Sinupiat ti Filipinas ti panangipapan a "major power rivalry" ti makaigapu iti riri iti South China Sea ta kissayan daytoy ti kalintegan dagiti pagilian a mangpatalged iti masakbayanda.
Daytoy ti inlawlawag ni Secretary ti Department of Foreign Affairs (DFA) Enrique Manalo iti panagbitlana iti Philippine National Statement iti General Debate of the 79th Session of the United Nations General Assembly (UNGA) a naangay iti New York City, Estados Unidos.
Dinakamat ni Manalo dagiti iresponsablie ken napeggad a tignay iti West Philippine Sea (WPS) ket impaganetgetna ti pateg ti panagtulnog dagiti kameng a pagilian iti panagturay ti linteg tapno maaramid ti UN ti akemna a mangrisut ken mangtaming iti ania man a riribuk.
Nupay dina innaganan ti China, insalaysay ni Manalo ti padas ti Filipinas iti gandat daytoy a mangrisut kadagiti parikut iti rehion babaen dagiti nadumaduma a wagas nga ipaay ti UN.
Ruth Padilla, agngayangay a kas Diputado ti Nueva Vizcaya
Impaganetget ni Manalo a ti 2016 Arbitral Award on the South China Sea ti mangbukel iti pundasion ti polisia ti pagilian iti WPS.
Kinuna ni Manalo nga iti laksid ti iresponsable ken napeggad a tignay iti uneg ti mismo a kadandanuman a sakup ti Exclusive Economic Zone ti Filipinas, agtalinaed latta ti pagilian a mangaramat iti diplomasia ken dadduma pay a natalna a pannakarisut kadagiti riri, ta awan ti lugar sanaglubongan ti pangta wenno panangaramat iti puersa a pangrisut iti riri. (Raymund Antonio/Manila Bulletin//Lito Hilidon/Bannawag)
