Autobiograpia ni LORENZO G. TABIN
Maika-20 a Paset
MANGGAHAN, PASIG, 1967
TINUNGPALKO TI IMBAGA daydi ulitegmi a Rudy nga aramidek. Napanak nagaplikar idiay United Textile Mills, idiay Manggahan, Pasig. Arinunos idin ti 1967.
Adda ti United Textile Mills iti daya a sidiran ti kalsada nga agpaabagatan. Babassit dagidi balbalay ken pasdek iti aglawlawna. Makitkitak dagidi dyip nga agsasabat nga agitulod ken agyawid kadagidi trabahador iti pagablan. Adu dagiti agdardaras nga agpa-punch-in pay laeng ngem agdudungsadan. Ad-adu ti agdardaras nga ag-punch-out, nga arigda iti alutiit a naputotan ti ipusda, wenno maganatan a makaruk-at iti nadagsen a trabahoda.
Adda daydi barberia a kabatog ti ruangan ti pagablan. Adu dagidi trabahador a mapmapan agpapukis; maysaak kadakuada idi agangay. Iti amianan ti barberia, a kabatogna iti laud, adda dakkel a pinuon ti algarruba.
Adu ti dokumento a pinaisagana ti management. Sumagmamano nga aldaw a nagurayak ket bayat ti kasla di maungpot a panaguray iti pannakatungpal ti kunak a milagro, nagwerret ti panunotko iti naglalaok a banag. Nalalayog nga arapaap, ni Samar, ti Labut a pinanawak, wenno panggepko a panawan nga awanen ti sinnublian.
Idi nagmatan ti bunga ti milagro, nagpangngaduaak.
Third shift ti naited nga orasko, alas onse iti rabii agingga iti alas siete iti bigat. Kabaelak ngata?
Naibatangak iti Winding Department. Maysaak kadagiti tallo a winder iti grupomi. Duakami a lallaki ken maysa a babai. Saggaysa a linia a sag-10 a rolio ti sinulid ti iggem ti tunggal maysa. Naisuro kaniak no kasano ti agisilpo kadagiti magurnot a sinulid. Masapul nga alerto dagiti winder. No dadduma, aggigiddan nga agpulsot dagiti sinulid ket masapul a saanka nga agpampamayan nga agisilpo.
Alas dos ti merienda—awan nangibaga nga agbalonak. Nadlaw ti babai a kaduami, a Bisayana, nga awan ti balonko. Inyopreserannak iti balonna. Mabainak koma ngem ‘awatem’ kuna met ti buksitko! Napalalo ti kinamanagbabainko, isu a nakakutkuttongak.
Kalkalpas pay laeng ti merienda, agtinnagen dagiti kalub ti matak! Alas tres, mangrugin nga agpungngail ti ulok! Numona ta iniddepda ti makina dagiti winding machine ket impaisublatda ti panangdalusmi kadagiti bobbins. Ikkatenmi dagiti nabati a nagurnot a sinulid.
Ngem dagiti kaduak, kasla dida iginggina ti puyat ken bannogda. Naragsakda, agsisinnutilda pay. Mano ngatan a tawenda iti pagablan, ket naawatdan daytoy a lubongda?
Ket siak?
Agsapsapulak iti lung-awak, naimbag la a pangrugian. Nasaysayaat ngem ti awan, isu’t adda a kunada.
Idi dumanon ti alas singko, agarup naiwagsakkon ti panagpungngail ti ulok. Pampanunotekon ti idadateng ti maikapito iti agsapa.
Apaman a nagpatit ti maikapito, nakiinnunaak a nakilinia nga ag-punch-out. Sinarunok ti babai a kaduak iti winding. Kalpasanna, nagdardarasakon a napan iti pagurayak iti luganko nga agawid idiay Coromina.
Awan ti parikutko kadagidi aldaw a diak batang ti agpatagabo kadagidi kakaduak idiay Coromina. Mamigat-maturog, mangaldaw-rumidep saak mapan agbasa iti malem; dumagasak a mangan no rummuarak iti alas nuebe sa agtarusakton iti trabaho. Ngem idi dumteng ti batangko, ama, dandani awan turogko. No maputed ti naalak a turogko ta masapul nga isaganak ti pangaldawmi, narigatakton a makaturog! Kasta unay ti rigatko idi iti pagablan. Ti panagriknak, saanak nga agbayag iti trabahok. Ken agnguynguy-a idin ti panggepko a mangileppas iti kursok idiay NRSIT.
