Sisasagana ti Department of Health (DOH) ken Department of Education (DepEd) a mangbakuna iti 165,000 nga adalan manipud iti Grado 1 agingga iti 7 iti amin a para publiko a pagadalan iti Region 1 iti babaen ti Bakuna Eskwela immunization program.
Kinuna ni Director ti DOH-1 Paula Paz M. Sydiongco itay Oktubre 14 nga adda umdas a bakuna a maipaay kadagiti gandatda a bilang dagiti estudiante a mabakunaan, ket umuna a mabakunaan dagiti adda iti para iti publiko a pagadalan sa sumaruno dagiti estudiante iti pribado nga eskuela tapno maikkanda met iti salaknib kadagiti sakit.
Kinuna ni Sydoingco a ti Bakuna Eskwela program ti maysa nga school-based immunization program para kadagiti ubbing a Filipino nga ages-eskuela tapno masalaknibanda kadagiti sakit a malapdan babaen ti bakuna kas iti kamuras, rubella, diphtheria, ken human papilloma virus (HPV).
Maibatay iti datos ti DOH-Regional Family Health Unit, adda 5,738 nga estudiante ti nabakunaan iti measles-rubella (MR) vaccines ken 5,730 nga estudiante iti elementaria ti nabakunaan iti tetanus-diphtheria (TD) vaccines iti Pangasinan; adda met 2,859 ti nabakunaan iti MR ken 2,855 para iti TD iti La Union; 2,319 ti nabakunaan ti MR ken TD iti Ilocos Norte; ken adda met 2,387 a nabakunaan iti MR ken 2,388 para iti TD iti Ilocos Sur.
Ilocos Sur, Umuna a Puesto iti Regional SubayBAYANI Awards
Kinuna ni Direktor ti DepEd-1 Tolentino G. Aquino nga agtultuloy ti panangisayangkatda a mangiwaragawag iti impormasion maipapan kadagiti sakit a malapdan ti bakuna tapno maksayan ti panagkedked dagiti estudiante nga agpabakuna. (Liezle Basa Iñigo/Manila Bulletin//Lito Hilidon/Bannawag)
