1

adda kailiak no agkalida

man ti pakaidulinan minatay

anian adda al-alikutegda,

agibulsitodat' ramramay, ay!

kuskosonda daydiay rurog tapno

nalinis a pakaisuysuyatan

'tay basi't abayda, atanudko,

panaginum siddukor 'tay awan.

'diay ramay a pidutenda iti

diding malabsanda a balbalay

isaluket: kano 'ton rabii

agpatnag patit, ay! ay-ayda pay.

sabasabali la nga agpayso 'tay

ugali, 'toy puli naka'y-ay-ay.

2

We all mourn differently and memorialize our loved ones in different ways...I believe part of my uncle Filip is still there, literally and figuratively...

--panagamin ni prince midnight* no sapay pinagbalinna a gitarra ti rurog ti ulitegna a natay iti disgrasia 'diay gresia idi dekada '90.

pudno man ken saan, atanudko,

magunggongka 'ti kintayeg no 'tay

makitam ti kaanakan daytay

pimmusayen awanen lubongmo.

rurogna kalpasan watiwat ti

adu a panawen ta nagbalin

gitarran notanan agal-allin –

kaanakan naiduma a puli.

adda man 'tay kullayaw 'ta uneg

saanmon nga ipangag pay denggem

lattan 'tay piesan prince midnight – daytay

laingna adda iti panagpendeg.

daytoy 'tay musika ipan laem

adda 'tay talugading minatay.

*gitarista a taga tampa, florida, dakkel ti panagraemna iti pimmusay nga ulitegna nga aw-awaganna laeng iti uncle filip, maysa met a gitarista idi sibibiag pay.

3

pagin-inanaan immun-una

iti solar a di kadakkelan,

sadiay kailiak agur-urayda

ken apo daya ti kakellengan.

sadiay adda da lilok,* dagiti

dadduma a kabagiak nga innak

nakita, nakasasao idi

ubingak pay iti pagpagnaak.

di nagbayag adda innayondan

da apo nga adda iti poder,

iti bantay 'diay abay pagnaan,

'di un-una manglunag 'tay kidser.

'diay bangir ti bantay adda sadiay

dadduma a gaput' panagliday.

*cbc (1959); jgc (1960); mcc (1953); jcc (1954).

4

ta uray siak agsidsiddukorak

idi no makakitaak puraw

a panteon, ay! siak 'tay maal-aliaw,

kasla maet-etan idit' riknak.

no mabalin diak pay tumaliaw ta

kas man adda makitak diak kayat,

kasla riknak idit' matagtagbat

no 'tay labsak lugar ti inana.

saanakon a mabuteng ita

ta uray pay siak 'tay agpatpatnag

yan dagiti dadakkelko, pati

ni manongko* – padasendak koma.

kaduaendak tapno daytoy salbag

makitada a di agkakari.

*fbc (1963); bcc (1978); wvbc (1998).

5

adda apges ig-igid ‘toy matak,

kas man kayatko ‘tay maturog pay

koma, anian ita ik-ikutak

riing awan man la ‘tay murmuray.

daytoy teltel adda panagsakit

gapu ngata’t sakbay panagriing,

kas man daytay adda sumapsaplit,

makaited ‘tay erteng daytoy pingping.

adda lablabitna ‘toy turogko

adda ‘tay kurangna, ay! ngem ania

ngarud ‘diay panggedan ‘toy mugingko

mapan manen agsapul gasatna.

iturogkonto laengen no ‘tay

makasangpetakon sadiay balay.