Maangay inton Agosto 17-18, 2024 iti Red Carpet ti Shangri-La Plaza Mall, Mandaluyong City ti Tingin Southeast Asian Film Festival a pakaipabuyaan dagiti nangabak a pelikula a nangtaming kadagiti mito, leyenda, ken sarsarita idi ugma ti rehion.
Proyekto ti National Commission for Culture and the Arts (NCCA) iti babaen ti Culture and Diplomacy Program daytoy, ti Tingin ti kapautan ken kakaisuna a film festival ti pagilian a naiturong iti pannakapadur-as dagiti pelikula iti Southeast Asia ken kas pangpairut iti relasion dagiti Filipino kadagiti kakarrubada iti rehion iti ASEAN (Association of Southeast Asian Nations) babaen ti pelikula.
Addaan iti tema nga “Enchantments for a Fragile World” daytoy maika-7 a panagsubli ti Tingin a pakaipabuyaan ti innem a full-length a pelikula ken uppat nga ababa a pelikula.
“Mapadayawankami unay a mangiparang kadagitoy a pelikula a nangabak kadagiti mabigbig a film festival iti sibubukel a lubong,” kinuna ni Mariel Nini, pangulo ti Sentro Rizal International Cultural Affairs Office ti NCCA.
Iti pannakaisentro ti festival kadagiti mito ken leyenda ti rehion, kinuna ni Maya Quirino, Tingin festival director, a “tinawing dagiti filmmaker manipud iti nabaknang a tawidda a sarsarita idi ugma dagiti inaramidda a pelikula a kas pangsuma kadagiti baro ngem makadangran a wagas ti panagbiag ken kas agpaay nga angkla para iti gimong a dinudog ti kaawan-rikna.”
Maluktan ti festival babaen ti The Long Walk ti Laos PDR ni Direktor Mattie Do, ti umuna ken kakaisuna a babai a filmmaker ti Laos. Immuna a naipabuya ti The Long Walk iti Giornate degli Autori section ti 76th Venice International Film Festival, ken naipabuya pay iti Contemporary World Cinema section of the Toronto Film Festival.
Magibusan ti festival iti pannakaipabuya ti pelikula ti Filipinas nga In My Mother’s Skin nga indirihe ni Kenneth Dagatan. Damo a naipabuya daytoy iti Sundance International Film Festival.
Mairaman pay kadagiti pelikula a maipabuya ti pelikula ti Singapore a Dreaming and Dying ni Direktor Nelson Yeo. Nangabak ti Dreaming and Dying iti Pardo d'oro para iti Best Feature Film (Cineasti del Presente Competition) iti Locarno Film Festival.
Maipabuyanto met ti pelikula ti Myanmar a Once Upon a Time There Was a Mom ni Direktor Lin Htet Aung. Nangabak daytoy iti Best Screenplay iti Singapore International Award ken naipabuya met iti Rotterdam International Film Festival.
Mairaman pay kadagiti maipabuya ti pelikula ti Vietnam a Memoryland ni Director Kim Quy Bui. Sakbayna, naipabuya daytoy kadagiti international film festival iti Berlin, Busan, Hong Kong, ken Moscow.
Addanto pay ti pelikula ti Malaysia nga Snow in Midsummer ni Direktor Chong Keat Aun. Damo a naipabuya daytoy iti Venice Film Festival.
Mairamanto pay dagitoy a maipabuya: Golden Dragon (Cambodia) ni Direktor Boren Chhith, Worship (Thailand) ni Uruphong Raksasad, Of Other Tomorrows Never Known (Indonesia) ni Natasha Tontey, ken ti Part of Me (Brunei) ni Hazrul Aizan.
Para iti nayon nga impormasion, i-follow ti Tingin official pages (@tinginfilmfest) iti Facebook, Instagram, Tiktok, ken X (Twitter). (Anne M. Cabrera/ Cles B. Rambaud)
