaruno a layat. Nakaam-amak a taga! Pagammuan la ta nagirigen ti kayo. Pimmardas ti layat ken tagbat. Mapadson ti kayo! Maysa, dua, tallo pay a layat. Pagam-ammuan, kasla namimpinsan a nagungor ti naibalat a kayo.
Nakaisem nga immanges iti nalukay ti nangpukan. Nalpasen ti maysa a salip ket ti nangabak, tagikuaennan ti ragsak!
Iti biang ni Lino, isu ti natuang. Ket isu ti naabak iti maysa a salip. Ul-ulbodenna la ketdi ti riknana no panaginkukunana laeng ti panangsulbogna itay ken ni Andoy a sumapul iti sabali a kayo a pukanenna. Ta no isu laeng a biang, nabayagen a dayta ti inaramidna. Ngem adda gayam panggep ti nagpukan tapno saanen a sumiasi. Ngem saan a kas iti panangipagarupna.
“Subliek met laeng dagiti nairugik,” nangngeg ni Lino a kinuna ni Andoy. Nalagipna dagitay natikapan a sagat a nalabsanna iti dalanna. Ania ngata no simmabali manen, a kas iti insingasingna itay?
Inturong ni Lino dagiti matana iti nagtakderan itay ti napukan a kayo. Kasla buybuyaenna pay laeng ti wasay a mailayatlayat. Mano a layat? Mano a tagbat? Mano a tukel ti ling-et ti nagtedted? Saan gayam a mapukan ti dakkel a kayo iti maymaysa la a layat ken tagbat ken sangkatedted a ling-ed.
Inasitgan ni Andoy. “Nalpaskon,” kinunana a kasla kumarkarit dagiti matana. “Ita, sika met,” imbuksilanna ti karit.
Naikuleng ni Lino. Ngem saanen a nasken nga agsanud—a sumabali manen iti pagserkanna. Ammonan dagiti igamna. Sinangona ti nagpukan iti kayo ket, “Padamagankanto iti saan unay a mabayag,” insungbatna. —O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
