“AGSIPUD iti ayatmi iti panag-garden isu a naipatakder ti Ayuyang,” kinuna ni Ma’am Leilanie (Leilanie Gaspar Adriano, mannurat ti Bannawag). Nakais-isem a nangpadanon kadakami iti Ayuyang Garden.
Segun kadakuada ken ti asawana a ni Sir Boyet, napanunotda daytoy idi panawen ti angol. Gapu ta di makaruar ti tao iti pagtaengan, nagmulamulada. Mismo pay nga addada iti siudad. Iti Barangay Pila, Laoag City.
Adu ti intukitda. Adu ti mulada a kalamansi. Papaya. Katuday. Kaaduan ti nateng a kas iti lasona. Tarong. Kamatis. Bawang.
Gapu ta saanen nga umanay ti pagmulaanda (agarup 500 a metro kuadrado laeng ti lote), nakapanunotda iti sabali a wagas, ken no kasano a mapaaduda pay ti mulada.
Segun kadakuada, adu ti makitkitada nga agkaraiwarang a pilid. Innalada dagitoy. Dinalusanda. Dinisenio dagiti singin a kakabsat ni Ma’am Leilanie a da Mary Ann ken Marites a naayat iti arte wenno panagdrowing. Kinargaanda iti nangisit a daga. Isu ti nagmulaanda.
Immuna a nagpatakderda iti bassit a kubo wenno ‘tiki house.’ Naaramid daytoy iti kawayan. Napalinis a nasigitsigit a kawayan. Kunam pay, adda met aircon-na.
Pinadasda nga inawis dagiti asideg a papagayamda tapno ipakitada no ania ti makunada iti daytoy.
Aminda, inapresiarda—saan a gapu ta gagayyemda sa Ma’am Leilanie ken Sir Boyet. Isu nga itan, mapanda metten agkakape dita no malpas ti panagopisina. Wenno mapanda agtutungtong.
Manipud iti maysa laeng a kubo, nakitada ti pintas ken pariir daytoy. Nagaramidda manen iti sabali pay. Umanay laeng iti dua a tao ti agyan ken maturog sadiay. Adda met pay maysa a nalawa a kubo a mabalin a panganan ti uray beinte a tao. Adda pay naaramid a maysa a nalawa a ‘tree house’ a makalaon iti agarup treinta a katao.
Maysa a pangawis ti imatang ti tao ken mangtulad kadagitoy ti narangrang a desinio dagiti pilid. Mabalin a pagmulaan. Mabalin met a pagtutugawan. Makaay-ayo ti buyada gapu iti kolor ken desinioda.
“Potensial daytoy ta addan dagiti dati a naimulmula nga ornamental ken fruit bearing trees,” dayta met ti kuna ni Sir Boyet a kaingungotna.
“Pudno, makunami a ‘labor of love’ ta ‘locally sourced’ amin a nausar kas iti kawayan ken nausar a pilid,” insarurong ni Ma’am Leilanie.
“Maysa pay, planomi ti mangipatakder iti “pet café, ipalpalubos ti Apo. Kasla ‘tay farm-to-table set-up a maidiaya kadagiti umay a kustomer,” dayta ti kinuna dagiti agassawa.
Kas kunada, napanunotda nga ikkan kadagiti pilid ta adu ti agkaiwara iti asidegda. Wenno malabsanda. Pupuoran pay dagiti dadduma, a makaperdi iti aglawlaw. Isu nga imbes a basura dagitoy, inresiklodan dagitoy. Napintas la ngaruden a kitkitaen ken pagmulaan, makatulong pay iti pannakasaluad ti aglawlaw.
“Dayta ita ti aw-awagami iti ’pilid of dreams,’ Saanmi a ninamnama a kastoy ti pagbalinanna,” inkatawa dagiti naragsak nga agassawa.
Inawaganda iti Ayuyang ta mabalin ti agrelaks ditoy kalpasan ti makautoy a trabaho iti agmalem.
Ita, saanen nga agsardeng dagiti mapan bumisbisita. Adda metten dagiti lokal a turista.
Kasano ti mapan iti Ayuyang Garden?
Sadino man ti yanmo, mapanka iti Siudad ti Laoag. Manipud iti sentro ti siudad, ibagam latta kadagiti traysikelan nga itulodnaka iti Barangay Pila, Laoag City. Idissaagnaka iti Buy Pass Mini Mart. No madanonmo daytoy, uray magmagnakan nga agpaabagatan. Isu daytan ti Ayuyang Garden!
Ngem nasaysayaat no kontakem a mismo da Ma’am Leilanie G. Adriano, pangulo ti Philippine News Agency (PNA) iti Ilocos Norte-Siudad ti Laoag, ken Sir Noel Abad iti Ilocos Norte Philippine National Police Headquarters, nga akinkukua iti Ayuyang Garden. Mabalinmo a kitaen ti Facebook account-da.
Ala, intayo ngaruden agrelaks ken agkape idiay Ayuyang Garden! --O
