Nalmes ti maysa nga 18-anios nga estudiante kalpasan a maitapuak ti manmanehuenna a motorsiklo iti kanal ti irigasion iti Barangay Bulanao, Siudad ti Tabuk, Kalinga, idi rabii ti Huebes, Oktubre 10. Naispal ketdi ti kaduana (back rider) a maysa met laeng nga estudiante.

Segun ken ni Police Master Sgt. Prodencio Atas, spokesperson ti PNP-Tabuk, nabigbig ti estudiante a ni Precious Kate D. Arcio, taga-Barangay Nambaran, Siudad ti Tabuk.

Iti panangimbestigar ti polisia, naammuan a ni Arcio ken ti kaduana a ni Jaslyn B. Tandingan, 19, maysa met laeng nga estudiante a taga-Barangay Bulanao, ket agturongda iti maysa nga establisimiento ti negosio idi maawanan iti timon ni Arcio iti motorsiklo ket naitapuakda iti kanal.

Inarayat ida dagiti nakakita kadakuada a tattao ngem nayanud ni Arcio iti napegges nga agus ti danum ket nalmes. Ni laeng Tandingan ti naisalakanda.

Lokal

Ilocos Sur, Umuna a Puesto iti Regional SubayBAYANI Awards

Nasarakan met laeng dagiti dimteng a taga-City Disaster Risk Reduction Management Office ti bagi ni Arcio kalpasan ti sumagmamano nga oras.

Inadmitir ni Tandingan a nakainumda iti arak idi maaksidenteda. (Freddie Lazaro/MANILA BULLETIN)