MAYSA laeng a mannursuro. Saantayo a rumbeng a kunaen. Dakkel ti akem ti maysa a mannursuro iti biag ti maysa a tao. Saan nga asi-asi ti panangmuli iti ubing aglalo kadagitoy a tiempo nga in-inut a taktakawen dagiti gadgets ti kinaasino dagiti ubbing. Dakkel a pagyamanan dagitoy a mannursuro a gapu iti kinaanus, kinagaget ken kinasingpetda mapatanor dagiti ubbing tapno maitundada iti nasayaat a dana.
Napalaus ti panagyamanmi kadakayo amin a mannursuro gapu iti ayat, debosion, ken ayatyo kadagiti ubbing. Kas nagannak, agyamankami. Maapresiarmi amin nga inaramid ken ar-aramidenyo para kadagiti annakmi. Ipatpategdakayo ken pagyamanandakayo. Nakakaskasdaaw ti ipapaayyo a sakripisio kadagiti annakmi.
Kas maysa a wagas ti panangsubadmi kadagiti sakripisioyo, daytoy ti naimpapusuan a kararagmi para kadakayo:
Managayat ken managparabur a Dios, madaydayawka gapu iti ayat ken kinapudnom ken kinamanagayatmomo uray pay idi punganay.
Agyamankami, O Apo, iti gundaway a mangitag-ay kadagitoy a tattao – kadagiti amin a mannursuro.
Ikararagmi ti talna ken pammulotmo iti daytoy a naisangsangayan nga aldaw para kadagiti mannursuro ken kadagiti umay pay nga aldaw. Agyamankami, O Apo, kadagiti ipapaayyo a di matukod ken di makita dagiti mata a bendision.
Dawatenmi, O Apo, dagiti nainlangitan a sirib ken grasia para kadagiti mannursuro iti panagidauloda iti inaldaw. Sika, O Apo, ti mangted iti kired ken pigsada tapno maobrada dagiti akemda nga addaan nasin-aw a puso ken tarigagay a naggapu Kenka.
Ituloyyo, O, Apo, nga ikkan ida iti abilidad a mangisuro, punnuenyo ida iti kinasirib, kinamanagsukisok, kinamanagparnuay ken napnuan gil-ayab nga ayat. Itedyo kadakuada, O Apo, ti rag-o, ragsak ken isem iti inaldaw nga inda pannangsaranget kadagiti pannubok ti biag aglalo kadagiti aldaw a mabambannogda.
Ken para kadagiti aldaw a kasla saan a makaanay ti oras tapno obraenda amin dagiti obligasionda, dawatenmi, O Apo, nga itedmo kadakuada ti milagro a pannakibaet kadakuada, yababam, O Apo, dagiti aldaw a narigat para kadakuada ket ikkanyo iti balligi dagiti sakripisioda ta ammomi, O Apo, a babaen kadakayo, mabalinanmi nga aramiden dagiti bambanag a kasla imposible. Babaen ti grasia ken ti Nasantuan nga Espiritu, maipalagip nga addaanda iti abilidad tapno makaipaayda iti pakaigidiatan ti biag ti tunggal ubing nga iggemda. Ania man, O Apo, ti ar-aramidenda, nakapatpateg dayta. Dagitoy a mannursuro pasetda, Apo, iti panangmuli iti kinalinteg ken kinamaingel ti sumaruno a kaputotan.
Apo, dawatenmi nga ikkam ida iti tulong no marigatanda, grasia no mariknada a nabannogdan, ken talna no kasta a magaburanda iti aramid.
Pakirdem ida babaen ti Nasantuan nga Espiritu Santo babaen ti umno a pigsa ken kired a makatutop iti kaaalikutegan nga ubing iti klase. Tulonganyo ida a mangsarak iti pigsa manipud iti tunggal maysa, kas pammalagip kadakuada a maymaysada a grupo ket adda napigpigsa a puersada no agkakaduada. Babaen ti panagkakadua, masaranget ti amin a pannubok iti biag.
Ipalagipyo kadakuada, O Apo, a saanda laeng nga ibagbagian ti maysa nga eskuela no di ket dakayo ti ibagbagianda, O Apo. Gapu iti daytoy, ti espiritu ken pammulotyo ket maipaay kadagiti amin nga ubbing iti pagadalan ket mamatikami a nabileg unay daytoy.
Itedmo kadakuada, O Apo, ti sagut ken bunga ti Espiritu Santo kangrunaanna ti spiritual discernment para iti tunggal ubing iti klaseda. Iti kasta maaddanda iti puso a mangawat iti tunggal ubing iti naun-uneg ket makitada dagiti ubbing a kas iti panagkitayo. Ikkanyo ida iti panangawat kadagiti nagannak a kas iti panangawatyo kadakuada. Ikkanyo ida iti kabal ti pusoda a panglaban kadagiti negatibo a bambanag ken pampanunot ken buteng iti biag. Ikkanyo ida iti tured a mangibbet kadagiti nasken a maibbatan ken mangtagiben kadagiti bambanag a nasken a masalimetmetan.
Palawlawanyo dagiti pamiliada babaen ti panangilala ken panangyalikaka ket ikkanyo ida iti kired, sabtenyo dagiti masapulda iti inaldaw, pannakaingato ti sueldo ken dagiti benepisioda. Tulonganyo ida a mangyawat kadagiti dandanag ken am-amakda kadagita imayo.
Agayatkayo babaen kadakuada, sapay koma ta agraniagkayo kadagiti rupada; iparukpokyo, O Apo, dagiti bendision ken pabor kadakuada iti amin nga aldaw ti tawen.
Dawatenmi amin dagitoy, babaen iti nagan ni Hesus. Amen.
(Maysa nga inheniero sibil ni Elmer T. Miguel ken agpapaay pay a Pastor iti Lighthouse Assembly of the Almighty God, Marcos, Ilocos Norte.)
