Nasken kadi a maisurat iti Ilokano?
Amin nga idatag a sinurat, nasken a naisurat iti Ilokano ken di pay naipablaak iti ania man a magasin, libro ken kapadada, ken di pay naipaskil iti social media. Makiddaw kadagiti agidatag a basaenda dagiti kaudian a bilang ti Bannawag tapno maadalda no ania dagiti sinurat a maipabpablaak iti Bannawag ken no ania ti ortograpia (ispeling dagiti balikas) nga ar-aramaten ti Bannawag.
Ania dagiti aw-awatenyo a sinurat?
BROADCAST MEDIA: Asino ni Shalimar?
Agawat ti Bannawag kadagiti sinurat a daniw, sarita, salaysay, ken kadagiti para kadagitoy a seksion: “Adda Latta Naasi a Tattao,” “Ti Padas a Diakto Malipatan,” “Ti Makunami,” “Personal a Salaysay,” “Sidingan a Dapan,” “Ladawan Itoy a Bilang,” “Sumagpawak Man,” “Nagimasen, Abalayan!” ken kadagiti dadduma pay a seksion a maluktan, no addanto man. No kasapulan, mairekomendar met a mapakuyogan dagiti idatag a sinurat iti/kadagiti retrato a mainaig iti sinurat ken may-e-mail daytoy/dagitoy iti sabali a file iti JPG format.
Agawat pay ti magasin kadagiti sinurat/kontribusion a para iti bannawag.mb.com.ph (opisial a website ti Bannawag). Bisitaen ti bannawag.mb.com.ph tapno ammoyo no ania dagiti maawat a maipablaak ditoy.
Pagipatulodan?
Maipatulod dagiti sinurat babaen ti e-mail iti daytoy nga adres: [email protected].
Dagiti salaysay ken dagiti sinurat a para kadagiti nadakamat a seksion (malaksid no adda naitudo a sabali a pagipatulodan) maidatag iti Managing Editor. Ilanad iti Subject ti e-mail ti: Para iti Managing Editor (Juan Al. Asuncion).
Dagiti sarita, maidatag iti Literary Editor. Ilanad iti Subject ti e-mail ti: Para iti Literary Editor (Ariel S. Tabag).
Dagiti daniw, maidatag met iti Poetry Editor. Ilanad iti Subject ti e-mail ti: Para iti Poetry Editor (Roy V. Aragon).
Kadagiti agdadamo a mannurat iti daniw, maibalakad a di koma nakurkurang ngem tallo a daniw ti ipatulod.
Maipatulod met laeng dagiti kayat a paipablaak a ladawan para iti Tao, Lugar, Pasamak; Ammuem Pay Dagitoy, ken iti Ladawan Itoy a Bilang ken ni Roy V. Aragon. Ilanad iti Subject ti e-mail ti: Para iti Tao, Lugar, Pasamak; Ammuem Pay Dagitoy, wenno Ladawan Para Itoy a Bilang, c/o Roy V. Aragon. I-attach iti mismo nga e-mail ti file dagiti ladawan (JPG), saan a y-insert iti uneg ti MS Word document file.
Kadagiti amin a damoda ti agipatulod iti sinurat, maibalakad ti panangipatulodda iti ababa a pakasaritaan ti biagda (bionote) ken kaudian a ladawan (JPG file); adres ti pagtaengan, ken mobile phone number.
No adda met kayatyo a paipablaak iti bannawag.mb.com.ph, ipatulod ti sinurat iti daytoy nga e-mail address: [email protected]. Ilanad iti Subject ti e-mail ti: Para iti Website (Roy V. Aragon/ Lito P. Hilidon).
Kasano a maammuak a naaprobaran ti sinuratko?
No mabalin nga ipablaak ti sinurat, makaawat ti autor iti pakaammo manipud iti magasin nga interesado daytoy a mangipablaak iti gapuananna ken no kasano ti pannakabayadna. No awan ti maawatna a pakaammo iti di nakurkurang ngem tallo a bulan, mabalinnan a kunaen a di naaprobaran ti sinuratna.
Gagangay a dagiti salaysay a maipabpablaak iti Bannawag, nakiddaw, no di man insingasing dagitoy dagiti beterano a mannurat. Nupay kasta, agawat latta met ti magasin kadagiti di makiddaw a salaysay ken dadduma pay a sinurat a pakairamanan dagiti sarita ken daniw, ngem saan a responsibilidad ti magasin ti mangilawlawag no apay a di mabalin a maipablaak dagitoy no bilang di makapatar dagitoy iti pagrukodan dagiti maseknan nga editor.
Adda bayad ti sinuratko no maipablaak?
Wen, adda bayad ti maipablaak a sinurat malaksid kadagitoy a seksion: “Tao, Lugar, Pasamak,” “Netizone,” ken damdamag iti “Ammuem Pay Dagitoy.” Maipatulod ti bayad ti sinuratyo babaen ti banko (iti laeng Philtrust wenno Landbank). No maaprobaran ti sinuratyo, mapakaammuankayo tapno itedyo iti Editorial ti nagan ti banko ken account number-yo.
Awan met ti rumbeng a bayadan ti asino man nga agpaipablaak iti/kadagiti ladawan iti seksion a “Tao, Lugar, Pasamak.”
Maipablaak kadi ti sinuratko no agbayadak?
Mabalin a maipablaak ti sinuratmo no agbayadka. Mabalin nga agaramatka iti ania man a lengguahe iti sinuratmo. Mabalin met nga ipatarus ti Advertising Department. iti kayatmo a lengguahe. Kauman ti Advertising Department iti 8527-8121 tapno maammuam no mano ti pagbayadmo. Wenno saan, kitaen ti Ad Rates iti panid 1 ti Bannawag. Laglagipen nga adda mainayon a 12% VAT iti pagbayadmo. —O
