Nobela ni DIONISIO S. BULONG
Naipablaak iti Bannawag, nangrugi iti Marso 11, 2013 a bilang.
(Maika-32 a Paset)
KADISDISSAAG da Ella iti luganda idi dumteng ni Johnny. Nagkikinnitada. Kasano ngamin ket nakatartaraki ni Johnny iti suotna nga umasul a long sleeves a kinorbataanna iti nalitem a nalabaga a pinarisanna iti nangisit a pantalon. Agandap ti sileng ti kuntirad a sapatosna a nangisit iti lawag ti bombilia iti pagparkingan. Adda bitbitna a basket.
“Happy birthday, tita!” kinuna ni Johnny ket inabrasana ni Manang Mameng. Inyawatna ti basket a naglaon iti lansones-Camiguin.
“Thank you!” kinuna met ni Manang Mameng. Inyawatna ti basket ken ni Mang Bianong. “Itugotmo dita uneg.”
“Ang pogi mo, BBJ!” Agkatkatawa ni Ella a nangkawit iti takiag ni Johnny ket tinurongdan ti ridaw ti maysa kadsaaran a nakalawlawa a restaurant.
NOBELA: Apo Baboy Party-List (1)
Nagtamed ti guardia a nanglukat iti ridaw idi sumrek ti grupo. Nagtarus ni Ella iti lamisaan ti agaw-awat iti reserbasion iti kanawan ti ridaw. Kalpasan a maibaga ni Ella ti naganna, inturong ida ti nakauniporme iti nangisit a palda ken puraw a blusa iti lamisaan a para sangapulo a dumna iti diding iti kanigid.
“Idissom iti tengnga ti lamisaan ‘ta basket ta mangan ti mayat,” kinuna ni Manang Mameng ken ni Mang Bianong.
“Mangabeseraka, dad. Ni mommy dita kanawanmo, siak iti kanigidmo,” kinuna ni Ella.
Kinudkod ni Johnny ti teltelna idinto ta kinitana ni Ella. Naawatan met ni Ella ket nagkatawa.
“Siempre, agabayta!” kinuna ni Ella.
“’Tay menu, apay a dida nangidisso iti lamisaan tapno makapilitayo iti order?” kinuna ni Mang Bianong idi makatugaw.
“Buffet, dad. Nasaysayaat tapno mapili ti tunggal maysa ti kayatna a taraon. Ken siempre, manganka agingga iti kayam! Sayang lang ta bassit ti kaha ni BBJ!”
“Di bale, agbennat met!” inkatawa ni Johnny.
Nakipagkatawa ni Manang Mameng. “Ti la sasawem ta masleg ni Johnny!” kinunana met. Inwarasna ti panagkitana. Manmano pay laeng a lamisaan ti naokupar. “Nanginan sa met daytoy a restaurant. Apay a bassit pay ti tao ket rabiin?” Kinitana ni Ella. “Anakko, saan a gapu ta adda kuartam, a, ket ibarayuboymo!”
“Mommy naman! Maminsan la ti birthday-m iti makatawen. Okey lang ang presyo dito. Promo ngamin isu a saan nga agdupudop ti tao. Santo la agsangpet dagiti umay mangan no madanon ti oras nga impareserbada,” inlawlawag ni Ella.
Immanges iti dakkel ni Manang Mameng. “Di ba mahal ang…” dina naituloy ta naisagud ti panagkitana iti dakulap ti balasangna a nakapetpet iti bukot ti dakulap ni Johnny. Intim-ogna ti tumengna iti tumeng ni Mang Bianong. Idi kumita ni Mang Bianong, inlibasna nga insungo dagiti ima da Ella ken Johnny.
Immisem ken kinuti laeng ni Mang Bianong ti abagana. Isu met a sumrek da Mr. ken Mrs. Cortez, ni Tricia ken maysa a kataeb daytoy a nataytayag nga amang.
Rimkuas ni Ella iti nagtugawanna ket agkilkilliit a nangsabat kadagiti sangsangpet. Inarakupna ni Tricia sa nagkutagtagda a kunam la no manon a tawen a dida nagkita. Kalpasanna, nagmano kada Mr. ken Mrs. Cortez.
“Komusta ti Galiera Queen?” kinuna ni Mr. Cortez nga agkatkatawa.
Agkatkatawa ni Ella a nangsipat iti takiag ni Tricia. “Ikaw, ang nagtsismis, ano? Tuloy po!” kinunana.
