DAKKEL ti akem ti Bannawag iti pamiliami. Manipud iti daydi tataymi (Ernesto Bisquera) a maysa a mannurat ti Bannawag; siak, a simmurot iti tugot daydi amami; ken ti barok a ni Joel, nga uray agar-aripapa pay laeng, masurotanna metten ti dana nga agsurat. Adda pay ni manongko (Edmundo Bisquera), a presidente ti GUMIL DepEd-Pangasinan, a mangyal-alikaka met iti Literatura Ilokana ken matagtagibi met nga agsurat. Iramanmo pay ni inangko (Josefina) a di mangliway nga agbasa iti Bannawag. Dagiti kakabsatko a managbasa met iti Bannawag, agraman dagiti assawada. Ken di met mailaksid ti panagayat ti kaingungotko (Rey Guerrero) gapu iti laingna nga agbasa iti Bannawag.
Nangrugiak a nagbasa iti Bannawag idi addaak iti elementaria. Mabalin nga ibagak a nakasursuroak a nagbasa gapu iti panagbasak iti Bannawag. Diak malipatan ti nobela daydi amami a napauluan iti “Isla Asul” ken ti saritana nga “Angep ti Bolintaken” a nangusaranna iti Emma La Bangcag a pen name gapu ta madama pay laeng idi a maiserserye ti “Isla Asul” a nobelana. Karegget daydi amami ti agsurat idi addaak iti elementaria. Ket gapu kadagiti nabasbasak a sinuratna, agraman dagiti dadduma pay a nobela kas iti “Nagpintaskan, Ma’am!,” “Congressman Pitong,” “Laharman” (komiks), ken dadduma pay, iti naganus a panunotko, kinunkunak a makitakto koma met ti naganko iti daytoy a magasin.
Addaak iti hayskul idi mangrugiak nga agsuratsurat iti sarita ngem gapu ta diak met masurotan ti Ilokano grammar, kanayon a dillawennak daydi amami. Insardengko ngarud ti agsurat ngem gapu ta umapalak kadagiti makitkitak a nagan tunggal agbasaak iti Bannawag, inkeddengko nga ituloy manen ti agsuratsurat. Ket tunggal itugotnak daydi amami iti pasdek ti Liwayway Publishing, Inc. idiay Pasong Tamo, Makati a yan pay laeng idi ti opisina ti Bannawag, maragragsakanak a makakita kadagiti kameng ti editorial a mabasbasak laeng ti naganda.
TI BANNAWAG KEN SIAK (41): Kasla Adda Naglukat a Baro a Lubong
Mangisursuroakon iti kolehio idi timmured ti nakemko nga agipatulod kadagiti sinuratko a sarita. Kinunkunak iti nakemko, masurotakto latta ket maawaganakto met a mannurat. Makitakto met ti naganko iti Bannawag. Ket iti maysa nga aldaw nga innak gumatang iti Bannawag, nakitak ti naganko! Gimmatangak a dagus. Inukagko ket kinitak manen ti naganko. Diak pay binasa ti linaon ti magasin.
Inyawidko ti Bannawag. Ket inukagko manen. Adda latta a makitak ti naganko. “Nagsina ti Dalanda,” Sarita ni Estela A. Bisquera.
A, wen, naganko a pudno! Dayta ti sarita a nagdamdamuak. Nakaserserioso a sarita ta naadaw pay iti Biblia ti nagan dagiti agbibiag. Ken naipasurot ti temana iti tema ti kabibiag da singin a Cain ken Abel.
Ketdi, nupay “Nagsina ti Dalanda” ti paulo ti umuna a saritak, saanak a simmina iti sidong ti Bannawag. Nagbalin ketdi daytoy a paset ti biagko. Napasarunuan pay daytoy a saritak, ken adda metten sumagmamano nga ababa a nobela ken salaysayko a naipablaak iti Bannawag.–O
---
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.mb.com.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
