Daniw ni MICHAEL JOHN BAXA ANCHETA

Lilang Dalen, agsarunokayo gayam
Ti panagkasangay ken ni nanangko a Weng
A nangipasngay kaniak, siak nga inin-inawna
A maysanto met a mannaniw a maysa a mangimaldit
Ti pakasaritaan ti kinalatakmo ken kinaandur
Sipud idi agingga ita a masmaspasingked
Iti Ilokano a napuotan ken kaputotan nga agab-abel
Umaykonto man pasiaren, Lilang Dalen
Dagiti inabelmo a buklentanto a kawes a nalagda
Dagiti namaris a bullalo a nasedsed
Nalinay iti kayo a makinilia
Lilang, nayanakka idi Agosto 13, 1924
Iti ili ti Pinili, iti natan-ok a daga Ilocos Norte
Maysa kadagiti kangrunaan iti pannakataginayon
Ken pannakapabaknang ti ay-aywanan a tradision
Ti kannawidan ti panagabel dagiti Ilokano
Nasursurom sipud agtawenka iti sangapulo ket innem
Babaen ti bayabay dagiti pamay-an ni manangmo
A nagsukogam nagballigika a tugot kadagiti kaputotan
Dagiti babbai iti tunggal pagtaengan
Ti panagabel ti reggetmo, ti nagsalogam
Linglingay ti kinabalasangmo iti laksid
Dagiti karit iti biag a nangiborda
Kadagiti arapaapmo a nangibandus kenka
Iti rag-o ken kinabileg ti sirmatam nga imbubosmo
Iti tunggal abel nga inka pinarnuay
Daytoy a naisalsalumina a talugadingmo, Lilang Dalen
Naisangsangayan nga abel nga awanan pormal a panagsanay
Ngem tugotmo ti dida maartapan, sika ti nakabael
Kadagiti saan nga asi-asi a disenio agraman
Dagiti tekniko ti panagabel a maanninaw
Kadagiti abelmo a kas ti borda ti "Inubon a Sabong"
Mainugot unay a napadayaawanka, Lilang Dalen
A kas "Manlilikha ng Bayan," anian a pannakabigbig
Ti akemmo, ti dedikasionmo a mangiladawan
Iti pannakapreserbar ti kultura, a mangipaganetget
Iti disiplina ken panagkumit iti panangtagiben
Iti pakasantakan dagiti Ilokano, Lilang Dalen, no awanka,
Awan ti mangsalaknib iti di magatadan a tawid ti inabel
Para kadagiti masakbayan a kaputotan, a mangidur-as,
Mangitandudo iti naisangsangayan a talugading ken gupit.

Lilang Dalen, isagutmi kenka ti nasayamusom, naranga
A balangat, ket padapadakam' a mangrambak
Iti maikasangagasut a panagkasangaymo
A kas Ina ti Inabel iti entero a pagilian!

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!