Ngem inggawid ni Tricia ti takiag ni Ella. “Oo nga pala, si Cherrie!” inyam-ammona ti kaduada.
Nakibesobeso ni Ella ken ni Cherrie sa pinerrengna ni Tricia. “Ang syota mo?”
Naglibbi ni Tricia. “Ayaw ko na sa kanya. Masyadong weird!”
Nagkatawa ni Ella. Nagpatengnga kada Tricia ken Cherrie sa ginuyodna dagiti imada. “Tuloy kayo, tito, tita,” sana intaliaw kada Mr. ken Mrs. Cortez.
Simmabat da Manang Mameng ken Mang Bianong.
“Happy birthday, komadre!” inkablaaw ni Mrs. Cortez sa nakibesobeso. Inyawatna ti naikarton a nabungon iti pumirak a papel a regalona.
Kinalbit met ni Ella ti bukot ni Johnny a nakatallikud a nakatugaw a mapitpitpit iti isemna. “Tayo naman!” kinunana sa immaklili idi makatakder ni Johnny.
“G-good afternoon, este, evening pala!” intamed ni Johnny.
“Kayo pa rin ba? Ang tibay naman ninyo!” inkatawa ni Tricia sa inyam-ammona ni Cherrie.
“A-e…” Kinita ni Johnny ni Ella Uray la nagdusngi iti sakit ti kikit ti dapanna a binaddekan ni Ella.
“Anong palagay mo sa amin!” kinuna met ni Ella sa inirutanna ti kawitna iti puon ti takiag ni Johnny.
“Y-yes, este, wen!” Uray la nagsawaw ti gigis ni Johnny iti koriente ti bara ti barukong ni Ella a naidennes iti abagana.
Alas nueben idi malpasda a mangrabii. Isu pay la ti pannakaipasnek da Tricia, Cherrie, ken Ella nga agpipinnadamag. Immakarda kadagiti bakante a tugaw iti lamisaanda tapno makapagiinnassideg met dagiti dadakkelda.
”Oo nga pala, member ng women’s boxing team sa school si Cherrie. Pareho kayong mahilig sa sports!” kinuna ni Tricia. “Si Ella ang sinasabi kong katropa ko na naloloko sa sabong!”
“Ah, ganun ba? Pumupusta ka lang, ganun?” Masmasdaaw ni Cherrie a nangperreng ken ni Ella. “Di ka ba natatakot? Puro mga lalaki ang mga kasama mo sa sabungan. At balita ko nakakatakot ang tari ng mga manok!”
Nagkatawa ni Ella. “Noong una, medyo takot. Pero nasanay din.”
“Hindi lang pumupusta, umaakyat sa ring at siya mismo a nagbibitaw sa manok niya na ilalaban!” impadamag ni Tricia. “At ibinalita ng classmate kong mahilig din sa sabong na kung ilang beses nang nag-champion sa derby. Totoo bang tinalo mo pa ang erpat niyang si Mister Bitangcol?”
Nagtung-ed ni Ella. “Tsamba lang!”
Ad-addan ti panagraem ti ikikita ni Cherrie ken ni Ella. “Wow!”
“At sabi ng classmate ko, siya ang tinaguriang reyna nila. Kasi siya lang ang babaing handler sa Metro Manila at karatig na probinsiya, kung hindi sa buong bansa!”
“Kaso, boring na rin. Narating ko na kasi ang ultimate goal ko, at goal din ng ibang mananabong—ang maging champion! Ibig sabihin, hanggang dun na lang!”
Iti nangpanawanda kenkuana, alusiisenen ni Johnny. No kuan agsikkawil nga agpatigerger ket no sadino la ditan ti pangiturturonganna iti panagkitana. Nauman nga agtangtangad ta nabilangna aminen dagiti bombilia ken dagiti kasla agkikibin a maris dalem a kuadrado a dekorasion ti puraw a bobeda. No namin-anon a kayatna ti sumampitaw iti panagpapatang dagiti nataengan. Ngem agturay met latta ti indakdakkelna a pannursuro dagiti dadakkelna—ti saanna nga isasampitaw no agsasarita dagiti nataengan, malaksid no iramanda iti saritaan.
Nasinga ti panagpampanunot ni Johnny idi agkiriring ti selponna. Kinautna daytoy iti bolsana. Ni Dex ti umaw-awag. Nagpakada ken ni Mang Bianong ket nagdardaras a rimmuar. Amangan no sinerrek manen ti mannanakaw ti mini-farm, naisipna.
