Inispal dagiti kameng ti Philippine Coast Guard (PCG) ti mangngalap a 46 nga aldawen a mapukpukaw a nasarakanda nga agkatangkatang iti taaw ti Batanes, 635 a kilometro manipud probinsia ti Quezon a naggapuanna.
Nasaran ti PCG ni Robin Dejillo, 49, a taga-Dinahican, Infanta, Quezon a sibibiag itay Septiembre 19, 2024 a kumkumpet iti bilogna iti baybay ti Basco.
Segun iti PCG, inreport ti CGS Northern Quezon a mapukpukaw ni Dejillo idi Agosto 4 idi nagkalap iti baybay ti Infanta.
Kinuna ti PCG a saan a nakasubli ni Dejillo iti mother boat gapu ta naibusan iti gasolina ti bilogna bayat ti panagkalapna.
Idi naammuanda a mapukpukaw ni Dejillo, inwayat ti PCG ti search and rescue operation agingga nga adda nakitada a puraw a bilog ken lalaki a nakalugan iti daytoy, nga isu ni Dejillo.
Video ti China Daily, kinondenar ti DFA
Tinulongan ti CGS Batanes ni Dejillo ket ingguyodda ti bilogna iti sangladan ti Basco, sa inyallatiwda iti Batanes General Hospital tapno maagasan.
Kalpasan a nataming iti ospital, binaon ti Coast Guard Aviation Command ti maysa nga aerial asset daytoy tapno yawidda ni Dejillo iti Infanta.
Kinuna pay ti PCG a nakalasat ni Dejillo iti nasurok a makabulan iti baybay babaen ti panaginumna iti danum ti tudo ken pannangan iti ikan. Nakatulong met kenkuana dagiti niog nga agtatapaw iti baybay. (Martin Sadongdong/Manila Bulletin//Lito Hilidon/Bannawag)
