IBILANGKO a napintas a gasat ti panangala kaniak ti Bannawag a kas kameng ti Editorial idi 1997. Nangrugiak met iti baba a kas iti kaaduanna a kameng ti Bannawag tapno, kas kunada, masursuromi amin a trabaho iti panangiruar iti magasin. Ngarud, kadagita a panawen, siak ti proofreader. Akem ti proofreader ti mangipanamnama nga awan biddut, kangrunaanna ti ispeling dagiti balikas, manipud puon agingga iti murdong, dagiti amin a linaon ti Bannawag, malaksid ti anunsio. Mairaman payen dita ti umno a gramatika, a rumbeng nga ipakaammom kadagiti nangatngato ngem sika, no agduaduaka no umno wenno saan ti nabasam.
Iggem pay laeng idi ti Liwayway Publishing, Inc. (LPI) ti Bannawag nga adda ti pasdekna iti Pasong Tamo, Makati.
Sakbay ketdi nga immuliak iti maikadua a kadsaaran ti LPI a yan ti Editorial Dept., addaak iti ground floor, iti opisina ti Advertising Department ti LPI. Siak ti akin-akem iti pannakaiplastar dagiti anunsio a maipablaak iti Bannawag. Deskman, dayta ti awagda idi iti kasta a trabaho. Sakbay a maiserrek dagiti linaon ti magasin a kas kadagiti sarita, nobela, daniw, kdp., masapul nga urayenda ti dummy ti magasin a nakaiplastaran dagiti anunsio. Iti lubong ti komersial a publikasion, napatpateg dagiti anunsio ngem ti ania man a linaon ti magasin. Putdanda pay idi dagiti sarita tapno laeng maipastrek ti anunsio.
TI BANNAWAG KEN SIAK (40): Ti Bannawag, ni Sherma, ken Siak
No kasano a nakastrekak iti dayta a trabaho, maigapu daytoy iti masansan idi nga ipapasiarko iti opisina ti Bannawag pambarak met a mangidatag iti sinuratko. Agtrabatrahoak idi iti RCBC Security Department (di unay adayo iti LPI) idi ipakaammo ni Editor Cles Rambaud iti naminsan nga ibibisitak iti opisina ti Bannawag nga agretiron daydi Apo Anselmo Dacanay a Deskman ti Bannawag kalpasan ti 42 a tawenna iti serbisio. Enero 1989 idi. Kunana a napagpapatangan dagiti editor ti Bannawag a siak ti irekomendarda a sukat ni Apo Dacanay.
Kadagita met a panawen, nairuarko ti NAPOLCOM entrance exam, isu nga adda idi panagduaduak a manggammat iti dayta a gundaway. Ngem idi yumanko iti daydi ulitegmi nga adda iti Manila Northern Police District, kinunana a nasaysayaat ti sumrek iti publikasion ngem ti agpolis. ”Ad-adayo iti desgrasia,” kinunana.
Makaparagsak met idi ti akemko iti Advertising Department ta naipaabaga kaniak ti panagipatarus iti anunsio, a para kaniak, napintas met a pagsanayan iti umno a panagipatarus ken panagsurat. Pagsayaatanna pay, maysa idi kadagiti boss-mi iti Advertising ti presidente ti FAMAS ket nairamramankami a naraniagan gapu ta maysakami met kadagiti itugtugotna kadagiti pasken dagiti artista iti pelikula.
Tawen 1997 idi aglusulos ni Apo Jose A. Bragado, Literary Editor idi ti Bannawag, tapno tulonganna ti kaingungotna iti negosioda. Gapu iti daytoy, naital-o ni Cles B. Rambaud, agpapaay idi a News Editor, a kas sukat ni Apo Bragado. Ni Prodie Gar. Padios nga agpapaay idi a proofreader, isu met ti nagbalin a News Editor. Ngarud, agkurangen iti maysa dagiti kameng ti Bannawag—awanandan iti proofreader. Nagkaykaysaan manen dagiti nabati a kameng ti Bannawag (naammuak kalpasanna) a siakon ti alaenda a baro a kameng ti Bannawag—kas proofreader. Isu nga iti dayta a tawen, immuliakon iti maikadua a kadsaaran ti LPI. Napagnunumuan met dagiti kameng ti Bannawag a ni Arnold Pascual Jose ti Laoag City ti sumukat kaniak a Deskman.
No diak mariro, daydi Apo Juan S.P. Hidalgo Jr. a nadanonko iti Bannawag (idi 1997) a kas Managing Editor (Editor in Chief idi ni Apo Dionisio S. Bulong) ti nakaibaga a kasla maysa nga unibersidad ti Bannawag. Nga iti panagbasbasa laeng iti Bannawag, adu ti masursuro.
Mabalin nga agpayso. Ngem iti biangko, ti Editorial Department ti LPI, a nakaikappengan ti Bannawag, ti imbilangko nga unibersidad. Ta nadanonko ditoy dagiti appo nga editor a mangiruruar saan laeng a ti Bannawag no di pay ket dagiti magasin a Liwayway, Bisaya, ken Hiligaynon, ken ti pagiwarnak a Balita. Mabalin a dida ammo, ngem adu ti nasursurok kadakuada, ken adu nga agkakalatak a tattao ti naam-ammok gapu kadakuada. Gapu met itoy, di mabubos ti panagyamyamanko iti panagbalinko nga empleado ti LPI, kangrunaanna, kas kameng ti Bannawag, ta kasla adda baro a lubong a naglukat kaniak. --O
