Iti laksid ti pannakaitantan ti klase kadagiti eskuela a naapektaran ti layus, 98 a porsiento kadagiti para iti publiko a pagadalan iti entero a pagilian ti naglukat para iti School Year (SY) 2024-2025 ita nga aldaw, Hulio 29, 2024, kas inkeddeng ti Department of Education (DepEd).
Segun ken ni Secretary ti DepEd Sonny Angara, 842 a para iti publiko a pagadalan ti naitantan ti panangrugi ti klaseda gapu iti epekto ti Bagyo Carina ken ti abagat.
Kinuna ni Angara a bassit laeng daytoy a porsiento no idilig kadagiti nangrugi iti klaseda ita nga aldaw, ta awan pay iti 2 a porsiento iti entero a pagilian.
Segun iti datos ti DepEd, adda 47,818 a para iti publiko a pagadalan sipud idi SY 2023-2024.
Mangnamnama ni Marcos iti pannakaisubli ti panangipateg ni Pinoy iti arte a Filipino
Iti sabali a bangir, inyebkas ti Teachers’ Dignity Coalition (TDC) ti panangsuportarna iti DepEd iti panaglukat ti SY 2024-2025 nupay adda 800 a pagadalan a naitantan ti panangrugida.
Segun iti TDC, parikut latta ti nakurang a siled ken dadduma pay a pasilidad, libro ken dadduma pay nga instructional materials, danum ken sanitation facilities, ken ti agkurkurang a bilang dagiti mannursuro ken empleado iti pagadalan.
Ilunglungalong ti TDC ti pannakapabaro ti kurikulum, pannakarepaso ti programa a K-12, pannakaisubli ti Philippine history iti hayskul, ken pannakasalaknib ti pondo para iti edukasion.
Impaganetget pay ti TDC a ti kapatgan a paset iti edukasion ket ti panangipangpangruna iti pagimbagan ken kasasaad ti panagbiag dagiti mannursuro, tapno mapnek ken gumanaygayda iti propesionda. (Merlina Hernando-Malipot/Manila Bulletin//Lito Hilidon/Bannawag)