“Hello, Dex! Apay? Ania, kuykoyek dagiti tedda tapno adda pulotanyo? Sus! Buffet style, eh! ‘Tay eat all you can. Ha? Kasano? Punnuek ti pingganko ket libasek nga isupot? Naay, narigat, a! Wen, a, no iti punsionan idiay probinsia agtayab pay dagiti pinggan. Wen, a, he-he-he! Adda pay dagiti makipagparti, a, nga agibolsa ‘ti karne. No saan, tultulang a sidanto kano ti asoda. Ngem makadominggo met a lalauyaen ken ig-igupenda ti digona! Apay ngamin a dikay' immay? Saanyo a lubong ti kastoy? Sabagay, maymayat, a, dita kalapawmo ta maaramidyo ti kaykayatyo. Saanyo a rukrukoden ti garawyo ken diyo pilpilien dagiti balikas nga usarenyo. Sorry, Dex, balonankayonto laengen iti pulotanyo no umayak manen dita. Happy drinking ken pulotaning kadakayo kada Elmer ken Jong. Bye!”
Napukaw ti irteng ti rikna ni Johnny iti pannakipatangna ken ni Dex. Umis-isem a nagsubli iti uneg. Idi makita ni Ella, pinayapayan daytoy.
“Join ka na sa amin!” kinuna ni Ella ken ni Johnny ket inseniasna ti panagtugaw ti baro iti abayna.
“Anong height mo?” sinaludsod ni Cherrie ken ni Ella. “Matangkad ka sa akin eh!”
“Five seven!”
“Ha?” Nagtimbukel dagiti mata ni Cherrie. Pinarukibanna ni Johnny.
Nupay parukib ti ikikita ni Cherrie, kaskasdi a nasiputan ni Johnny ket kasla naitalmeg ti tuktokna. Kampay idi, awan ti nakitana ket binilangna manen dagiti bombilia iti bobeda.
Nagkatawa ni Tricia. “Baka puwede sa team ninyo!”
Nagtungtung-ed ni Cherrie.”Oo nga, ano?” kinunana. Pinerrengna ni Ella. “Gusto mong sumali sa tryout? Kasalukuyang pinalalakas ang team.”
Nagkatawa ni Ella. “Naku po, masasaktan ako! Di ako marunong sumuntok eh!” kinunana
Iti dayta a kinuna ni Ella, saanen a nakateppel ni Johnny. “Kayang-kaya mo, El!” kinunana. “Amin a panangrugi, mangrugi iti sero, di ba? Masursuromto, a!” indurogna. Kasano ngamin ket napanunotna a daytoyen ti gundaway a pannakailisi ni Ella kadagiti mangal-alunos a panagkita kenkuana dagiti mammallot aglalo no umuli iti ring. No namin-anon a kayatna ti dumanog no kasdiay a makangngeg iti nagartem a balikas dagiti mammallot. “Ammom kadi a no mabalin, kilawendaka idiay galiera?
Nupay nayanak ken dimmakkel iti siudad, naawatan ni Tricia ti kayat a sawen ni Johnny ta nakapatpatang met dagiti dadakkelna iti Ilokano iti balayda. “Ganun ba?” kinunana. “Sige, subukin mo, El.”
“Di ko ma-imagine ang sarili ko na nakikipagsuntukan sa gitna ng ring. Sa sabongan, bibitiwan ko lang ang manok ko sa harap ng kalaban at bahala na itong makipagbakbakan. Magsisisigaw na lang ako!”
“Mas masarap ang feeling kung ikaw mismo ang lumaban. Subukin mo,” insungbat ni Cherrie. “Oo, masasaktan ka rin, pero ganyan naman lahat ang competition. Ako nga noon, umiiyak ako pag matalo at bugbog pa. Pero natuto ako.”
“Subukan mo lang!” intung-ed ni Tricia.
“Sige na, El. Kayang-kaya mo!” impasaruno ni Johnny.
“Panunotek,” kinuna met ni Ella.
Saan pay koma a nadlaw da Ella ti oras no saan a nagunian ni Mang Bianong ida. Insenias ni Mang Bianong ti chit. Napan impan ti maysa kadagiti serbidor ti chit.
Nagsubli da Ella iti dati a tugawda. Kinita ni Ella ti chit. Kimmaut iti pagbayadna iti wallet-na.
