Kalpasan ti dua a nagsasaruno a pannakaingato ti hemodialysis benefit package iti uneg ti tallo a bulan idi 2024, impakaammo ti Philippine Health Insurance Corporation (PhilHealth) idi Oktubre 14 a dandanin PhP1 a milion ti dagup ti pinansial a tulong ti maipaay iti tunggal pasiente iti tinawen.
Kinompirmar ti Philhealth ti pannakaingato ti benepisio iti hemodialysis manipud PhP4,000 tunggal sesion agingga iti PhP6,350 kada sesion manipud iti Oktubre.
Babaen ti Circular No. 2024-0023 a nangrugi a dagus idi Oktubre 7, impakaammo ti PhilHealth a dagiti miembro ken dagiti kualipikado a dependent-da nga addaan iti chronic kidney disease stage 5 (CKD5) ket mabalindan a maikkan iti adjusted hemodialysis package iti ania man nga accredited dialysis facility iti lugarda.
Babaen ti panagbalin a PhP6,350 iti kada sesion, maikkan itan ti CKD5 a pasiente iti maximum financial protection a PhP990,600 iti kada tawen, manipud iti dati a PhP624,000 iti kada tawen a session rate.
Ilocos Sur, Umuna a Puesto iti Regional SubayBAYANI Awards
Imbinsabinsa ti PhilHealth Circular dagiti nasken a serbisio a masapul a maipaay kadagiti pasiente a CKD5, a pakairamanan dagiti dagiti agas nga anticoagulation, dagiti agas para iti panangtarawidwid iti anemia, nadumaduma a laboratory test, ken dagiti suplay a kas kadagiti dialyzer, hemodialysis solution, ken maysa a dialysis kit para iti tunggal sesion. Mainayon pay a sakupen daytoy dagiti administratibo a bayad para iti panagusar kadagiti makina a dialysis, bayad ti pasilidad, utilities, ken oras ti staff.
Kinuna ti PhilHealth a magun-od dagitoy a serbisio kadagiti accredited a para publiko ken pribado a pasilidad ti hemodialysis. (Merlina Hernando-Malipot/Manila Bulletin//Lito Hilidon/Bannawag)
