Impakaammo ti Police Regional Office-2 (PRO-2) a natalna ti panagipila iti kandidatura a naangay manipud Oktubre 1 agingga 8 para iti 2025 Election iti Rehion 2 (wenno Cagayan Valley) inton umay a tawen.
Segun ken ni Assistant Regional Director ti Commission on Elections-Region 2 Jerbee Cortez, 2,291 ti nangidatag iti kandidaturada -- 27 ti para diputado, 18 ti para gobernador, 12 ti para bise gobernador, 105 para iti board member ti probinsia, 190 ti para mayor, 201 ti para bise mayor, ken 1,738 a para kagawad ti ili.
Agkandidato a para gobernador da Ronald Aguto, Ignacio Villa, Lebardo Abad Jr., ken Telesporo Castillejos iti Batanes; Melvin Vargas Jr., Dr. Zarah Lara, ken Edgar Aglipay iti Cagayan; Lolito Bucasan, reelectionist Gov. Dakila Cua, ken Reynison Santos iti Quirino; da Gov. Rodito Albano, Glorieta Almazan, Edgardo Edralin, Emannuel Pua, ken Manuel Siquian iti Isabela; ken da Gov. Jose Gambito, Luisa Lloren Cuaresma, ken Maybelle Dumlao Sevillena iti Nueva Vizcaya.
Kuna ni director ti PRO-2 Police Brig. Gen. Antonio P. Marallag Jr. nasurok a 1,800 a polis ti nadutokan iti nadumaduma a lugar iti rehion tapno maipanamnama ti kinatalged dagiti kandidato, mangsusuportar kadagitoy, ken ti publiko. (Freddie Lazaro/Manila Bulletin//Lito Hilidon/Bannawag)