“Kunin mo ang number ko. Tawagan mo ako pag may time ka,” kinuna ni Cherrie idi addadan iti pagparadaan. Imbasana ti numero ti selponna ken ni Ella.
Nalabesen nga alas dies idi makaawid da Ella. Nakasarsarangsang ti katkatawa ni Manang Mameng ket ammo lattan ni Ella a naragsak ti inana iti panangiruarda iti daytoy. Malaksid ngamin a kasangay daytoy, nabayagen daydi naudi a panagpasiarda iti mall ken pannanganda iti maysa a restaurant iti West Avenue, sa nagbuyada iti sine kalpasanna. Natandaanan ni Ella a ni Mang Bianong ti nagawis ta nangabak ti dua a manokna, a pinaneknekan met da Elmer. Impakitada pay ti dua a nadutdotan a manok nga inyawidda nga inabak kano ti manokda.
“May sulat kayo, ma’am,” kinuna ni Sary idi makalaemda. Innalana ti sobre iti rabaw ti telebision ket inyawatna ken ni Ella.
Kinita ni Ella ti naggapuan ti surat iti rabaw ti sobre. Kaybiga Cockpit Arena. Umis-isem a nanglukat iti sobre.
“Wow!” nayesngaw ni Ella idi mabasana ti surat. Imbitasion gayam para iti 3-Cock Derby. Pati dita Kaybiga, am-ammodan?
“Ania dayta?” sinaludsod ni Mang Bianong.
“Imbitasion iti 3-Cock Derby dita Kaybiga, dad!” Inyawat ni Ella ti surat iti amana.
Nagtungtung-ed nga umis-isem ni Mang Bianong idi mabasana ti imbitasion. Ngem napunas ti isem ni Manang Mameng ket simreken iti siledda nga agassawa.
AGSAGSAGANAN ni Ella a mapan iti mini-farm tapno komustaenna ti panang-training da Elmer kadagiti ilabanda iti paderbi ti Kaybiga idi agtoktok ni Sary iti ridaw ti siledda.
“Ma’am, phone!”
“Sino?”
“Tricia daw po!”
Kinita ni Ella ti relona. Alas otson. Nalpasen ti panang-training da Elmer ken Dex kadagiti lima a manok nga indeliber ti Derriyab Farm a pagpilianda iti ilabanda. Maysa a lawasen a sansanayenda dagitoy.
Ngem imbes a ni Tricia ti sumungbat idi ag-hello iti telepono, ni ketdi Cherrie.
“Akala ko si Tricia ang tumatawag!” kinuna ni Ella sa nakipagkatawa idi mabigbigna ti katawa ni Tricia a sigurado nga adda iti abay ni Cherrie. “O, anong balita na? A, tungkol sa sinabi mo nung nag-dinner tayo? Akala ko ginugudtaym lang ninyo ako. Ipakikilala mo ako sa coach ninyo? Kailan? Mamayang hapon? Sus, busy ako eh. Naghahanda para sa susunod na derby na sasalihan ko. O, sige, pagbibigyan ko kayo. Si Tricia? Sige, mag-uusap kami.” Kinita manen ni Ella ti relona. Naisipna nga amangan no makapanaw ni Elmer ket dina maammuan ti asenso dagiti manok a sansanayenda. Nangngegna ti kinnatawa iti bangir nga ungto. Nabigbigna ti katawa ni Tricia. “Hoy, ipaspasubonak, ha! May pinaghahandaan akong derby, ba. Pero… Sige, pupunta ako. Saan tayo magkikita? Sa Metro University? Abangan ninyo ako sa gate. Luma na ang ID ko, baka di ako papasukin ng sikyu. O, sige, babay!”
Di man ammo ni Ella ngem kasla nakiro ti panunotna. Indissona ti telepono sa nagtugaw. Nagdalikepkep sa nagmulengleng. Isu met a rummuar ni Manang Mameng iti siledda. Nadlawna ti langa ti anakna.
“Bakit? ‘Sino ti immawag?” sinaludsod ti baket.
Nagsakuntip ni Ella. “Da Tricia ken Cherrie, mommy. Agaw-awisda.”
“O, nalagipdaka. Awisendaka nga agpasiar? Mapanka tapno saan la a manok ti as-asikasuem.”
Nagmusiig ni Ella. Kinudkodna ti ulona. “Kaso, kamitingko kano ti maysa kadagiti coach idiay school,” insungbatna.
