Inikkat ti Department of Migrant Workers (DMW) ti lisensia ti maysa a lokal a manning agency gapu iti alegasion a pananggundaway a pakairamanan ti panangbiktimana iti 383 a mangngalap a Filipino a nagtrabaho kadagiti barko iti Indian Ocean.
Kinuna ni Sekretario ti DMW Hans Leo J. Cacdac a sanguen ti Buwan Tala Manning Inc. ti pannakawaswas ti lisensiana gapu kadagiti serioso a panaglabsing iti kontrata dagiti mangngalap, agraman ti saan a panangipaay iti sueldoda, di nasayaat a kasasaad ti panagtrabaho, ken di umisu nga oras ti panagtrabaho.
Nagpatulong dagiti mangngalap iti DMW Migrant Workers Protection Bureau (MWPB) idi Hunio kalpasan nga inibturanda ti adu a bulan a pannakamaltratoda.
Kas sungbat, naipaay iti legal a tulong iti 383 a mangngalap nga idarumda ti ahensia, ket suportaran ida ti AKSYON (Agarang Kalinga at Saklolo para sa mga OFWs na Nangangailangan) Fund.
Blazers, inatiwda ti Red Lions; kasangoda ti Cardinals iti NCAA finals
Segun kadagiti mangngalap, saan ida a pinasueldo ken napilitda pay a mangan iti nabanglesen a makan bayat ti panagtrabahoda iti di nasayaat a kasasaad. Napilit pay dagiti dadduma nga ilegal nga agkalap.
Impaganetget ni Undersecretary ti DMW Bernard P. Olalia ti kinadagsen dagitoy a panaglabsing, ta adu a mangngalap ti saan nga agsueldo iti binulan ken di nasayaat a kasasaad no nakalugan iti bapor.
Impanamnama ni Olalia nga ipaay ti DMW ti tulong kadagtii naapektaran a mangngalap bayat ti panangsapulda iti legal a pannakarisut ken panagsublida nga agtrabaho. (Trixee Rosel/Manila Bulletin//Lito Hilidon/Bannawag)
