UBINGAK pay idi ngem makiin-innunaakon kadagiti kakabsatko a mangtukma iti Bannawag nga isangpet daydi Dios-ti-aluadna a Metodio B. Velasco a tatangmi. Empleado ti DPWH-Bangued, Abra daydi tatang ket tunggal malem ti Biernes nga agawid. Dina maliwayan ti mangisangpet ti Bannawag. Diak pay la ammo idi ti agbasa ngem magagaranak la unay a mangkita no adda manen sarita daydi tatangmi a naipablaak iti Bannawag a kas mangmangngegko met laeng iti daydi tatang.
Aglima ngatan ti tawenko idi agessemakon nga agsursuro nga agbasa. Dagiti sarita a sinurat daydi tatang ti damo unay a nagad-adalak nga agbasa. Idi addaakon iti Grado 1 iti La Paz Central School, La Paz, Abra, nasayuden ti panagbasak iti Bannawag. No kunaek nga awan labsak a basaen, mabalin unay.
Tawen 1992 idi nagretiro iti DPWH daydi tatang. Naguyugoy met a timmapog iti tay-ak ti politika. Nagkandidato a kameng ti Sanggunian Bayan ditoy ilimi a La Paz. Sakbay a nadanon idi ti panawen ti kampania, matandaanak la unay nga adda saritana a naipablaak iti Bannawag. Daydi ti naudi ta idi napagasatan a nangabak nga SB, awan metten panawenna nga agsurat. Patiek ketdi a ti kinamannuratna ti maysa kadagiti gapuna a napagasatan a nangabak nga SB.
TI BANNAWAG KEN SIAK (41): Kasla Adda Naglukat a Baro a Lubong
Maysa a kaanepan a mannurat ti Bannawag daydi tatang idi panawenna. Ammok daytoy ta maammuak latta no adda naipablaakna. Ket idi 1994, napadayawan a Pedro Bucaneg awardee, kaduana dagiti kabaddungalanna a mannurat a da Appo Leonardo Q. Belen, Pedro L. Limos, Melchor B. Gasmen, Guillermo R. Andaya, Pedro Ubongen, Bienvenido Cabras, Paterno S. Ojastro, Mauro F. Guico, ken Abraham Pasion.
Nakaad-adu idi dagiti Bannawag nga urnong daydi tatang a nakadispley iti maysa a lamisaan iti kuarto a pagsursuratanna. Idi naasawaankami aminen nga annakda, duduadan nga agkabkabbalay iti daydi nanang (Patrocenia). Nalabit dida nauk-ukag dagiti dadduma a Bannawag ta iti naminsan nga isasarungkarko, adda paset dagiti dadduma a kopia nga inanay.
Idi 2008, pimmusay daydi tatang gapu iti sakit. Ti nakas-ang, awan man laeng uray maysa kadakami a lima nga annakda iti daydi nanang ti nakatawid iti laingna a kas mannurat ti Bannawag.—O
---
