Kiniddaw ni Horacio Castillo Jr., ama ni biktima ti hazing Horacio "Atio" Castillo III, nga adda met koma sungbatan ti University Santo Tomas (UST), kalpasan a nasentensiaan dagiti 10 a kameng ti Aegis Juris fraternity.
Iti maysa nga interbiu iti radio, kinuna ni Castillo Jr. a nagkurang ti unibersidad iti panangsalaknib iti proseso ti panangrekrut kadagiti baro a kameng ti gunglo iti pagadalan, ket naiget koma ti UST College of Civil Law iti inisiasion dagiti fraternity kadagiti baro a kamengda.
Linagip ni Castillo Jr. a dida napukawan iti namnama iti las-ud ti pito a tawen a pannakabista ti kaso. Ket babaen ti tulong ni abogadoda a ni Atty. Lorna Kapunan ken dagiti prosecutor ti Department of Justice (DOJ), naipaay met laeng ti hustisia.
Kinunana nga adda kakabagian dagiti nasentensiaan a nanggandat a makisarita kadakuada ngem masapul nga agdalanda pay iti proseso ti DOJ. (Diann Ivy C. Calucin/Manila Bulletin//Lito Hilidon/Bannawag)
