Segun iti National Capital Region Police Office (NCRPO), nasurok a 22,000 a kameng ti polis ken kanayonan a puersa ti agbantay iti kinatalged ti maikatlo nga State of the Nation Address (SONA) ni Presidente Ferdinand R. Marcos Jr. inton Hulio 22, 2024.

"Natalged ti Presidente."

Daytoy ti impanamnama ni Presidential Security Command (PSC) Chief Philippine Air Force (PAF) General Nelson Morales maipanggep iti kinatalged ni Presidente Ferdinand Marcos Jr. (PBBM) iti maikatlo nga State of the Nation Address (SONA) a maangay iti Batasang Pambansa Complex, Quezon City inton Hulio 22, 2024.

Impasingked daytoy ni Morales kalpasan ti panggep a pannakapapatay ni dati a presidente ti Estados Unidos Donald Trump bayat ti campaign rally daytoy iti Pennsylvania.

Segun ken ni Morales, kankanayon a nainget ti seguridad ni Presidente Marcos, nupay kasdiay ti napasamak ken ni Trump.

Ammuem Pay Daytoy
Ket Itartarayanmi Dagiti Bomba

Ket Itartarayanmi Dagiti Bomba

Kinuna met ni House Secretary-General Reginald Velasco a naurnosen amin a mainaig iti seguridad iti SONA.

Mapan a 1,400 a kameng ti PSC ti agpaay iti SONA inton Lunes, malaksid pay iti 22,000 a kameng ti Philippine National Police (PNP) ken 2,700 a mainayon a bilang ti puersa.

Iti sabali a bangir, nasurok a 2,000 a sangaili ti manamnama a tumabuno iti SONA, agraman dagiti nangato nga opisial ti gobierno ken nadumaduma nga embahador.

Maiserra ti Batasang Pambansa Complex manipud Hulio 19 agingga iti 21, ket dagiti laeng addaan iti napateg a pakaseknan iti Kamara ti makastrek. (Manila Bulletin//Lito Hilidon/Bannawag)