Mamannurat a nangabak iti Albalos 2024 ken AMMAFLA 2024, mapadayawan inton Okt. 18 iti Dap-ayan 2024 ti GUMIL Filipinas iti Siudad ti Candon-Bannawag

Mairaman a mapadayawan dagiti mannurat a nangabak iti 8th Salip iti Sarita ti Mario Abinsay Albalos Foundation Literary Awards ken dagiti mannurat a nangabak iti Maika-25 a Salip iti Sarita ti AMMA Foundation Literary Awards, kas impakaammo ni Mario T. Tejada, chairman ti Awards Committee ti GUMIL Filipinas.

Maangay ti seremonia ti pammadayaw inton Oktubre 18, Biernes, umuna a rabii ti Dap-ayan 2024: Maika-56 a Komperensia Nasional ti GUMIL Filipinas a maangay iti Aloha Nui Hotel, Siudad ti Candon, Ilocos Sur.

Kinuna ni Apo Tejada a dagitoy ti mapadayawan a mannurat, kas maibatay iti listaan nga inted ti Secretariat ti Albalos Awards ken AMMAFLA iti Awards Committee.

Para iti Albalos Awards:

MICHELLE GAMUEDA RAFANAN ti Brgy. Parioc 1st, Siudad ti Candon, Umuna a Gunggona, babaen ti saritana a “Dapo.”

JORGE RICHARD P. GUERRERO ti Brgy. San Pedro, Laoag City, Maikadua a Gunggona, “Pansit Labus.”

JEFFERSON M. SOMERA ti Pilar, Abra, Maikatlo a Gunggona, ”Ni Darna iti Lubong a Nabatoganna.”

Para iti AMMAFLA:

MA. LOURDES LADI OPINALDO ti Ar-arampang, Balaoan, La Union, Umuna a Gunggona, babaen ti saritana, ”Katukad ti Isem Ni Anaya Dela Cruz.”

ARNEL M. ASIS ti Brgy. 4, San Simon I, Bacarra, Ilocos Norte, Maikadua a Gunggona, “Ti Nayaw-awan a Karnero.”

LEAH GABORNO TABIEROS ti Gonzaga, Cagayan, Maika-3 a Gunggona, “Siding.”

Manamnama nga agsaritanto ni Ms. Rafanan kas pannakabagi dagiti nangabak iti Albalos Awards; agsaritanto met ni Ms. Opinaldo kas pannakabagi dagiti nangabak iti AMMAFLA.

Dagiti naghurado iti Albalos Awards: Juan Al. Asuncion, Managing Editor ti Bannawag, pangulo; Linda T. Lingbaoan-Bulong, dati a kameng ti Bannawag ken nagretiro a Senior Editor iti UP Press, kameng; ken Ariel S. Tabag, Literary Editor ti Bannawag, kameng.

Dagiti naghurado iti AMMAFLA: Linda T. Lingbaoan-Bulong, pangulo; Lito P. Hilidon, Content Producer ken Entertainment Editor ti Bannawag, kameng; ken Roy V. Aragon, Content Producer ken Poetry Editor ti Bannawag, kameng.

Ni Jenny R. Alcausin ti Vigan City (agnaeden iti California, U.S.A.) ti isponsor ti Albalos Awards.

Imatmatonan met da Amado ken Gloria Yoro (Nevada, U.S.A), ken Francisco ken Aurora Ponce (Hawaii, U.S.A.) ti AMMAFLA. Kadagiti napalpalabas a tawen, nagbalin a katinnulongda da Mario Orbito (Hawaii) ken Fred Quibol (Hawaii).

Nagpaay met a Chairman ti Secretariat ti Albalos Awards ken AMMA Foundation Literary Awards ni Cles B. Rambaud ti Bannawag. (GF Awards Committee)