Uray no saanko a batang ti patagabo, ket maturogak ti kunak, ama, ta naariwawa dagiti kakuartok, nangruna no maidaw-as ni Bert (Edilberto H. Angco) nga agkuna: “Diyo unay pagbagasan ti Bannawag!” Agriawak la koma ti kunak ngem agari met ti bainko.
Iti naminsan, nakariingak iti timek daydi Gen (Genaro R. Sumaoang). Saanakon a nakaturog iti daydi nga idadagasna ta adu ti nagsarsaritaanmi; liniklikanmi a nagsaritaan daydi Lina ken ni Samar. (Napanna sinurot daydi Lina iti maikadua a lubongda kalpasan ti panangigubetna iti biagna iti lubong ti drama iti radio; uray sa la kano a tallo ti dramana idi a maipangpangngeg iti radio idiay Laoag, a nakaigapuan ti pannakapukaw ti sin-aw dagiti matana.)
“Addanto sabali nga aldaw a pagsaritaanta,” kinunana idi impalagipko daydi Lina. Nagling-i a nangkita iti aglawlaw, a kasla met didakami imanmano dagiti kakaduami iti kuarto. Naparegta ketdi iti pannakaammona nga addan trabahok. Nairana nga agsapsapul iti trabaho, nga uray ania ta dinan kayat ti agsubli iti Kabisayaan.
“Iserreknak man met!” kasta unay ti panagpakaasina.
“Narigat idiay,” kinunak. “Amangan no dimo kabaelan ti agpuyat iti agpatpatnag.”
“Kabaelak! Uray ania, basta pagbiagan!” kinunana.
“Bay-am ngarud ta bagaankanto no agawatda manen; nagsardengda bassit nga agawat ita.”
Serrek ti Pebrero1968 idi. Nagsibbaingda iti daydi Lina ta napan nagbakasion daydi Genaro idiay Santa Ignacia, Tarlac, ket isu met ti isasangpet daydi Lina. Napanmi sinarungkaran ken ni Peter iti nagdagusanna ket nakaad-adu ti dinamdamagna. Isu gayam a nagpa-Manila ta tulagda iti daydi Gen ti agkita ngem di pay idi simmangpet ti naud-udi.
Ibaetko man a ti pannakalagipko kada Gen ken Lina, nalagipko met ni Onofrecia Ibarra ti Sinait, Ilocos Sur. Ibaetko daytoy a lagip ta no malagipko ti maysa a banag, dakkel ti kaipapananna iti biangko. Kasta unay ti bainko iti pannakababalawko iti pannakaduktal ti maysa a palimed babaen ti suransuratmi ken ni Samar. Nagpadespensarak latta iti daydi Gen uray awan ti nakitak a biddutko, a gapu met ti nagyamyamananna ta daydi ti nakarisutan ti parikutda. Maipalagip ditoy a beterano dagitoy a mannurat. Kinapudnona, nagsaruno ti numeromi ken ni Dr. Ibarra idi nangabakkami iti maysa a pasalip ti Bannawag: ti saritana ti maikapat ket ti saritak a "Rupa" ti maikalima—daydi ti damo a panangabakko iti salip.
“Kasla ubing daydiay Lina!” kinuna ni Peter idi agawidkamin, a nakalagip iti nagkaadu a dinamdamag ti dayag a sinudak ti pana ni Kupido ti pusona!
Idi ngaruden ta nagawat manen ti United Textile Mills iti trabahador, insurok daydi Gen no kasano ti agaplikar. Intulodko iti ruar ti dagusmi idi agpakada ket makitkitak manen ita ti lukay ti nalag-an a widawidna iti takderna nga agarup pagat-abaganak. Nataytayengteng ti kayumanggina ngem siak, ket ti ngata ketdi kina-tall-dark-and-handsome-na ti nakabatombalanian daydi Lina. Agasem, ta adda kano immuna a nobiona, ngem daydi Gen ti nagpasaganna!
Ha-ha! Wen, adu ti nakaay-ayat a rekado ti biag ‘toy numo, nga isuda ti mamagrimrimat kadagiti matana ken mangpalapalag-an iti riknana.
Ngem agsublitayo idiay United Textile Mills.
