Ni Dr. Arthur P. Casanova, pangulo ti Komisyon sa Wikang Filipino (KWF), ti agpaay a kangrunaan nga agsarita iti "Dap-ayan 2024: Komperensia iti Literatura ken Lengguahe Dagiti Ilokano ken Pannakarambak ti Maika-56 nga Anibersario ti GUMIL Filipinas" a maangay iti Aloha Nui Resort, Paras, Candon City, Ilocos Sur inton Oktubre 18-20, 2024.
Iti alas otso iti agsapa ti Oktubre 19, ipaay ni Casanova ti mensahena iti mapan a 200 a delegado a mannurat, mannursuro, ken estudiante manipud kadagiti provincial chapter ti GUMIL Filipinas ken nadumaduma a pagadalan iti Region 1, Region 2, CAR, ken Metro Manila.
Malaksid iti panangidaulona iti KWF, agpapaay pay ni Casanova kas pannakabagi ti pagsasao a Tagalog. Sakbay a nadutokan iti KWF idi rugrugi ti 2020 a kas komisioner, nagpaay a propesor iti Departamento ti Filipino iti Unibersidad ti Santo Tomas. Maysa a mabigbig nga autor ti nasurok a 40 a libro, nalatak pay ni Casanova a direktor ti teatro. (Mark Louie Tabunan)
