Impanamnama ti Office of the Provincial Veterinarian (OPVet) ti La Union a natalged ken umdas ti suplay ti karne ti baboy kadagiti tiendaan iti laksid ti parikut iti African swine fever (ASF) iti dadduma a lugar.
Segun iti OPVet, adda 956 agingga 1,085 ti baboy a maparti tunggal aldaw iti probinsia, wenno katukad ti agarup 10,468 agingga 75,122 a kilo.
Kinuna ni Provincial Veterinarian Dr. Domingo Bobby Calub III, ipatpatungpalda ti nainget a pamuspusan tapno malapdan ti panagraira ti ASF ken masalakniban ti industria ti karne iti probinsia.
Sumagmamano kadagiti impakatda ti culling, ASF testing, quarantine checkpoints, ken farm biosecurity, a nainget nga ipatpatungpal dagiti gobierno lokal (LGU) ken ti Philippine National Police (PNP).
Ilocos Sur, Umuna a Puesto iti Regional SubayBAYANI Awards
Malaksid iti tulong pinansial ken teknikal a maipaay kadagiti naapektaran nga agtartaraken ti baboy, sukimaten ti OPVet ti dadduma pay a wagas kas iti panagadal iti bakuna ti ASF, naing-inget a panagbantay, ken naing-inget a pannakikaduana kadagiti nasional nga ahensia, LGU, ken dagiti maseknan, tapno mapabileg ti resistensia ti industria ti baboy ti La Union a mangsaranget iti ASF. (Hilda Austria/Manila Bulletin//Lito Hilidon/Bannawag)