Nakastrek daydi Gen, ngem diak malagipen no ania a departamento, basta saan nga iti Winding Department. Sakbay a nangrugi, nagtulagkami nga agsapul iti pagdagusanmi idiay Manggahan. Agbingaykami iti pagbayad.
Nagpakadaak kadagiti kakaduak idiay Coromina, a kas nakunak idin, agsagsaganada aminen a mangabaruanan ket dandanin masinasina daydi naindaklan ken kakaisuna a bunggoy dagiti nagkakakuartuan a malalaki a mannurat ti Bannawag! Ngem sakbay a nagsisinakami, idi awanakon idiay, sinublat kano ni Jaime R. Luzano ti puestok. Ni Pete (Peter La. Julian) ti nakaibaga kaniak kadagidi panagsinsinnurat ken panagin-innawagmi idi agpadakamin nga adda iti America.
Ket daydi bassit a kasla balay iti eskuater, iti sirok daydi kunak itay a dakkel a kayo, ti naalami ken ni Genaro nga upaan.
Sakbay a saritaek ti langa ti lubongmi iti daydi Gen idiay Manggahan, lagipek man biit, a manipud iti yaay daydi Uliteg Rudy idiay Coromina a nangipadamag nga agaw-awat ti United Textile Mills iti trabahador, manmanokami laengen a nagkita. Inawisnak pay idi a makipagdagus iti yanda idiay Manggahan kadagidi sumagmamano a taga-Daclapan Sur, ngem diak kinayat ta kaduada daydi nagsursuruak nga inarem ket diak kayat a pagungaren ti natayen a rikna ti uken (!), wenno ‘tay kunkunada a puppy love! Ta adda idin ni Samar iti biagko, a kangrunaan a paratignayko iti amin nga arapaapko iti masakbayan. Isu nga agingga ita, diak ammon no yan ni--wenno--daydi uliteg a Rudy, tapno makapagyamanak met koma uray kaskasano.
Dikami pay nakapagsimsimpa iti daydi Gen iti baro a dagusmi idi rugianna a saritaen ti immuna a panagkitada iti daydi Lina. Gapgapuna kano idiay Laoag iti daydi naudi a panagkitami idiay Coromina.
“No kasta, naggapukan idiay Laoag?” kasla diak idi mamati.
“Wen, a,” kinunana nga adda bassit paaruyot ti ayugna. Isu laeng ti kasdi ti bengngatna. Diak ammo no kasdiay ti ayugda idiay Sta. Ignacia, Tarlac a nakaipasngayanna. “Napintas met idiay Laoag. Ngem napimpintas ni Lina, sika!”
Pinadasko nga inladawan daydi Lina a naibasar iti nakitak a mismo iti daydi naudi a panagkitami. Ngem naputed idi agsao manen daydi Gen.
“Nakuttong ni Lina,” kinunana a nanangad pay iti yero a sallabawan ti kuartomi, “ngem nasippukel met dagiti luppona, sika!” a pinasarunuanna iti agarup ayekyek a katawana a medio inling-ina nga insadag iti abagana, a kasla padpadasenna a kitaen ni Lina iti lagipna.
“Nasippukel?” No adda koma pay daydi Gen, paneknekanna ti ibagbagak.
Dinak sinungbatan. “Nasayaat ti panangawat dagiti kakabsatna kaniak,” kinunana. “Nadekket a dagus kaniak ni Marlon nga adingna. Dinamagda no kaano ti panggepmi nga agsimpa; siguro, maganatandan ta agpadakamin nga adda iti ngalay ti duapulo. Ngem kunak, agsubliak iti Manila ta agsaganaak... isu nga addaak ditoy ita... ”
Nalagipko ti nasarita ni Samar maipanggep iti panangtedna iti ladawan ti baket ken ni Marlon a kunkuna daydi Gen.
Tunggal adda surat a maawatmi a naggapu kada Samar ken daydi Lina, kasla saankami a mauma nga agpimpinnadamag. Makitkitak ita ti impaayek-ek a katawana ken ti apagapaman a panangapputna iti ngiwatna, sa agrimat dagiti matana sana manen sublian a basaen ti kaaw-awatna a nakapatpateg unay a surat!
Maysa nga ugalina ti diak malipatan. Kalpasan ti panagdigosna, isublatna a pagdigos ti nalatak idi a polbos ti ubing nga ad-adda a mangpalitem iti kayumanggina.
