Agsapsapul ti Association of Southeast Asian Nations (ASEAN) iti baro a wagas a mangtaming iti parikut iti Myanmar gapu ta awan nagbaliwan ti situasion iti laksid ti pannakabukel ti Five-Point Consensus.
Daytoy ti kinuna ni Presidente Ferdinand Marcos Jr. (PBBM) iti maysa nga interbiu iti 45th ASEAN summits itay Oktubre 9.
Kinuna pay ni PBBM a saan a nagbaliw ti kapanunotan ti Filipinas iti situasion iti Myanmar.
Ti Five-Point Consensus ti agpapaay a pagalagadan ti ASEAN iti panagresponde iti parikut iti Myanmar, a nangilungalong iti pannakaipasardeng ti kinaranggas iti pagilian; panagteppel ti agsumbangir a partido; panagsasarita a mangsapul iti natalna a solusion; ken maipangruna ti pannakaipaay iti tulong. (Betheena Unite/Manila Bulletin//Lito Hilidon/Bannawag)
