Salaysay ni JENNILYN V. SACULLES

Manipud iti tawa ti balay ti amona, matantannawagan ti autor ti pagbettakan dagiti maitinnag a bomba. Kunana a naimbag la ketdin ta distrito dagiti Kristiano ti yan ti balay ti amona ta no saan, amangan no mairamanda met a matinnagan iti bomba.

Iti kinse a tawen a kabayagkon a mangmangged ditoy Beirut, Lebanon, adun dagiti didigra, pannubok, a napasarak wenno naobserbarak, saan laeng a ti angol a COVID-19, addaka a nakapigpigsa nga explosion, ginggined, sa dagiti no dadduma ket riribuk iti baeten dagiti agsusupanget a grupo lalo dagiti nakabase iti Lebanon kas iti Hezbollah, nga isu itan daytoy agdama a kumarkaro a panagbibinnales dagiti agkakalaban a puersa ket mapagdandanagan nga agtinnagen a naan-anay a gubat.

Kunak man la no iti sine, pabuya, istoria wenno drama ti riribuk ken gubat ngem itan, maimatangakon, ken mapadasan, a mismo,  ti makunkuna a gubat: dagiti sumanengseng a sonic bomb kas kada missile  bomb, dagiti agbettak ket gumluong a mamagarigenggen iti aglawlaw, a sarunuen ti napuskol nga asimbuyok dagiti maur-uram a pasdek.

Kebba iti barukong ken mapakigtotan a rikna, buteng ti nagari iti kaunggak, pasaray diak payen makaturturog iti rabii; agraman panagdigos, yapura payen gaput’ panagbubuteng. Adun a didigra ti  masagrap ti Lebanon iti kaaddak ditoy,  ngem daytoyen agdama a paspasamak ti diakto pulos malipatan uray kaano man iti panagbiagko.

Inaldaw a mangngegan dagiti bomba nga agbettak iti south suburbs ti Beirut ken dagiti drone a maal-allingag iti tangatang, pasaray agtartarayak a sumrek iti uneg ti balay no agisalsalapayak iti luplupot iti balcony.

Manipud met iti tawa ti balay-pagbakasionan ti amona a pakatannawagan ti autor iti baybay. Mapan a 45 a minuto a tarayen ti lugan ti nagbaetan ti balay ti amona ken ti balay-pagbakasionan no saan a nairut ti trapiko.

Numan adayokami met kadagiti lugar a naynay a mapumpuntiria a mabombomba, itartarayanmi latta dagiti bomba a gumluong, agawidkami iti balay-pagbakasionan dagiti employer-ko. Idiay la matutormi ti maturog iti nasimbeng, 'tay awan pampanunotem a panagbuteng ta natalinaay iti aglawlaw.

Saanen a barengbareng ti mapaspasaran ditoy Lebanon ta mairamraman payen a matinnagan iti bomba dagiti tourist spot kas iti Bekaa, Zahleh a napaspasiarko met idi, Adun dagiti napan iti sabali a nasion wenno lugar nga adayo kadagiti mabombomba lalo iti asideg iti beddeng. Adda metten dagiti OFW a nagawid a nagpa-repatriate nangruna dagiti adda iti  South Lebanon ken dagiti awanan iti lehitimo a papeles wenno dagitay awanan employer.

Pagsayaatanna laeng kaniak, maballinmi a panawan ti yanmi a sentro ti Beirut, adda pagkamanganmi  a balay-pagbakasionan dagiti amok iti Byblos Jbeil.. Nagkamangda met laeng ditoy 2006 a ginubat met la Israel ti Lebanon.

Ti autor. Kunana: ”Kastoy ti langak no awan bomba a maitinnag.”