“Agpolboska met tapno lumamuyot ti kudilmo!” kinunana. “Magusgustuan ni Lina ti lamuyotko, sika!”
Nagkatunosankami unay. No ania ti madalapusmi a gatangen a lutuen, umanayen. Saankami nga agpilpili. Masansan a dagidi nalatak a babassit a sardinas ti panarasanmi a lukatan ket umanayen nga ibulonmi iti innapuy, a pagtig-abanmi metten iti dakkel.
Ditoy met ti nangistoriaanna iti adu a padpadasna iti Kabisayaan. Maysa kano a bayanggudaw, a ti la nakaipalpalladawan wenno nangipalladawanna iti bagina iti naminsan a panagpasugnodna iti mapaspasamak iti pamiliadaa idiay Sta. Ignacia, Tarlac. Adu a luglugar iti abagatan ti nagakar-akaranna.
“Napadasak pay ti nagmekmekaniko. Nagsapulak iti uray ania a makatulong a mangpalag-an iti dagensenko,” kinunana a madlaw ti lidayna a nanglagip. “Agingga nga adda pastor a nangikasaba iti biag ni Jesucristo. Nagustuak, agingga, a gapu iti kinamannuratko, nagbalinak a pastor.”
Adda daydi naminsan a panangitugotna kaniak iti maysa a kultoda iti asideg ti Manuel L. Quezon University. Diak koma sumurot ta nalagipko daydi sinurotan daydi tatang idiay Labut. Kadagidi a panawen, maysaak kadagiti di mamatpati iti ania man a pammati. Kunak idi iti bagik, no adda masapulko iti Dios, apay, saan kadi a mabalin ti agderetso Kenkuana? Nalagipko ti nangnangngegko a no adda kayatmo, agkararagka. Adda kadi nagkuna nga agkararagka iti tao ta isu ti mangidanon iti Dios iti kayatmo? Ngem saanak a nakidebdebate iti asino man a pannakabagi ti sekta wenno pammati. Ania man ti pammatida, pammatida laeng; sabali met kaniak.
Ngem gapu ta diak kayat a madadael ti singed ti panagpagayammi, pinagustuak.
Awan inaramidko iti uneg ti pagkultuan no di nagpaliiw. Panagkunak, ammok idin amin nga inagapadda. Malaksid ti maysa a banag nga immalseman ti riknak.
Iti ngamin maysa a paset ti mensahe ti ministro, nabukal ti malagipko a binatogna:
“Kakabsat, natayen ti maysa a kabsattayo.” Nakintal ti panangbalikasna iti balikas a natayen ken ti nagan ti kunana a natay.
Tinaliawko daydi Gen.
“Di nakaited iti apagkapullo,” inyarasaasna; naawatanna ti kaipapanan ti ikikitak.
Nabati iti isipko daydi a nangngegko iti Ministro, a kas iti panagtalinaed iti lagipko daydi nangisit a tinta a naiwarsi iti badok—agur-uraykami iti daydi Jose Torres iti batangmi iti kuarto a pangalaanmi iti eksamen iti maysa a klasemi idiay Cabugao Institute—malagipyo pay daydi istoriak? Idi kinalbitna ti imak, intarapnusko iti sangona. Dinanognak ngem naligidak. Idi adda aganawa, winarsianna daydi puraw a badok iti tinta daydi plumana. Nagpulongak iti daydi direktor Attorney Victorino A. Savellano, ngem unget ketdi ti naganabko!
Isu nga idi inulitnak nga awisen daydi Gen, impambarko a madmadi ti riknak. Dinakon inulit nga awisen.
Nupay kasdi ti napasamak, saan a napalsian ti panaggayyemmi.
Napadasak ti nagpapukis iti kunak a nalatak a barberia iti sango ti pagablan. Nakaadawak idiay iti insuratko a sarita a "Ti Eden iti Biagda" a kabibiag ti barbero, dagiti gagayyemna, ken dagiti babbalasang iti pagablan, a makitkitada iti klab iti rabii. Siak ti maysa kadagiti agbibiag nupay saan a madlaw iti istoria. Namindua nga impablaak ti Bannawag. Immuna idi Hunio 7, 1968 sa idi Oktubre 16-31, 2021. Namindua pay a nailibro. Immuna a nairaman iti "Pakpakawan, Berde! Ken 22 a Sarita" sa manen iti "Ubbog ti Sirmata (Wellspring of Foresight)." Naisalsalumina ti porma daydi a sarita, ta isu ti ammok nga immuna a sarita a pasig a dayalogo a rimmuar iti Bannawag. Makunak a saan a pot boiler. Addan sa kano sabali a naipablaak a kaarngina ngem napalabas pay ti adu a tawen. No saan a pumalia ti lagipko, nin sa idi Danilo Bautista nga i-San Ilocos, Sur ti akinsarita.
