Binallaagan ti Social Security System (SSS) ita, Hulio 18, 2024, dagiti miembrona ken ti publiko nga agridamda kadagiti maaw-awatda a text message nga aggapu kadagiti mangballaibo ken agpammarang a kameng ti SSS.
Kinuna ti SSS nga agridam dagiti miembro di la ket ta makaawatda iti text message nga agkarkari nga adda maawatda a gunggona no i-click-da ti naited a link.
Segun ken ni Normita M. Doctor, Senior Vice-president ti SSS Member Services and Support Group, nga addaan naawatda a pakaammo manipud kadagiti miembro ti SSS a nakaawat iti text message mainaig kadagiti panag-claim iti benepisio, expiring contribution payment, wenno panagrehistro iti My.SSS.
Impaganetget ni Doctor kadagiti miembro ti SSS a dida lukluktan dagitoy a manglimlimo a text message, ta maipanda iti phishing site ket matakaw ti impormasionda kas iti SS number, ken dagiti login credential ti My.SSS account-da.
Mangnamnama ni Marcos iti pannakaisubli ti panangipateg ni Pinoy iti arte a Filipino
Imbalakad pay ni Doctor a no saan nga am-ammo ti numero a naggapuan ti text message, namnamaen a naggapu daytoy iti scammer.
Im-imbestigaranen ti SSS Special Investigation Department (SID) dagitoy a pasamak, ket nangidatagdan iti Text Scam Complaint iti National Telecommunications Commission (NTC).
Iti sabali a bangir, imbalakad ni Doctor kadagiti nabiktima ti text scammer nga agipulongda iti Anti-Cybercrime Group ti PNP wenno iti Cybercrime Division ti NBI.
Mabalin met ti agi-report iti SID babaen ti email nga [email protected] wenno awagan daytoy a numero (02) 89247370. (Manila Bulletin//Lito Hilidon/Bannawag)
