Salaysay ni FROILAN A. MANGOBA
Lagip, dagiti laglagip. A dumteng iti aldaw a nagwerretan ti arapaap. Dagitoy ti kayatko a warwaren ta napateg dagiti aldaw a napalabas. Dagitoy a lagip ti nagbatayak tapno agarapaapak. Ta awan dakesna ti agarapaap.
Inkakaubingak ti aglukib kadagiti babasaen a madaldalapusak, iti man pagadalan (idi agbasbasaak iti elementaria) ken iti pagtaenganmi, agingga a nagnakemak. No agpaili idi ni nanang a mapan makitienda, dumagas iti kabagianmi nga aggatgatang iti Bannawag. Gapu ta linawas idi a gumatang ti ikitmi, no malpasannan a basaen, sublaten met ni nanang. Iti sumaruno a lawas a papanna pannakitienda, isublina ti sinublatna a Bannawag ket bumulod manen iti kaudian a bilang.
Agpatinggaak la idi a manglukiblukib a mangbuya iti linaon ti magasin, ngem idi maistiarkon ti agbasa, piliek dagiti artikulo nga ababa ti pannakaisuratna. Maumaak ngamin idi a mangbasa iti atiddog a pakasaritaan wenno no nobela. Immuna a nagduyosak kadagiti daniw nga addaan nagpipintas a rima. Magustuak man dagiti adda awengna a basaen. Maay-ayoak kadagiti linia nga addaan aweng iti ungtoda. No basaen, kasla maikankanta dagiti balikas, nupay diak met maaw-awatan ti turong ken kaipapananna dagiti basbasaek. Ulit-ulitekton a basbasaen dagili linaon ti magasin agingga a maungpotko amin sakbay a mapan manen isukat ni nanang ti binulodna.
Idi bumaritoakon, padaspadasek met ti sumurat iti daniw ni ayat a kunkunada ta magusgustuak ngarud dagiti maipabpablaak a dandaniw nga adda ayat-ayat a dakdakamatenna. Diak malapdan ti agarapaap. Kayatko idi ti agsurat met para iti Bannawag. Ngem kasano? Ken kasano ngata nga ipatulodko? Diak pay idi ammo dagiti annuroten wenno aramiden tapno makaipatulod iti sinurat iti Bannawag. Ta kayatko met a mabasa ti kaaduan dagiti sinuratko a maipablaak. Kasano a masurotko ti tugot dagiti pagtamdak a mannurat no diak met ammo nga idalan ti idadanon ti sinuratko iti publikasion?
TI BANNAWAG KEN SIAK (41): Kasla Adda Naglukat a Baro a Lubong
Nagpatingga lattan nga arapaap ti amin nangruna idi naisilpon ti takiagko iti murdong ti tali ti nuang ken baka. Natukkol ti lapisko idi naigalutakon iti likudan ti witiwit ti arado. Nanumo laeng ti nabangonak a kasasaad ti panagbiag. Saan a kabaelan da ama ken ina nga isakad ti panagadalko. Nagbalin ketdi a pagliwliwaak ti agbasa kadagiti pocketbook ken no adda madalapuskko a Bannawag iti balaymi ken iti kakaarruba.
Iti panangbasbasak iti kolum ni Ma’am Elizabeth Raquel a maipapan kadagiti tips wenno tarabay iti uneg ken ruar ti pagtaengan, pinadasko ti nagsurat ket impatulodko ken ni Ma’am Ely. Naipablaak ti sinuratko iti nasao a kolum.
Naragsakanak, impapanko a maysaakon a mannurat. Ngem inambisionak ti agsurat pay ta kayatko ti makaipablaak iti bukodko iti uray daniw laeng. Ngem daksanggasat latta ta di metten nasunotan. Mabalin a saan a talaga nga isu ti kaibatogak.
Ngem naregget latta ti panunotko a sumurat. Pinadasko pay ti nagsursurat kadagiti radio station, kadagiti programa a pakaibasaan dagiti surat (letter). Kayatko a maasa ti panunotko tapno makasuratak laeng. Saan a mapukaw dagiti kayat ken pagesseman nga aramiden. Idi maaddaanak iti selpon, adda nasarakak a page ti Facebook a pakaipaspaskilan dagiti pakpakatawa, burburtia, dandaniw nga Ilokano. Naay-ayoak a nagbasbasa kadagiti maipaspaskil a daniw. Pindasko met ti agsurat ket maaprubaran met dagiti ipaskilko a daniw. Ngem kuna ti maysa a gayyem iti dayta a grupo: “Dimo sayangen dagiti balikasmo, atanud, umayka idiay Facebook group a yanko ta idiay nga ipakatmo ti laingmo nga agabel kadagiti balilkas, ta adda bileg dagiti balikas nga ar-aramatem.”
Iti panagsintirko, kabaelak siguro nga inderen dagiti letrak ken aramaten ti husto a pannakausar dagiti balikas.Nasursurok dagitoy ket isu ti nangted karit kaniak. Dayta ti pagpangalak: karit iti kabaelak. Pinadasko ti nagsurat manen. Pinadasko ti nagarapaap manen. Nagdaniwak nupay nanumo ti kabaelak. Inyatangko ti damo a daniwko iti Bannawag. “Atang” ti paulo ti umuna a daniwko a naipablaak (Nobiembre 16-30, 2021 a bilang). Isu dayta idi ti innak inar-arapaap. Uray maysa laeng ti innak maipablaak . Makaanayen a ragsak a mangliwliwa iti innak panagarapaap. Ngem napasarunuan pay dagiti naipablaak. Naay-ayoak a nangbiag ti plumak. Nagsasaruno dagiti gundaway nga inted kaniak ti Bannawag. Diak ammo no mano pay dagiti gundaway a maipaay kaniak. Agsuratak latta ken agtultuloy nga agarapaap. --O
TI AUTOR: Agnanaed iti Hilario, Banna, Ilocos Norte. Maysa a mannalon ken allawagi. Ken mannurat ti Bannawag.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