Nupay inan-andingaymi ti bagbagimi bayat ti kaaddami iti daydi a pagablan, masansan a pagsaritaanmi ken ni Gen ti aramidenmi tapno matungpal ti nalayug nga arapaapmi a makisimpa kadagiti patpatgenmi a dayag.
INTULTULOYMI TI NAGSURSURAT iti Bannawag. Diak ammo, ta para kaniak, uray makumikomak iti sabali a banag, kasla bisio a narigat a malipatak ti agsurat; pagsasao man a naidaiten iti... kudil, ngem kunak, naidait iti utek! Tunggal adda makitak a baro a banag, wenno pasamak, panunotek manen no kasano a yabelko iti suratek. Malagipko pay a maysa kadagidi patigmaan daydi Manong Jun Hidalgo, a kanayon a mangitugot ni mannurat iti pluma ken papel tapno adda sisasagana a pangikur-itanna iti ania man a karkarna a masaksian wenno mapanunotna. Naliplipatak metten nga aramiden, ta uray iti panangaldawmi ken ni kaingungot, nagadu ti mapampanunotko a napipintas koma a pangalaan iti suraten ngem diak met insurat isu a no nalpaskamin, diakon malagip no addaakon iti sango ti computer.
Maysa ketdi ti diak nalipatan idi. No adda maiggamak a diario, agsapulak iti karkarna a mabalin a suraten a salaysay, kas singasingda idiay Bannawag. Narigat idin ti sumingit iti nobela gapu ta umad-adun ti makabael nga agnobela; adun ti pagpilian dagiti editor, a sikbaben dagiti agbasbasa. Iti ababa a pannao, adun ti nakaadal nga agsurat ken magustuan dagiti agbasbasa. Kabulig met ngamin a talaga ti negosio, isu ti pagbiagan dagiti diario ken magasin.
Isu nga iti naminsan a panangbidbidingko iti naiggamak a diario, nasulek ti imatangko iti nagan a kaap-apeliedok a taga-Magsingal. Isu ti direktor ti Board of Technical Surveys and Maps a nabiit pay idi a nabangon idi 1961. Agaramid iti kartograpia wenno mapa dagiti marukod a dagdaga.
Saanak a nagtaktak. Inremediok ti papanko pananginterbiu iti daydi impapanko a kabagian.
Bassit ti pasdek ti Board of Technical Surveys and Maps. Nagkusay iti abagatan ti agdanna. Adda iti makanigid ti ridaw a sumrek iti opisina. Adda bassit a lamisaan a yan ti agaw-awat iti sangaili.
Lalaki ti agaw-awat iti sangaili. Kakudkudil ti nangisit ti sikona! Kataebko ngata.
“Naimbag nga agsapam,” impasaksakko. Inyam-ammok ti bagik.
“Ne... siak ni Leonardo Menor,” kinunana.
Imbagak ti gagarak.
“A, ni Komander? Adda sangailina... kabagiam?”
“Diak ammo,” kinunak.
“Urayem, adda sangailina,” pinagtugawnak.
Diak pay nakatugtugaw idi adda karantiway a naggapu iti opisina iti kanawan.
Ni Clemen C. Uclaray! Nakalawlawa ti isemna, atitiddog ti wakawakana nga immasideg.
“Nakapasiarka man, lakay?” dinamagna.
“Umayko koma kasarita ni Komander, no mabalin a suratek ti kabibiagna a para Bannawag.”
“Kasta? Urayemon, malmalpasen ti mitingda iti sangailina.”
Liniklikak nga agapaden ti napasamak iti Ilokano Magasin. Uray isu, kasla nalipatanna metten. Masdaawak laeng ta napintas ti puestona iti opisina dagidi Lorenzana ngem apay nga adda iti Board of Technical Surveys and Maps?