“Coach? Coach ti ania?”
“Coach ti women’s boxing team ti school.”
Napanganga ni Manang Mameng. Pallot? Boksing? Diosko, ania itan ti turturongen ti panunot ti anakko? nakunana iti unegna. Miningminganna ti anakna. Nakapimpintas nga ubing, makipinnarpar iti rupa?
Ngem kellaat nga adda naggilap iti muging ni Manang Mameng. No maguyugoy ti balasangna nga agkameng iti boxing team, masapul nga agenrol manen. Ket kasla adda naglukat a ridaw iti sango ni Manang Mameng. Mayaw-awanna no kuan ti makipallot, pampanunotenna.
“Sige, subukin mo lang,” kinuna ni Manang Mameng.
Ad-addan a natikaw ni Ella. Isu met nga aguni ti selponna. Kinitana. Ni Elmer ti nagteks. Ur-urayenda kano ta ipolisda dagiti sansanayenda. Saanda kano a nag-training ita ta padigosenda dagiti manokda.
“Panunotek, mommy,” kinuna ni Ella. Timmakder. “’Nak dita farm…”
Immanges laengen iti dakkel ni Manang Mameng idinto ta insurotna ti panagkitana iti anakna.
Magustuan ni Ella ti impakita dagiti manokna iti panangpolis da Elmer ken Dex kadagitoy. “Maaasahan talaga ang breed ng Derriyab. Dapat laging may reserba tayo sa kanila,” kinunana.
“Pangina a pangina,” immusiig ni Elmer. “Ag-breed-tayo laengen. Gumatangtayo iti upada.”
“Saan sa a kayat dagiti dadakkel a farm ti agparuar iti upa. No naumaandan ti upa, kaykayatda a partien ngem ti ilakoda,” kinuna met ni Dex.
“Pag-aralan natin,” insungbat ni Ella. Nangiruar iti kuartana ket inyawatna ken ni Dex. “Bumili ka ng patoka at vitamins,” kinunana a bulonna a nagpakada.
Apagruar ni Ella iti gate ti mini-farm idi maipasabat iti panagkitana ti nakaparada a nangisit a kotse iti batog ti gate-da. Nabigbigna ti kotse ni Mr. Cortez.
Ngem nasdaaw idi lumaem. Kasarsarita ni Tricia ni Manang Mameng iti salas.
“O, narito na siya!” kinuna ni Manang Mameng idi makitana ni Ella.
“Loka! Ania nga emergency ti kaaddam ditoy, ha?” Agkatkatawa ni Ella a nangkuddot kampay idi iti rusok ni Tricia.
“Nagbago ng schedule ni coach!” insungbat ni Tricia. “Isu a binaonnak ni Cherrie a mangsukon kenka, al-alisto. Nasa gym kasi siya! Bihis na!”
Nagpanunot ni Ella. “Akala ko mamayang hapon pa,” kinunana idi agangay.
Kiniddayan ni Manang Mameng ni Tricia.
“May lakad daw. Sige na, bihis na!”
“Sumama ka na para magbago naman ang environment mo!” impasaruno ni Manang Mameng.
Mapilpilit a nagtung-ed ni Ella tapno mapagustuanna ti inana. “Mabiit la'ng,” kinunana ket tinurongnan ti agdan.
Kas ken ni Tricia, shorts ken bitin a blusa ti suot ni Ella idi umulog. Ngem naisem latta ni Manang Mameng.
Lumugandan iti kotse ni Tricia idi arintarayen ni Dex a kimmamakam.
“Kunak no ilabantay' ti maysa kadagiti putot ti ganador ni Boss Bianong,” kinuna ni Dex.
Naimayeng ni Ella. Kinitana ni Tricia. Ngem kalpasan ti apagbiit a panagpanunotna, linuktanna ti wallet-na ket inikkanna ni Dex ti uppat a ribu ken uppat a gasut a pisos. “Dakayon ti mapan. Adda papanak. Good luck,” kinunana ket limmuganen iti kotse.
(Maituloyto)
Napalabas: 1 | 2 | 3 | 4 | 5 | 6 | 7 | 8 | 9 | 10 | 11 | 12 | 13 | 14 | 15 | 16 | 17 | 18 | 19 | 20 | 21 | 22 | 23 | 24 | 25 | 26 | 27 | 28 | 29 | 30 | 31
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
