Impakaammo ti National Bureau of Investigation (NBI) ita, Septiembre 27, 2024 a kinemmegda ti pito a tao a maatap a naigamer iti online fraud.
Binigbig ida ti NBI a da Arnel Bautista Dayrit, Reniel Vergara Pabalan, Sharlene Manliclic Agustin, Amanda Eunice Roaquin Turalde, Mark Jhondell Dumarus Padua, Vanesa Manliclic Agustin, and Kaey Ann Agustin Pabalan.
Natiliw dagiti suspek idi Septiembre 20 babaen ti nagtipon a puersa ti NBI-Pampanga District Office (NBI-PAMDO) ken
ti 301st Special Mission Group ken 300th Air Intelligence Security Wing ti Philippine Air Force (PAF) iti panangipatungpalda iti Warrant to Search, Seize and Examine Computer Data (WSSECD) kontra iti FXTM USDT FOREX TRADING iti Barangay Salapungan, Angeles City iti Pampanga.
PSC, naka-red alert; seguridad ni Marcos, nadoble kalpasan ti pangta ni Duterte
Nasamsam ti 85 a desktop computer; 114 a nadumaduma a selpon; nadumaduma SIM card ken nausaren a SIM card; ken nadumaduma a dokumento nga aglaon iti email, password, ken cryptocurrency wallet address.
Babaen dagiti nasamsam a dokumento, natakuatan ti pudno a nagan ti kompania nga FMD Non-Voices Outsourcing Service, agraman ti nagan dagiti opisial ken agtagikua iti kompania.
Naiwayat ti operasion ti NBI gapu iti naawatda nga impormasion a ti FXTM USDT FOREX TRADING ket maysa a cryptocurrency scamming hub a mangpunpuntiria kadagiti adda iti Estados Unidos, Middle East, ken Europe.
Maatap nga ar-aramatenda ti social engineering, love scam, impersonation scam, phishing link ken malisioso a website tapno makaallukoyda nga agpuonan iti cryptocurrency platform.
Maidarum dagiti natiliw iti Angeles City Prosecutor’s Office iti computer-related a kaso maibatay iti Section 4(b)(2) of Republic Act No. 10175, wenno ti Cybercrime Prevention Act of 2012. (Jeffrey Damicog/Manila Bulletin//Lito Hilidon/Bannawag)