Nagsarugaddengak iti sango ti opisina ti komander. Ludingas ti di pay nakatugtugaw iti likud ti lamisaanna. Apaglabes la ngata a lima a kadapan ti tayagna; basbassit iti takderko a lima ken lima. Iti rupa ken kudilna laeng, ammok lattan a kabagianmi nga awan surok ken kurangna.
“Kasta?” kinunana. “Aponaka ngarud ni Uliteg Undo? Tatangmo ni Minti? Ket maysaka a mannurat?”
Adu ti sinarsaritana. Adda idiay Magsingal ti pamiliana. Isu met la gayam nga adda ni Clemen Uclaray iti Board of Technical Surveys and Maps.
“Adu, a, ti kabagiantayo... naiwaraswarasda. Malaksid ‘diay Sto. Domingo a nakayanakan ni Uliteg Undo, adu pay ti kabagiantayo idiay Asingan, Pangasinan. Ken idiay Isabela.”
Ammona met a ti kabsat daydi Lelong Undo, nga adda idiay Isabela, inasawana ti anak ti kabsat daydi Lelang Simon.
Imbes a sungbatanna dagiti saludsodko, inayabanna ti sekretariana ket imbilinna nga ikkannak kadagiti polietos ti pakasaritaan ti biagna, ken ti Board of Technical Surveys and Maps.
“Dika masango unay,” kinunana. “Baliwantanto ti agsarita. No adda masapulmo, umawag wenno agpasiarka latta ditoy.”
Naadalko iti polieto a dakkel ti pagrebbengan ti Board of Technical Surveys and Maps. Saan la a ti gagangay a panagrukod iti daga dagiti agrimensor. Nasken a masurot ti ituding ti gobierno para kadagiti babassit a mapa, topograpiko a maibasar iti moderno a pagannurotan. Ken adu pay nga agpaay iti pagimbagan saan laeng a dagiti indibidual a tattao ngem kangrunaanna para iti pagilian. Kas iti Spratly Island; kasta met nga adda pakainaigan iti panagpatakder kadagiti pasdek, ken amin a proyekto ti gobierno.
Nadagsen met ti pagrebbengan ti Chairman of the Board. Ta isu ti Secretary of National Defense; battikuting dimo kunkuna ngem dakkel met gayam ti natugawanna! Umawat laeng iti per diem a singkuenta a pisos iti tunggal sesion a saan a nangatngato iti dua gasut a pisos iti binulan. 1961 idi nabangon ti Board of Technical Surveys and Maps.
Apaman a nabasa ken naisuratko ti naadawko iti polieto, ken ti kabibiag ti komander, indaraskon nga insurat.
Bareng no yiskediul a dagus ti Bannawag; daydi Tang David D. Campañano ti agig-iggem idi iti salaysay.
Idi inyawatko ti salaysay, intangadna ti nabengbeng nga anteohosna, a naguyaoy ti agbibitin a sigariliona iti nalitem a bibigna a nangpalabas iti umuna a panid, sana impaibati ta basaennanto.
Nalpayak. Naruamakon iti kasta a balikas dagiti editor. Agbibitin ti gasat ti manuskritom, kayatna a sawen, 50-50 ti gasatna no kasta ti mangngegmo. Sapay no panggepko koman a singiren ti pauna a bayadna.
Ken maibagak koman ken ni Komander Tabin a rummuaren ti pakasaritaanna, ken ti Board of Technical Surveys and Maps.
Ken mayarungaingko koman ti panagaplikarko. Ngem no kasta nga agbibitin, namak payen no di maipablaak? Ania ti rupak nga agaplikar?
Nagurayak iti dua a lawas sakbay a nagsubliak iti Bannawag.
Nalawag ti rupa daydi Tang David. “Nasingirmo ‘tay bayad ti salaysaymon?” kinunana.
Napauluan iti "Mapa: Ammom ti Kaipapananna Kenka?" Abril 22,1968 idi rimmuar. Nagtartarayak a nangted iti kopia ti Bannawag iti daydi komander.
Idi mapalabsanna ti salaysay, inayabanna daydi sekretariana.
“Ikkam man ti application form daytoy ubing,” kinunana. Dina payen dinamag no ania ti nalpasko.
Nagkidemak a nangnanam iti nalag-an a rikna ti maikkan iti baro a gundaway. Pakpakauna ti iruruk-atko iti pagablan, ken ti panagsublik iti Coromina.
(Maituloyto)
Napalabas a paset: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
