Imparang ti innem a probinsia ken maysa a siudad iti Cordillera Region ti kultura ken tradisionda iti maikatlo a Cordillera Festival of Festivals a naangay iti Malcom Square iti Baguio City itay Oktubre 18.
Imparang ti Baguio City ti Panagbenga Festival; idinto nga Adivay Festival ti imparang ti Benguet a nangitampok iti kultura dagiti Ibaloi iti probinsia.
Dua a historical festival ti imparang ti Kalinga -- ti Matagoan Festival ti Tabuk City ken ti Bodong Festival.
Ti Apayao ti nangiparang iti Say-am Naya Apayao, ket Kulpi Ad Ifugao met ti imparang ti Ifugao.
Ilocos Sur, Umuna a Puesto iti Regional SubayBAYANI Awards
Lang-ay Festival ti intampok ti Mountain Province, idinto a Bamboo Festival ti impabuya ti Abra a maysa kadagiti kangrunaan a pagtataudan iti kawayan iti pagilian.
Tinawen a maangay daytoy kas panangrambak iti Indigenous Peoples' (IP) Month iti Oktubre, kas maitunos iti Proclamation No. 1906, Series of 2009, a mangpadpadayaw iti pannakapatalged ti Indigenous Peoples Rights Act idi 1997. (Zaldy Comanda/Manila Bulletin//Lito Hilidon/Bannawag)
