Ania ti mapasamak kadagiti kasar nga inannong ni napatapuak a Bamban, Tarlac, mayor Alice Guo no mapaneknekan a saan a Filipino citizen daytoy dati a mayor?
Sinaludsod daytoy ni 4Ps Party-list Rep. JC Abalos idi rabii ti Lunes, Sept. 16, bayat ti House plenary session ti singasing a 2025 budget ti Philippine Statistics Authority (PSA).
Segun ken ni Abalos a maibatay iti linteg, asino man nga awanan iti autoridad a mangannong iti kasar, dina met mapagbalin nga opisial wenno bigbigen ti linteg dayta a kasar.
Kas isponsor ti PSA budget, insungbat ni Marikina City 2nd District Rep. Stella Quimbo, nga iti agdama, adda pay laeng ti PSA iti proseso a panangkanselarda iti birth certificate ni Alice Guo. Nga apaman nga aprobaran ti korte daytoy, sublianda dagiti kasar, no mano ken no adda man, nga inannong ni Guo.
Gakat a mangisardeng iti mother tongue a pangisuro, nagbalinen a linteg
Nupay kasta, iti maysa a chance interview kadagiti reporter ti Kamara, kinuna ni PSA National Statistician Dennis Mapa nga ad-adalenen ti PSA ti maipanggep kadagiti inannong ni Guo a kasar iti kanito a maibabawi ti Filipino citizenship daytoy.
Innayon ni Mapa a kinuna dagiti abogadoda nga adda met probision ti linteg a no naaramid ti kasar “in good faith,” saan a nasken a maibabawi ti kasar.
Nainaig ni Guo iti ilegal a Philippine Offshore Gaming Operators (POGO) ken maysa ita kadagiti kangrunaan a bisbistaen ti Kongreso maipanggep iti daytoy nga issue.
Itay napan a bulan, pinatapuak ti Office of the Ombudsman ni Guo a kas mayor ti Bamban, Tarlac, kalpasan ti pannakatakuatna a nagbasol iti grave misconduct. (ELLSON QUISMORIO/ MANILA BULLETIN/ Cles B. Rambaud/ Bannawag)
