Maluktan para iti publiko (walk-in participants) ti kangrunaan wenno ti maikadua nga aldaw ti “Dap-ayan 2024: Komperensia iti Literatura ken Lengguahe nga Ilokano ken Pannakarambak ti Maika-56 nga Anibersario ti GUMIL Filipinas” inton Oktubre 19, 2024 (Sabado) iti Aloha Nui Resort, Paras, Candon City, Ilocos Sur.
Naikonsiderar daytoy a pannakayawis iti publiko tapno maakomodar dagiti interesado nga agatendar ngem saanda a nakapagpalista iti pre-registration para iti sibubukel a tallo nga aldaw (Okt. 18, 19, ken 20) ti Dap-ayan.
Innem a tungtongan wenno panel discussions ti maisayangkat iti daytoy nga aldaw (Okt. 19). Uppat a lecturers ti agsarita iti tunggal panel discussion.
Matratar dagiti sumaganad a topiko:
Saanmi a pangpangtaan ti asino man --Malakanyang
Tungtongan 1: Ti Literatura Dagiti Ilokano iti Lubong Dagiti Ubbing;
Tungtongan 2: Ti Panangistoria ni Ilokano iti Lubongna;
Tungtongan 3: Ni Mannurat nga Ilokano ken Dagiti Nadumaduma a Platform-na;
Tungtongan 4: Ni Mannurat nga Ilokano ken Dagiti Entabladona;
Tungtongan 5: Panangsirig Kadagiti Nailanad ken Naipasdek Maipapan iti Ilokano ken Kinailokano ken iti Serbida iti Agdama a Kasasaad ti Biag;
ken Tungtongan 6: Ti Lubong ni Ilokano Kadagiti Istoria Dagiti Mannurat nga Ilokano iti Imatang ti Akademia.
Nalalatak a mannurat ken mannursuro dagiti aglektiur, manipud iti Departmento ti Edukasion ken kadagiti nadumaduma nga unibersidad a pakairamanan ti University of the Philippines, University of Northern Philippines, ken Mariano Marcos State University.
Mainaig iti daytoy a pannakalukat ti Dap-ayan para kadagiti walk-in participant, adda makolektar a registration fee a PhP1,000 iti kada partisipante. Malaksid kadagiti maiburay a lektiur, maipaayan pay iti sertipiko ti yaatendar, dua a merienda ken pangaldaw ti kada partisipante.
Kadagiti interesado, mabalinda ti agrehistro iti mismo a pakaangayan ti komperensia iti bigat ti Okt. 19, wenno mabalinda a kontaken dagiti mangimaton babaen kadagiti sumaganad: [email protected], [email protected]/09176978854, [email protected]/09557280505. (FPMasuli)
