Imbilin ti Office of the Ombudsman (OMB) a maipan iti innem a bulan a preventive suspension ti mayor ti Porac iti Pampanga, ti bise mayor, agraman ti walo a kameng ti Sangguniang Bayan ken maysa a licensing officer, mainaig iti operasion ti Philippine Offshore Gaming Operator (POGO) iti nasao nga ili.
Iti pammilin nga impaulog ni Ombudsman Samuel R. Martires itay Oktubre 7, nasuspende da Mayor Jaime V. Capil, Bise Mayor Francis Laurence C. Tamayo, kameng ti Sangguniang Bayan (Kagawad) Rohner L. Buan, Rafael M. Canlapan, Adrian R. Carreon, Regin B. Clarete, Essel Joy C. David, Hilario D. Dimalanta, Michelle B. Santos, ken John Nuevy L. Venzon, ken ni Licensing Officer Emerald Vital.
Naipaulog ti suspensionda maibatay iti reklamo administratibo a gross neglect of duty nga impila ti Department of the Interior and Local Government (DILG) kalpasan ti pannakaraut ti Lucky South 99, maysa a POGO iti Porac.
Segun iti DILG, ti di panaggaraw ken di panangtungpal kadagiti annongen dagiti opisial ti Porac ti makagapu iti agtultuloy nga operasion ti Lucky South 99 nupay saan a kompleto ti papeles daytoy.
Baro a Bangui Bypass Road, manamnama a mangpalukay iti trapiko iti Amianan a Luzon
Kinuna pay ti DILG a napaay dagiti opisial ti ili a nangipatungpal iti lehislatibo a panangimaton para iti pagimbagan ti Porac LGU (local government unit) ken dagiti umili babaen ti dida panangipaulog iti ordinansa weno resolusion a manglapped ken mangparmek kadagiti krimen iti ikub ti Lucky South 99.
Awan kadagiti nasuspende ti mabalin a makontak tapno mangted iti palawagda, bayat a maisursurat daytoy. (Rey G. Panaligan/Manila Bulletin//Lito Hilidon/Bannawag)
